Asinot’ Agtarigagay nga Agbalin a Milionario?

TI SUNGBAT mabalin a: dandani isuamin. Ket ti kalakaan a pamay-an ti panagbalin a milionario—sigun iti nalatak a pagarup—isut’ giddato a panangabak iti adu a kuarta iti maysa a loteria wenno iti soccer pool.a

Gaput’ pananggundaway iti agdama a kinalatak—ken panagtarigagay iti kanayonan a masapulan iti loteria—dagiti gobierno manipud Moscow agingga iti Madrid, manipud Manila agingga iti Siudad ti Mexico, itandudoda dagiti loteria ti Gobierno a mangitukon kadagiti dadakkel a premio a ginasut a milion a doliar.

Mammano ti agbalin a milionario. Maysa a lalaki nga Ingles ti nangsurat kadagiti pormas a makipaset iti soccer pool iti 25 a tawen sakbay a nangabak kamaudiananna iti nagdakkelan a premio a kuarta. Babaen iti pusta a 50 centimos, isut’ nangabak iti dandani $1.5 milion. Ad-adda pay a nakaskasdaaw ti inabak ti maysa a babai manipud Nueva York, a nagbalin a maysa kadagiti kadadakkelan ti inabak iti lubong idi isut’ nangabak iti $55 milion iti loteria ti Gobierno idiay Florida.

Ngem naisangsangayan dagitoy. Ti gagangay a pangarigan isut’ maysa a nataengan nga eskribiente a Kastila a gimmatang kadagiti tiket ti loteria iti linawas iti 30 a tawen. Nupay di pay pulos nangab-abak iti dakkel, isut’ di naupay. “Kanayon nga inanamaek ti mangabak,” kunana. Kasta met, maysa a lalaki idiay Montreal, a nangbusbos iti intero a lawas a sapulna iti maysa a loteria ti Canada, ginupgopna ti panangmatmat dagiti adu idi inlawlawagna: “Dagiti pannakabola kas itoy isut’ kakaisuna a pamay-an ti panangarapaap dagiti awan kais-iskanna a tattao iti nasaysayaat a biag.” Kaskasdi isut’ di nangabak.

Nupay sapasap ti panangawis ti loteria, ti sabali pay a kita ti sugal aglatlatak: panagay-ayam iti slot machine. Nupay ti maymaysat’ takkiagna a mannanakaw di mangpabaknang iti agpatnag laeng, pudno a mangipaay iti managay-ayam iti giddato a panangabak iti jackpot—a dakkel metten. Ket dagitoy saan laeng a masarakan kadagiti casino. Dagiti makaawis a kankanta, agkilapkilap a silsilaw, ken ti kankanayon a kalangiking dagiti agtinnag a sinsilio ti mangipakaammo nga aduda kadagiti adu a pagkapean, klab, restauran, ken kadagiti otel iti Europa.

Ni Frances ket maysa a balo a baket nga agnanaed idiay Siudad ti Nueva York. Mamindua wenno mamitlo iti linawas, isut’ agbiahe iti bus iti dua ket kagudua nga oras a mapan idiay Siudad ti Atlantic, New Jersey. Apaman a sumangpet sumrek iti maysa kadagiti casino ti siudad, ket sadiay agay-ayam kadagiti slot machine iti las-ud ti innem nga oras wenno ad-adu pay sakbay nga agawid. “Diak ammo ti aramidek no awan ti Siudad ti Atlantic,” kunana. “Daytoy ti pagragsakanmi, siempre, daytoy ti aramidenmi.”

Para kadagiti dadduma, ti sugal saan laeng a pagraragsakan, maysa a pakabang-aran iti inaldaw-aldaw a gagangay a trabaho, wenno panginanamaan a bumaknang. Iti biangda daytat’ napateg—no di nasken—a paset iti biag.

“Sugadorak agsipud ta tagiragsakek ti risgo a mairaman dita,” ilawlawag ni Luciano, manipud Córdoba, España. “Diak agpampambar,” innayonna, “ngem iti kinapudnona malidlidayak, isut’ gapuna a rinugiak ti nagay-ayam iti bingo. Kalpasanna nangsapulak kadagiti dadduma nga ay-ayam a ginnasatan. Naragsakka no adut’ kuarta iti bulsam ket sisasaganaka nga agay-ayam.” Sabali pay a nairuamen a sugador, a nakapukaw ti trabahona kas direktor ti kompania, ti napagsaludsodan no napanunotnan nga isardeng ti bisiona. “Isardeng?” insungbatna. “Diak maaramid dayta. Daytat’ biagko.”

Nupay nagduduma ti motiboda, pudno nga adu dagiti sugador. Mabalin a nasurok wenno kurang a 3 iti 4 a nataengan nga Americano ti agsugal; ti kaaduda idiay España, sabali pay a pagilian a sadiay nasaknap ti sugal, umasping met. Ket dakkel a negosio ti sugal. Sumagmamano laeng nga industrial a korporasion iti lubong ti makalab-aw iti nagupgop a paglakuan ti loteria kadagiti 39 a pagilian.

Nalawag a napigsa ti pangawis ti sugal. Ngem di kadi makadangran a pagragsakan dayta, wenno gutugotenna dagiti nalimed a peggad? Mamakdaar ti maysa a proverbio idi ugma: “Ti sigaganat a bumaknang dinto agtalinaed nga awan basolna.” (Proverbio 28:20) Pudno kadi daytoy kadagidiay a bumaknang babaen iti panagsugal?

[Footnote]