Drama ti Taga-Chile Tignayennat’ Nakristianuan nga Ayat
Babaen ti koresponsal ti Agriingkayo! idiay Chile
AGDINDINAMAG ti Chile gapu iti Disierto Atacama, agraman ti di mapagnanaedan a nakalawlawa a kadaratanna. Mammano nga agtudo sadiay ta ti awagan ti kaaduan a tattao a linnaaw ket maibilang a tudo iti daytoy a langalang a lugar iti nagbaetan ti Baybay Pacifico ken Bambantay ti Andes. Gapu kadagitoy a kasasaad ti klima, saan a nakasagana ti kaaduan a balbalay iti tudo, ken uray pay sagpaminsan nga agtudo—nalabit maminsan iti makatawen—di man la maseknan ti kaaduan a mangkita no mabalin nga agtedted ti danum iti atep agingga nga umay ti tudo. Nalabit a dayta koma ti nangispal iti biag ti adu idiay Antofagasta, maysa a siudad a pagnanaedan ti 250,000 a tattao.
Iti karabiian ti Lunes, Hunio 17, 1991, adu a tattao ti agsagsagana a maturog, idi a nagtudo iti napigsa. Agtedtedted ti danum iti atep ti adu a balbalay, isu nga imbes a maturogda, ikarkarigatanda a sullatan dagiti abut wenno patibkeren dagiti balbalayda—a dida ipagpagarup nga adda mapasamak a nakarkaro pay iti uneg ti sumagmamano nga oras.
Kinabigatanna, tallo a dadakkel a reggaay, a nangiyanud iti minilion a tonelada a daga iti kapartak a 30 kilometros kada oras, ti nangpapatay iti agarup 85 a tattao, nangdangran iti agarup 700, ken nangdadael iti pagtaengan ti nasurok a 30,000!
Ladingit iti Taaw ti Pitak
Idiay Antofagasta adda sangapulo a kongregasion dagiti Saksi ni Jehova, a buklen ti agarup 1,400 a miembro, isu nga adda pudpudno a pannakaseknan iti pagimbaganda. Anian a ragsaktayo a makadamag nga awan pulos ti pimmusay, nupay maysa a kabsat a babai ti grabe a nadangran idi nga isut’ inyanud ti pitak iti dandani tallo a kilometro. Idi nga isut’ nasarakan dagiti manangalaw, impagarupda a natayen agingga a nadlaw ti maysa a nars nga agang-anges pay ket, idi immasideg, nangngegna nga umaw-awag iti “Jehová, Jehová.” Isut’ nakatilmon ti adu a pitak, isu nga intarayda iti ospital tapno maagasan para iti impeksion.
Iti Kongregasion ti Oriente, agarup 70 porsiento a pamilia ti napukawan wenno nadadaelan ti pagtaengan. Dadduma a pamilia iti Kongregasion ti Costanera ken Corvallis ti nadadaelan met ti pagtaengan iti kasta unay, idi a linapunos ti pitak dagiti atep iti dadduma a lugar wenno nagayus iti uneg dagiti balbalay, a nangpunno kadagiti siled iti pitak iti agingga 1.5 metro. Iti maysa a balay tumtumpaw iti pitak ti maysa nga ina ken ti dua a babassit nga annakna nga adda iti kama, nga in-inut nga idurduron ida ti pitak iti bobeda; naalawda idi a nakastrek ti ama ti babai iti atep. Dadduma nga adda kadagiti natalged bassit a lugar ti nangipagarup nga asidegen ti panungpalan bayat a dumdumngegda iti daranudor ti agay-ayus a pitak nga umab-ablat iti aniaman a masalawna ken iti ikkis iti adayo iti kinasipnget ken kinalam-ek ti rabii.
Banag a Napatpateg ngem Sansanikua
Nupay napukawanda ti adu a sansanikua, nangiparangarang dagiti Saksi iti naisangsangayan a kababalin. Maysa a Saksi ti nagkomento maipapan iti no kasano a dagiti gagayyem ken katrabahuanna nasdaawda iti pannakakitada iti naragsak a kababalinna iti baet ti nagdakkelan a pukawna. Kinunana kadakuada a no maiyurnos dagiti material a bambanag iti alpabeto sigun iti kinapategda, dagiti material a bambanag ti maibilang a kabassitan ti pategna. Isut’ naragsak a nakalasat ken sibibiag a kaduana ti intero a pamiliana.
Sabali pay nga ina, a naisina kadagiti annakna a babbai ken gistay napukawan iti dua kadakuada kasta met iti biagna a mismo, ti sipapasnek a nagkararag ken Jehova a no nasapa a mapagungar, kayatna ti agserbi a kosinera bayat nga agtartrabaho dagiti dadduma a mangisubli iti daga! Isut’ nakalasat, ket sadino ti ipagarupyo a nakaitudinganna nga agserbi kadagiti al-aldaw kalpasan ti panagreggaay ti pitak? Wen, iti kosina nga imbangon dagiti Saksi tapno mangiserbi iti ginasgasut a pannangan kadagiti pamilia dagiti Saksi ni Jehova ken kaarruba a napukawan iti pagtaengan!
Agtigtignay a Nakristianuan nga Ayat
Nangipatulod dagiti naayat a Saksi idiay Calama ken Iquique ti tinapay, danum, kawkawes, ken dadduma pay a kasapulan a bambanag idiay Antofagasta. Nangiyurnos met iti tulong ti sanga nga opisina ti Watch Tower Society, ket iti di nagbayag agsasangpeten ti luplupot, ul-ules, kama, alikamen ti kosina, ken dadduma pay a bambanag. Anian a makagutugot rikna a makakita a dagiti adu a naidonar a bambanag ket saan a daan wenno sobsobra no di ket kagatgatang! Di nagbayag naibaon ti dua a trak ti Sosiedad ken maysa pay manipud Rancagua idiay Antofagasta, agarup 1,400 kilometros iti umamianan, a naglaon iti 14 a tonelada a bambanag. Nupay naipakaammo a di kasapulanen ti mangidonar iti kanayonan a bambanag, agtultuloy latta ti panagsangpetda. Kas bungana, nasken ti agabang iti maysa a trak a mangbunag iti sabali pay a 16 a tonelada! Sibubulos a nairanud dagitoy nga abasto kadagiti kaarruba a di Saksi.
Nupay masarakan iti maysa kadagiti disso a nagsagaba iti kasta unay, nakaandur ti pagtaengan ti maysa a pamilia dagiti Saksi. Dagus nga impakitada ti ayatda iti kaarruba, a pinadagusda ti 9 a pamilia dagiti Saksi agraman 70 a dadduma pay a kaarruba a saan a Saksi, nga adu kadakuada ti simmangpet a nakapitpitak ken awanan pagan-anay. Impaay dagiti Saksi amin a lupot ken ules nga adda kadakuada.
Adut’ nangitulong iti tiempo, sansanikua, ken pigsada. Nupay maysa dayta a dakkel a didigra idiay Chile, maminsan manen nga impakita ti ili ni Jehova ti panagkaykaysada ken nainkabsatan a pannakaseknan, a nangipatulodda pay iti tulong a kuarta a naggapu agingga idiay Texas idiay Estados Unidos. Ginupgop ti maysa a tao ti dua lawas a panangtulong agpaay iti didigra idiay Antofagasta: “Awan pay naangay nga asambleatayo iti 13 nga aldaw, nga addaan nakaad-adu a pudpudno a drama, nakaad-adu a panangipaneknek iti ayat, nakaad-adu a panangisakripisio iti bagi kas ti naiparangarang iti napalabas a sumagmamano nga aldaw.”