Wayawaya ti Relihion Idiay Bulgaria
Innem a bus manipud Bulgaria, a nangilugan iti nasurok a 300 a delegado iti “Managayat iti Wayawaya” a Kumbension Distrito, ti simmangpet idiay pagkumbensionan iti ruar ti Tesalonica, Grecia, idi rabii ti Huebes, Hulio 11, 1991. Gapu iti guerra sibil iti kabangibang a Yugoslavia ken ti riribuk a pinataudna iti lugar, dagitoy a delegado dida nakagun-od iti bisada agingga iti mabalin a naudin a kanito.
Idi malem ti Mierkoles dagiti kameng ti embahada idiay Sofia, Bulgaria, pinawaywayanda ti panagtrabahoda tapno iproseso dagiti bisa. Gapuna, dagiti bus nabaelanda a dinagas dagiti delegado manipud iti nadumaduma a paset ti Bulgaria iti apag-isu a tiempo tapno makagtengda iti pagkumbensionan iti rabii sakbay ti panangrugi ti kumbension iti Biernes, Hulio 12.
Idi, naparitan dagiti Saksi ni Jehova idiay Bulgaria, gapuna anian a ragsakda a siwayawaya a mangtagiragsak iti Nakristianuan a panaglalangen iti kabangibang a pagilian iti Grecia! Maysa a pasilio idiay pagkumbensionan, nga addaan iti nagpintasan ti pannakaarkosna nga entablado (makita iti ladawan), ti naisagana agpaay kadagiti bisita a taga Bulgaria. Anian a ragsak ken panagyaman dagiti bisita ta naiparang ti dandani intero a programa iti pagsasaoda a mismo! Ti laeng nailaksid isu ti drama iti Biblia. Maysa a 15-minutos a palawag a nangsumario iti drama ti naipaay iti pagsasao a Bulgarian, ket kalpasanna nakipagtipon dagiti delegado kadagiti kakabsatda a Griego tapno buyaenda ti pannakaiparangna.
Ti tampok ti kumbension ti Bulgaria isu ti palawag ti bautismo iti agsapa ti Sabado. Adda kangatuan a bilang a 342 a timmabuno, ket 39 ti nabautisaran (dadduma kadakuada ti agtaktakder iti ngato). Naragsakan met dagiti delegado iti pannakairuar ti baro a broshur nga Espiritu dagiti Natay—Matulongandakay Aya wenno Dangrandakayo? Talaga Kadi nga Addada? ken ti publikasion a Ti Librok dagiti Estoria ti Biblia iti pagsasaoda.
Ngem ti kadadakkelan a pakaragsakan ti agur-uray kadagiti delegado apaman a makaawidda idiay Bulgaria. Idi Hulio 17, nakurang a makalawas kalpasan ti kumbension, nagbalin a legal dagiti ar-aramid dagiti Saksi ni Jehova idiay Bulgaria! Naisangsangayan, nagpromedio dagiti agibumbunannag iti kongregasion idiay Bulgaria iti 21.2 nga oras iti ministerioda iti sumaganad a bulan. Anian a ragsaktayo ta matagtagiragsaken ti wayawaya ti relihion iti sabali pay a pagilian iti Makindaya nga Europa!