Naipamaysa ken Sangalubongan a Panangikagumaan a Mangipakaammo iti “Surotenyo ti Kristo!” a Kombension Distrito
Dagiti Agibumbunannag Agiwarasda Manen iti Espesial a Polieto
1 Idi napan a tawen, ti sangalubongan a kampania a panangipakaammo iti “Asidegen ti Pannakaisalakan!” a Kombension Distrito ket nagsayaat ti epektona kadagiti interesado. Dagidiay immawat iti espesial nga imbitasion ken timmabuno napadasanda iti umuna a gundaway ti nalabon a naespirituan a padaya dagiti Saksi ni Jehova. (Isa. 65:13) Tinagiragsakda ti makitimpuyog iti naayat, nagkaykaysa a Nakristianuan a panagkakabsattayo. (Sal. 133:1) Tapno ad-adu ti maawistayo a tumabuno iti “Surotenyo ti Kristo!” a Kombension Distrito, makiramantayo manen iti sangalubongan a panagiwaras iti espesial a polieto.
2 Dagiti Resulta Idi Napan a Tawen: Maibatay kadagiti report a naawat manipud kadagiti amin a paset ti lubong, nagsayaat dagiti resulta ti panangipakaammo iti “Asidegen ti Pannakaisalakan!” a Kombension Distrito. Kas pagarigan, iti maysa a siudad, adda pagiwarnak a nangipablaak iti artikulo nga innem ti binatogna maipapan iti kampania. Kastoy ti kunana: “Tapno madanonda ti amin a tattao sakbay ti kombension, ad-adda nga inkagumaan dagiti Saksi a sarungkaran dagiti kaarrubada—nagtrabahoda iti ad-adu nga oras, nagnagnada kadagiti adayo a lugar, ken ab-ababa ti pannakisaritada.” Iti sabali pay a siudad, di kumurang a tallo a pagiwarnak ti positibo ti komentona iti aktibidadtayo sakbay ti kombension. Adda maysa a reporter a nangisurat iti sumagmamano nga atiddog nga artikulo. Nasurok a dua a panid ti sinaklaw dagitoy iti edision ti maysa a pagiwarnak iti Domingo. Nailanad iti dayta dagiti patpatientayo, ti panagkakabsattayo, ti panagiwaras iti polieto, ken ti kombension. Idi adda maysa nga agibumbunannag a nangted iti imbitasion iti bumalay, kinuna ti bumalay: “Wen. Kabasbasak dayta iti pagiwarnak!” Kinuna ti sabali pay a bumalay: “Kabasbasak ti maipapan kadakayo, ket ita addakayo ditoyen! Dayta kadi ti imbitasionko?” Sa innayonna, “Nagsayaat daytoy nga ar-aramiden dagiti Saksi ni Jehova.”
3 Adu nga interesado ti napan kadagiti pagkombensionan nga iggemda dagiti imbitasionda. Adda dagiti interesado a nagmaneho manipud kadagiti adayo a siudad tapno matabunuanda dagiti sesion. Immadu ti timmabuno gapu iti napinget a panangikagumaantayo a mangawis kadagiti sabsabali. Iti maysa a pagilian kas pagarigan, immadu iti 27 porsiento ti timmabuno iti kombension no idilig idi 2005. Ditoy Pilipinas, 340,215 ti baro a kangatuan a bilang dagiti timmabuno idi napan a tawen.
4 Panangwanas iti Teritoria: Mabalinyon nga irugi ti agiwaras iti polieto tallo a lawas sakbay a mangrugi ti kombensionyo. Ikagumaanyo a wanasen ti intero a teritoria ti kongregasionyo. Kadagiti kongregasion a nalawa ti teritoriada, dagiti agibumbunannag mabalinda nga ibati ti polieto iti lugar a saan a makita dagiti lumablabas kadagiti pagtaengan nga awan dagiti bumalayna bayat ti maudi a lawas sakbay ti kombension. Ikagumaan koma dagiti kongregasion nga iwaras dagiti amin a naipatulod kadakuada nga imbitasion ken wanasenda ti adu a teritoria aginggat’ mabalin. Aniaman a masobra ket mabalin nga ited kadagiti payunir iti kongregasion.
5 No Ania ti Kunaenyo: Mabalinyo nga ibaga ti kas iti daytoy: “Makiramramankami iti sangalubongan a panangikagumaan a mangiwaras iti daytoy nga imbitasion maipaay iti mapaspasungadan a napateg nga okasion. Daytoy ti kopiayo. Mabasayo iti imbitasion ti dadduma pay a detalye.” Ad-adu ti mawarasanyo no ababa laeng ti presentasionyo. Siempre, no adda saludsod ti bumalay, iwayaanyo a sungbatan dagita. No adda mabirokanyo nga interesado, isuratyo dayta ken sarungkaranyo iti kabiitan a panawen.
6 Anian a nagpateg nga ikagumaantayo a suroten ti Kristo! (Juan 3:36) Ti mapaspasungadan a kombension distritotayo tulonganna amin a tumabuno a mangaramid iti dayta. Masiguradotayo nga adu manen ti maipaayantayo iti pammaneknek kas resulta ti naipamaysa a panangikagumaantayo a mangipakaammo iti “Surotenyo ti Kristo!” a Kombension Distrito. Gapuna, ganetgetanyo nga awisen a tumabuno ti adu a tattao aginggat’ mabalin. Sapay koma ta sibabaknang a bendisionan ni Jehova dagiti personal a panagreggetyo a makiraman iti daytoy nagkaykaysa ken sangalubongan a kampania.