Maysa a Nabunga a Kampania

Tallo a lawas sakbay a mangrugi ti kombension, makiraman manen dagiti kongregasion iti maysa a kampania a mangawis a tumabuno kadagiti interesado iti teritoriada. Nabunga kadi ti kampaniatayo uray no adda dagiti lugar a kasapulan nga adayo ti biahien dagiti interesado a tumabuno iti kombension?

Kalpasan ti nabiit pay a kombension distrito, maysa a sanga nga opisina ti nakaawat iti surat ti maysa a babai a nakakita iti imbitasion iti ridawda. Kadawyanna nga aglemmeng no agtuktok dagiti Saksi ni Jehova. Insuratna: “Napintas ti balaymi, nasingpet ni lakayko, ken impagarupko nga adda aminen kaniak tapno agbalinak a naragsak. Ngem kinaagpaysuanna, saanak latta idi a naragsak ken awan ti pudpudno a panggep ti biagko. Isu a nagmanehoak iti 320 a kilometro tapno matabunuak ti programa iti Sabado.” Nagustuanna unay ti kombension isu a tineleponuanna ni lakayna tapno ibagana nga umyan sadiay tapno tumabuno pay iti Domingo. “Dimngegak iti amin a palawag, adu a Saksi ni Jehova ti naam-ammok, ket diak kayat nga agpatinggan daytoy.” Idi nakaawiden, nagpayadal. Kalpasan ti uppat a bulan, nagbalinen a di bautisado nga agibumbunannag. “Imbag laengen ta nakitak daydiay nga imbitasion iti ridawmi agsipud ta ita, addan pudpudno a panggep ti biagko!”

Tumabunonto la ketdi ti dadduma a makaawat iti imbitasion. Gapuna, sireregta a makiramantayo iti daytoy a napateg a kampania. Itugotyo iti pagkombensionan dagiti nabatbati nga imbitasionyo ket usarenyo dagita iti di pormal a panangasaba.

[Kahon iti panid 5]

Kasanotayo nga Itukon ti Imbitasion?

Mabalintayo nga ibaga: “Naimbag nga aldawyo. Makiramramankami iti panagiwaras iti daytoy nga imbitasion iti intero a lubong. Daytoy ti imbitasionyo. Mabasayo iti dayta ti ad-adu pay a detalye.” Naganaygay koma ti pannakisaritayo. No makiramramankayo iti panagiwaras iti imbitasion kadagiti ngudo ti lawas, itukonyo met dagiti magasin no maitutop.