Kolmanskop—Sadiay ti Darat ken Lati Mangdadael

Iti makasinit a darat ti Disierto ti Namib, iti dumna ti naangin a kosta ti makin-abagatan a Namibia, masarakan ti langalang a rebbek ti maysa nga ili a napagnaedan iti agarup 50 a tawen—ti Kolmanskop.

Idi natakkuatan ditoy dagiti diamante idi 1908, dagiti managsukisok iti napapateg a bato, negosiante iti minas, ken nagduduma a mapagduaduaan a tattao ti di nagbayag nagaribungbong a kakasla buitre. Idi agangay, ti Kolmanskop nagbalin a maysa a narang-ay nga ili, kompleto kadagiti nangangayed a kolonial-Aleman a balay, opisina ti koreo, ken bukodna nga otel. Addaan pay ti Kolmanskop iti dua-kadsaaran a casino, nga addaan sinean ken pagay-ayaman iti bowling—kinaluho a namagbalin iti biag nga ad-adda a makaay-ayo iti adayo a Disierto ti Namib.

Ngem ti mismo a rason ti kaadda ti Kolmanskop ti nangiturong iti pannakarbekna. Napartak a naibusan dagiti minasna kadagiti agkakapateg a bato a ti kadakkel ken kalidadda ket nalaka a panguartaan. Idi agangay naallukoy dagiti managsukisok iti napapateg a bato iti sabali a lugar idi a naduktalan sadiay dagiti daddadakkel ken nasaysayaat a diamante. Maysa pay, kimmapsut ti pagtagilakuan ti diamante idi nasapa a 1900’s. Nagin-inut a kimmapuy ti kasasaad ti ili agingga nga iti kamaudiananna, idi 1956, ti Kolmanskop ket nabaybay-anen.

Ita, ti saanen a maus-usar a makinaria ket aglatlatin iti sirok ti naulpit nga init idiay Africa—maysa a patawid ti apagkanito a panangpadas ti tao a manggun-od iti gameng manipud daga. Ti Kolmanskop ngarud ket agserbi a palagip iti kinaubbaw ti panaggartem iti naindagaan a gameng. Kuna ni Jesus: “Agurnongkayo kadagiti gupgupit sadi langit, isu a ti sanga ken ti lati dida dadaelen.”—Mateo 6:20.