Espesial nga Imbitasion
1. Kaano a mangrugi ti kampania a panangyawis iti kombension?
1 No adda isagsaganam nga espesial a pannangan para iti gagayyem wenno pamilia, nga agbannog ken gumastoska, magagaranka la ketdi a mangyawis iti dayta. Umasping iti dayta, adu a trabaho ti naaramid iti panangisagana iti naespirituan a padaya a maiparang iti mapaspasungadan a kombensiontayo. Tallo a lawas sakbay ti kombensiontayo, inikkannatayo ni Jehova iti pribilehio nga agawis kadagiti umatendar. Ania ti makatulong tapno magagarantayo nga agawis?
2. Ania ti mangtignay kadatayo a makiraman a naan-anay iti kampania?
2 Matignaytayo a makiraman a naan-anay iti kampania no utobentayo dagiti adu a magunggonatayo kadagiti makapabang-ar nga instruksion nga ipaay ni Jehova kadagiti kombensiontayo. (Isa. 65:13, 14) Masapul a laglagipentayo met nga adda dagiti nasayaat a resulta ti tinawen a kampaniatayo. (Kitaenyo ti kahon a “Dagiti Resulta.”) Adda dagiti awisentayo nga umatendarto iti kombension ken adda met dagiti saan. Ngem kasano man kaadu ti umatendar, ti panagreggettayo a makiraman iti kampania ket pakaidayawan ni Jehova ken pakakitaan ti kinaparaburna.Sal. 145:3, 7; Apoc. 22:17.
3. Kasano a maiwaras dagiti imbitasion?
3 Rumbeng nga ikeddeng ti bagi dagiti panglakayen no kasano ti pannakaiwaras dagiti imbitasion ken no rumbeng a mangibati iti imbitasion kadagiti pagtaengan nga awan ti bumalay wenno no maitukon dagita iti publiko a panangasaba iti teritoria. Kadagiti ngudo ti lawas, itukon dagiti magasin a kadua ti imbitasion no maitutop. Kalpasan ti kampania, sigurado a maragsakantayto ta nakiramantayo a sireregta ken inaramidtayo ti amin a kabaelantayo nga agawis kadagiti tattao a makikadua kadatayo iti naespirituan a padaya nga insagana ni Jehova!