Nagballigi ti Espesial a Kampania Idiay Bulgaria

“Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” ​—MAT. 9:37, 38.

ANIAN a maitutop dagita a sasao ni Jesus iti kasasaad idiay Bulgaria, maysa a napintas a pagilian iti Balkan iti abagatan a daya ti Europa! Talaga a kasapulan ti ad-adu a trabahador a mangikasaba iti naimbag a damag iti nasurok a pito a milion nga umili sadiay. Adda agarup 1,700 nga agibumbunannag idiay Bulgaria, ngem dida kabaelan a wanasen ti intero a teritoria. Gapuna, inaprobaran ti Bagi a Manarawidwid ti panangawis kadagiti Saksi a makapagsao iti Bulgario manipud iti sumagmamano a pagilian ti Europa tapno mapanda sadiay ken makipasetda iti espesial a kampania idi 2009. Nayeskediul ti kampania iti pito a lawas bayat ti kalgaw agingga iti “Agtultuloykayo nga Agbantay!” a Kombension Distrito idiay Sofia idi Agosto 14-16, 2009.

Adu ti Nangipangag iti Awis

Pinampanunot dagiti kakabsat iti sanga nga opisina iti Sofia no mano ti mangipangag iti awis manipud Alemania, Espania, Francia, Grecia, Italia, ken Poland. Ti ngamin ipapanda iti Bulgaria ket bukodda a gastos ken agbakasionda para iti panangasaba. Anian a makaparagsak ta linawas nga umad-adu ti mayat a mapan tumulong, agingga a dimmanon ti bilangda iti 292! Gapu iti dayta, nagbalin a posible ti pannakaibaon dagitoy a boluntario iti tallo a nagduduma a siudad ti Bulgaria: Kazanlak, Sandanski, ken Silistra. Dagiti manangaywan iti sirkito ti Bulgaria inawisda dagiti lumugar a payunir ken agibumbunannag tapno tumulongda met iti kampania. Nagangayanna, 382 a boluntario ti sireregta a nangasaba kadagiti teritoria a manmano a mawanas.

Dagiti kakabsat kadagiti asideg a kongregasion ti nadutokan a mangyurnos a nasaksakbay kadagiti pagdagusan. Nagabangda kadagiti apartment ken nagreserbada kadagiti nalaka a hotel. Dagitoy a kakabsat siaanus a tinulonganda dagiti agsangpet a boluntario a makasimpa ken inasikasoda dagiti kasapulanda. Kadagiti tallo a siudad, adda dagiti inabanganda a lugar a paggigimongan. Nayurnos a dagiti bisita a lallaki ti mangikondukta kadagiti gimong. Makaparagsak ta uray kadagiti lugar nga awan ti Saksi, adda 50 nga agibumbunannag a naggigimong tapno idaydayawda ni Jehova.

Nakaregregta dagiti boluntario manipud kadagiti sabali a pagilian iti panangsuportada iti kampania. Kabayatan ti kalgaw, bumara iti agingga iti nasurok nga 40°C ti temperatura idiay Bulgaria. Nupay kasta, awan ti makalapped kadagitoy a nareregta a kakabsat. Iti las-ud ti umuna a tallo a lawas, naan-anay a nawanas ti Silistra, maysa a siudad iti Karayan Danube nga addaan iti nasurok a 50,000 nga umili. Dagiti kakabsat inramanda pay a kinasabaan dagiti kabangibang a purok, nga urayda la nakadanon iti Tutrakan, 55 a kilometro iti laud ti Silistra. Kaaduanna a rugianda ti mangasaba iti 9:30 ti bigat. Kalpasan ti pangngaldaw, masansan nga ituloyda ti mangasaba agingga iti 7:00 ti rabii wenno naladladaw pay. Umasping iti dayta, gapu iti napalalo a kinaregta dagiti nagboluntario iti kampania idiay Kazanlak ken Sandanski, inramanda a kinasabaan dagiti kabangibang a purok ken siudad.

Ania ti Naibanag?

