Us-usarenyo Kadi Dagiti Handbill?

Maysa nga aldaw, ti 11 ti tawenna nga ubing a lalaki ket nakapidut iti handbill a mangyaw-awis iti maysa a palawag maipapan iti impierno. “Interesadoak unay iti dayta,” kinunana, “ta kasla kanayon a di umiso ti ar-aramidek, isu a madanaganak unay amangan no idiay impierno ti pagtungpalak inton matayak.” Tinabunuanna ti palawag ket kalpasan ti agarup maysa a tawen isu ket nabautisaran kalpasan ti sumagmamano a daras a pannakipagadalna iti Biblia. Kasta ti nangrugian ti Nakristianuan a ministerio ni Karl Klein, nga idi agangay nagserbi iti adu a tawen kas kameng ti Bagi a Manarawidwid dagiti Saksi ni Jehova. Maigapu dayta iti maysa a handbill.

Agingga ita, epektibo pay laeng ti panangusar kadagiti handbill iti panangasaba. Natakuatan ti adu nga agibumbunannag a ti panangted iti dayta iti maysa a tao ket nagsayaat a pamay-an a pangyam-ammo iti bagida ken pangirugi iti saritaan. Dagiti nagannak mabalin nga iramanda dagiti annakda iti ministerio babaen ti panangisuroda kadakuada a mangted iti handbill kadagiti bumalay. Dagiti agibumbunannag a mangaskasaba babaen ti surat mabalinda ti mangiragpin iti handbill a mangyaw-awis kadagiti gimong. Epektibo met ti panangusar kadagiti handbill no awisentayo nga umay makigimong dagiti mayad-adalan ken ti dadduma pay nga interesado.

Us-usarem kadi a naimbag dagiti handbill iti ministeriom?