Sangalubongan a Kampania a Mangipakaammo iti “Asidegen ti Pannakaisalakan!” A Kombension Distrito
Dagiti Agibumbunannag iti Tunggal Kongregasion Iwarasda ti Espesial a Handbill
1 Iti daytoy a tawen, kadagiti 2006-2007 a serye dagiti kombension distrito addanto kampania a pakausaran ti espesial a handbill a mangipakaammo kadagiti kombension a maangay iti agarup 155 a pagilian.
2 Gapu ta agbibiagtayon iti kangitingitan ti maudi nga al-aldaw, dagiti kombension a pakaitampokan ti inkari ti Dios a pannakaisalakan iti daytoy dakes a sistema rumbeng a gutugotenna dagidiay siuumiso nga agannayas. Ti mensahe a mangngeganda tignayenna koma ida a mangpanunot no ania ti agur-uray iti masanguanan. Tapno riniwriw a tattao ti maikkan iti gundaway a dumngeg iti makaliwliwa ken mangted iti namnama a mensahe, maidagadag kadagiti nasurok a 98,000 a kongregasion dagiti Saksi ni Jehova iti intero a lubong a sigaganetget a makiramanda iti panangipakaammo iti kombension a nakaitimpuyoganda.
3 Maikkanto dagiti kongregasion iti umdas a handbill tapno makagun-od iti agingga iti 20 a kopia ti tunggal agibumbunannag. Mabalin nga usaren dagiti payunir iti kongregasion ti aniaman a sobra. Iti tunggal kongregasion, mangrugi ti kampania tallo a lawas sakbay ti umuna nga aldaw ti kombension a naituding a tabunuan ti kongregasion.
4 Mairekomenda nga amin a mayad-adalan iti Biblia ken ti pamiliada, agraman dagiti dadduma pay nga interesado iti teritoriayo, ket masarungkaran ken maikkan iti imbitasion iti kombension distrito. Maiwaras met dagiti handbill iti teritoriayo agingga a maibus ti suplay. Nasken ti napasnek a panagregget tapno maiwaras ti amin a handbill iti uneg ti tallo a lawas.
5 Agtalekkami a makaipaaytayo iti nasaknap a panangsaksi kas resulta daytoy naipamaysa ken sangalubongan a panangikagumaan a mangipakaammo iti “Asidegen ti Pannakaisalakan!” a Kombension Distrito. Ikarkararagmi a sibabaknang koma a bendisionan ni Jehova ti personal a panangikagumaanyo a makiraman iti daytoy sangalubongan a kampania.