Naisangsangayan a panangsaksi ti naibanag bayat dagidi a pito a lawas. Kas iti naibaga idi kaaldawan dagiti apostol, maibaga met dagiti umili kadagitoy a siudad: ‘Pinunnoyo ti siudadmi iti sursuroyo.’ (Ara. 5:28) Nakaipaima dagiti nakiraman a Saksi iti agarup 50,000 a magasin ken nakairugida iti 482 a panangyadal iti Biblia. Makaparagsak ta idi Setiembre 1, 2009, maysa a kongregasion ti nabuangay idiay Silistra, ken adda dagiti grupo a nabuangay idiay Kazanlak ken Sandanski. Makapabileg a makita ti naespirituan a panagrang-ay dagiti tattao a damo a nakangngeg iti naimbag a damag kabayatan daytoy a kampania.

Iti umuna a lawas ti kampania, maysa a taga-Espania nga special pioneer a babai a makapagsao iti Bulgario ti nangasaba ken Karina, maysa a taga-Silistra nga aglaklako iti diario iti kalsada. Isu ket naginteres ken timmabuno iti gimong. Dagus nga immanamong nga agpayadal iti Biblia. Gapu ta ateista ni lakayna, kiniddawna nga iti parke a mayadalan. Kaduana ti dua a babbalasangna iti panagadal. Ti in-inauna a ni Daniela impategna unay ti kinapudno iti Biblia. Binasana ti libro nga Isursuro ti Biblia iti makalawas ket dagus nga inyaplikarna ti kuna ti Biblia maipapan iti saan a panagusar kadagiti imahen iti panagdayaw. Kalpasanna, inranudna ti kinapudno kadagiti gagayyemna. Uray tallo a lawas pay laeng a makigimgimong, kinuna ni Daniela iti mangyad-adal kenkuana: “Panagriknak ket maysaakon kadakayo. Ania ti masapul nga aramidek tapno mabalinko metten ti mangasaba?” Agtultuloy ti panagrang-ay ni Daniela, agraman ni nanang ken adingna.

Idiay Kazanlak, maysa a Bulgariano a kabsat nga agnagan iti Orlin, ti naggapu idiay Italia tapno suportaranna ti kampania. Iti panagawidna iti dagusna kalpasan ti panangasaba, kinasabaanna ti dua nga agtutubo a lallaki a nakatugaw iti bangko iti parke. Pinaimaanna ida iti libro nga Isursuro ti Biblia ken inyurnosna a sarungkaran ida iti kabigatanna. Iti dayta nga isasarungkarna, inrugi ni Orlin nga inyadalan iti Biblia ni Svetomir, sa intuloyda kabigatanna. Iti siam nga aldaw, naminwalo a nayadalan ni Svetomir. Kinunana ken Orlin: “Dua nga aldaw sakbay a nakasaritaka, inkararagko iti Dios a tulongannak a mangam-ammo kenkuana. Ket inkarik a no tulongannak, agserbiak kenkuana.” Idi nagsubli ni Orlin idiay Italia, dagiti lumugar a kakabsat intultuloyda nga inyadalan ni Svetomir, ket ipappapusona ti kinapudno.

Naruay a Bendision Kadagidiay Nagsakripisio

Ania ti rikna dagidiay nangbusbos iti kuarta ken panawenda tapno maikasabada ti naimbag a damag iti sabali a pagilian? Insurat ti maysa a panglakayen idiay Espania: “Dayta a kampania ti ad-adda a nangpasinged kadagiti kakabsat iti Espania nga agus-usar iti lenguahe a Bulgario. Nagdakkel ti epekto dayta kadagiti kakabsat a nakiraman.” Maysa a pagassawaan manipud Italia ti nangisurat: “Daytoy ti kasayaatan a bulan iti biagmi!” Innayonda pay: “Binalbaliwan dayta a kampania ti biagmi! Naidumakami itan.” Pampanunotenda a naimbag no posible nga umakarda idiay Bulgaria tapno permanente nga agserbida iti lugar a dakdakkel ti panagkasapulan. Ni Carina ket maysa a balasang a regular pioneer manipud Espania. Sinuportaranna ti kampania idiay Silistra. Kalpasan dayta, nagikkat iti trabahona idiay Espania sa immakar idiay Bulgaria tapno tumulong iti kabbuangay a kongregasion iti dayta a siudad. Nakaurnong iti kuarta nga umdas nga usarenna para iti makatawen a panaggianna idiay Bulgaria. Kastoy ti kuna ni Carina maipapan iti desisionna: “Nakaragragsakak ta inikkannak ni Jehova iti gundaway nga agserbi ditoy Bulgaria, ket sapay koma ta makapagbayagak ditoy. Addan lima nga iyad-adalak iti Biblia, ket tallo kadakuada ti makigimgimongen.”

