Napatpateg Ngem Kadagiti Diamante

IDI 1970, nagtrabahoak iti kompania ti pagminasan a kukua dagiti taga-Britain iti Tongo Fields. Nabaknang iti diamante daytoy a lugar iti amianan ti Kenema. Agbirokak met kadagiti diamante no nawayaak. No adda mabirokak, agbadoak iti napintas sa mapanko ilako dagita idiay Kenema ken agpalpaliwaak kalpasanna.

Idi 1972, naam-ammok dagiti Saksi ni Jehova ken rinugiak ti nagadal iti Biblia. Kalpasan ti lima a bulan, kualipikadoakon a mabautisaran. Gapu ta awanen ti nabati a bakasionko, imbagak iti maysa a katrabahuak nga isaupnak pay laeng iti trabahok tapno makatabunoak iti kombension distrito ken mabautisaranak. Immanamong iti kondision nga ikkak iti makalawas a sueldo. Napatpateg ti panagpabautisarko ngem ti kuarta, isu a dagus nga inawatko ti tukonna. Idi nagsubliakon manipud iti kombension, imbagana a kukuak lattan ti sueldok gapu ta umiso ti ar-aramidek a panagserbi iti Dios. Kalpasan ti innem a bulan, nagikkatak iti trabahok nupay dakkel ti sueldok tapno agurnong iti kinabaknang idiay langit kas maysa nga special pioneer.​—Mat. 6:19, 20.

Iti 18 a tawen, nagserbiak kas special pioneer ken manangaywan iti sirkito iti nagduduma a paset ti pagilian. Kabayatanna, inasawak ni Christiana, maysa a nasungdo ken mannakikooperar nga asawa, ket naaddaankami iti anak a ni Lynette.

Bayat ti gerra sibil iti Sierra Leone, nagpayunirkami ken Christiana iti Bo, a masarakan iti sabali pay a dakkel a pagminasan iti diamante. Ditoy a nakasarakkami kadagiti adu a naespirituan a “diamante”​—dagiti pudno a Kristiano nga ad-adalan. Iti uneg ti uppat a tawen, rimmang-ay iti nasurok nga 60 a porsiento ti kongregasionmi. Adda itan tallo a narang-ay a kongregasion iti Bo.

Idi 2002, naawisak nga agbalin a kameng ti Branch Committee iti Sierra Leone. Agnanaedkami ken Christiana iti asideg ti Bethel. Inaldaw a mapanak agtrabaho iti Bethel, bayat nga agserserbi ni Christiana kas special pioneer. Agserserbi met ni Lynette iti Krio translation team iti Bethel.

Inar-arapaapko idi ti agbirok kadagiti literal a diamante, ngem napatpateg pay ti nabirokak​—dagiti naespirituan a kinabaknang. Nakabirokak met iti 18 a naespirituan a “diamante,” wenno pudno a Kristiano nga ad-adalan. Pudno nga aglaplapusanan dagiti bendision ni Jehova kaniak.