Espesial nga Imbitasion
1. Kaano a mangrugi ti kampania a panangyawis iti 2014 a rehional a kombension?
1 No adda isagsaganam nga espesial a pannangan para iti gagayyem wenno pamilia, nga agbannog ken gumastoska, nalabit magagaranka a mangyawis iti dayta. Umasping iti dayta, adu a trabaho ti naaramid iti panangisagana iti naespirituan a padaya a maangay kadagiti 2014 a rehional a kombension. Tallo a lawas sakbay ti kombensiontayo, pribilehiotayo ti agawis kadagiti tumabuno. Ania ti makatulong kadatayo nga agawis a sigagagar?
2. Ania ti mangtignay kadatayo a makiraman a naan-anay iti kampania?
2 Matignaytayo a makiraman a naan-anay iti kampania no utobentayo no kasanotayo a magunggonaan a mismo iti naespirituan a padaya nga ipaay ni Jehova kadagiti kombensiontayo. (Isa. 65:13, 14) Masapul a laglagipentayo met a nasayaat ti resulta ti tinawen a kampaniatayo. Ti dadduma nga awisentayo ket tumabunonto iti kombension. Ngem kasano man kaadu ti tumabuno, ti panagreggettayo a makiraman iti kampania ket pakaidayawan ni Jehova ken pakakitaan ti kinamanagparaburna.—Sal. 145:3, 7; Apoc. 22:17.
3. Kasano a maiwaras dagiti imbitasion?
3 Rumbeng nga ikeddeng ti tunggal bagi dagiti panglakayen no kasano ti nasaknap a pannakaiwaras dagiti imbitasion ken no masapul ti mangibati iti imbitasion kadagiti pagtaengan nga awan ti bumalayna wenno no maitukon dagita bayat ti publiko a panangasaba iti teritoria. Iti ngudo ti lawas, masapul a maitukon dagiti magasin a kadua ti imbitasion no maitutop. No ti umuna a Sabado ti bulan ket mairana iti kampania, maipangpangruna koma ti panagiwaras kadagiti imbitasion imbes a ti panangirugi iti panangyadal iti Biblia. Kalpasan ti kampania, sigurado a maragsakantayto ta nakiramantayo a sireregta ken inaramidtayo ti kabaelantayo nga agawis kadagiti tattao a makikadua kadatayo iti naespirituan a padaya nga insagana ni Jehova!