Kayat met ti maysa nga Italiana ti makiraman iti kampania, ngem saan pay a makabakasion ta kaskastrekna iti trabaho. Kaskasdi a nagkiddaw iti makabulan a bakasion nga awan ti bayadna ken nakasagana nga agikkat iti trabaho no di mapatgan ti kiddawna. Nasdaaw iti kinuna ti amona: “Sige, ngem iti maysa a kondision: Masapul a patulodannakto iti postcard ti Bulgaria.” Sigurado a narikna daytoy a kabsat a sinungbatan ni Jehova dagiti kararagna.

Idiay Varna a siudad ti Bulgaria, ti agtutubo a babai nga agnagan iti Stanislava ket nagbakasion iti trabahona a nangato ti sueldona tapno makiraman iti kampania idiay Silistra. Uray la nakasangit idi nakitana ti kinaragsak ti adu a payunir a naggapu iti adayo a lugar tapno ikasabada ti naimbag a damag iti pagilianda. Inutobna no ania ti ar-aramidenna iti biagna, ti panangipangpangruna iti sekular a karera. Idi nakaawid kalpasan ti dua a lawas, nagikkat iti trabahona ket nagserbi kas regular pioneer. Talaga a nakaragragsak itan, a silalagip iti Namarsua kenkuana bayat ti kinaagtutubona.​—Ecl. 12:1.

Anian a bendision ti panagbalin nga aktibo iti panagserbi ken Jehova! Awanen ti nasaysayaat pay no di ti panangusarmo iti panawen ken pigsam agpaay iti nagpateg a trabaho a panangisuro ken panangikasaba iti naimbag a damag. Adda kadi dagiti pamay-an tapno mapalawam ti pannakiramanmo iti mangispal-biag a ministerio? Nalabit adda dagiti lugar iti pagilianyo nga addaan iti dakdakkel a panagkasapulan. Mabalinmo kadi ti umakar iti kasta a lugar? Wenno mabalin nga agadalka iti sabali a lenguahe tapno matulongam dagiti tattao iti pagilianyo a mawaw iti kinapudno iti Biblia. Aniaman dagiti panagbalbaliw nga aramidem tapno mapalawam ti ministeriom, masiguradom ti nabaknang a bendision ni Jehova.​—Prov. 10:22.

[Kahon/Ladawan iti panid 32]

Nakallalagip nga Aldaw

Adu kadagiti naggapu iti dadduma a pagilian ti Europa a nakiraman iti kampania idiay Bulgaria ti nangiplano a tumabuno iti “Agtultuloykayo nga Agbantay!” a Kombension Distrito idiay Sofia. Makaparegta unay kadagiti lumugar a kakabsat a maam-ammo ti nagadu a bisita manipud iti nagduduma a pagilian. Anian a ragsak ti 2,039 a timmabuno idi inruar ni Kabsat Geoffrey Jackson, kameng ti Bagi a Manarawidwid, ti kompleto a Baro a Lubong a Patarus ti Nasantuan a Kasuratan iti Bulgario! Amin a timmabuno iti dayta a Biernes inyebkasda ti naimpusuan a panagyamanda babaen ti napigsa ken napaut a palakpak. Adu pay ti nakalua gapu iti rag-oda. Daytoy nga umiso a patarus iti nalaka a maawatan a sasao ti tumulong kadagiti napasnek a taga-Bulgaria tapno maam-ammoda ni Jehova.

[Mapa iti panid 30, 31]

Para iti aktual a pannakaurnosna, kitaem ti publikasion)

BULGARIA

SOFIA

Silistra

Kazanlak

Sandanski

[Dagiti Ladawan iti panid 31]

Naisangsangayan a panangsaksi ti naibanag bayat dagidi a pito a lawas