Ti Dakes a Supapak ti Panagsugal

Nasarakan a natay ni Bobby iti maysa a kotse a nakaparada iti maysa a kalsada iti amianan idiay Londres. Agtawen laeng iti 23, isut’ nagbekkel.

Natnaturog iti nabayag bassiten iti kalkalsada ti lakay sakbay a nagparang iti pagaywanan. Isut’ nakakapkapsut, ta di nangnangan iti uppat nga aldawen, ken di nakatomar iti agasna maipaay iti sakit ti puso.

Ni Emilio, ama iti lima, malidliday. Isut’ pinanawan ti asawana ken annakna. Ita dida pay kayaten a kasao.

MAYSA a nagbekkel, walang, ken mailaklaksid nga ama: tallo a nakalkaldaang a kaso, a nalawag a di nadakdakamat ngem gagangayen iti agdama a kagimongan. Ngem tunggal trahedia adda nagpapadaanda—pannakaadikto iti sugal. Adu a napeklanen a sugador dida aminen nga adda parikutda, ket masansan nga ilimed dagiti miembro ti pamilia ti parikut tapno liklikan ti pakaibabainan iti kagimongan. Ngem inaldaw minilion a sangakabbalayan iti sangalubongan maipasangoda iti danag ken pannakaupay gapu itoy a makadangran a pannakaadikto. Awan ti makaammo no mano dagiti napeklan a sugador. Para iti Estados Unidos, kalalainganna ti pattapatta a sangapulo milion. Nakaam-amak ti bilang ket umad-adu iti sadinoman bayat nga umadu dagiti gundaway nga agsugal iti nagduduma a pagilian. Ti napeklanen a panagsugal nadeskribir a kas “ti kapapartakan nga umadu a pannakaadikto.” Adu kadagiti baro nga adikto nangrugida a gagangay laeng a sugador nga agtarigagay a “mangpadas laeng no mangabakda.” Inton agangay naringbawandan iti pannakaadikto iti sugal.

No Saanen a Mamedmedan ti Panagsugal

Aniat’ mamagbalin kadagiti mammano nga agsugal a napeklan a sugador? Nagduduma dagiti makagapu, ngem no maminsan, adda tiempo a marikna dagiti sugador a dida agbiag no saanda nga agsugal. (Kitaenyo ti kahon iti panid 7.) Maparagsak ti dadduma iti sugal isu a dida masarakan iti biagda. Inlawlawag ti maysa a sugador: “Awan aniamanna kaniak no mangabakak wenno maabakak. No pumustaak, nangnangruna no dakdakkel ti pustak ngem dagiti adda iti aglawlawko, mariknak a siak ti kapatgan a tao iti lubong. Raemendak dagiti tao. Maragsakanak!”

Daddumat’ agsugal gapu ta malidliday wenno malmaldaangda. Ni Ester, ina ti uppat, naasawaan iti soldado a masansan nga adayo iti pagtaengan. Isut’ malidliday ket rinugianna ti nagay-ayam iti slot machine kadagiti lugar a pagliwliwaan. Di nagbayag, agay-ayamen iti sumagmamano nga oras iti inaldaw. Insugalna ti amin a kuartana, ket immadu ti parikutna. Inlimedna ti panangisugalna iti kuartana iti asawana bayat nga ikagkagumaanna ti umutang iti banko ken kadagiti dadduma a tao tapno taginayonenna ti inaldaw a 200 a doliar a pannakaadiktona.

Adda met ti pannakaigamer a ginargari ti dakkel nga inabak. Ilawlawag ni Robert Custer, maysa nga autoridad iti napeklan a panagsugal: “Kaaduanna dagidiay mangabak a dagus ken kanayon a mangabak iti panagsugalda ti agbalin a napeklan a sugador.” Kalpasanna, ti tarigagayda nga agtultuloy a mangabak ringbawanna idan.

Nasikap a Silo ti An-anito

Adu a sugador ti maawis babaen iti rikna imbes a ti panagrason. Ti basta panangpanunot iti pagdaksanna lapdanna ti agbalinto a sugador no paidalan laeng iti panagrason. Tapno iyilustrar, idiay Estados Unidos, ti tsansa a makimat ket agarup 1 iti 1,700,000. Ti panangabak iti loteria ti gobierno ket mamindua a daras a narasrasay pay.

Sinot’ manginanama a makimat? Ti laeng napeklanen a managduadua. Kaskasdi, dandani tunggal maysa a gumatang iti tiket ti loteria arapaapenna a mangabak ti numero a pinustaanna. Pudno nga ad-adda a makaawis ti panangabak iti loteria, ngem ti makagapu nga adut’ manginanama iti mapagduaduaan isut’ an-anito. Ti panangpilida iti “suerte a numeroda” ti mangallukoy kadakuada a mangabakda nupay mammano a mapasamak dayta.—Kitaenyo ti kahon iti panid 8.

Ni Claudio Alsina, maysa a matematiko a Kastila, impakitana a no mangusar dagiti casino ken dagiti loteria kadagiti letra imbes a numero kadagiti ay-ayam a ginnasatan, agpareho dagiti gundaway a mangabak, ngem ti panangallukoyna—ken ti kaadu ti sumrek a kuarta—mabalin a mapukaw. Kasta unay ti pangawis dagiti dadduma a numero. Ti numero 9, 7, 6 ken 0 isu ti kaykayat dagiti dadduma, ket dadduma pilienda ti “suerte a numeroda” manipud kadagiti kasangay wenno panangbasa ti horoscope. Ket adda met dagidiay idalan ti karkarna a pasamak.

Maysa nga aldaw maysa a lalaki ti nasdaaw a makabusor idi umadani iti casino idiay Monte Carlo. Maysa a kalapati ti nanglugit iti kallugongna. Dayta met laeng nga aldaw nangabak iti $15,000. Gaput’ patienna a ti lugit ti kalapati ket nasayaat a partaan, pulos a saanen a simrek idiay casino no saan nga agpasiar pay iti ruar a manginanama a makaawat iti sabali pay a “pagilasinan manipud langit.” Gapuna, ti an-anito allilawenna dagiti adu a sugador a mangipagarup a saanto a pulos nga agpatingga ti panangabak. Nupay kasta, daytoy masansan a mapakuyogan ti awanan-asi a panangpetpet ti rikna a mangtengtengngel kadakuada ti mangirubo kadakuada kamaudiananna.

Maigapu iti Ayat iti Kuarta

Agsugal dagiti tao tapno mangabakda iti kuarta, adu a kuarta no mabalin. Ngem iti biang ti napeklanen a sugador, ti abakenna a kuarta addaan naisangsangayan a pangawis. Iti panangmatmatna, kas inlawlawag ni Robert Custer, “napateg ti kuarta. . . . Pannakipagayam ti kuarta. . . . Agas ti kuarta.” Ket apay a nakapatpateg ti kuarta kenkuana?

Iti ummong dagiti sugador, dayawen dagiti tao ti adut’ abakenna ken adut’ gastuenna. Kaykayatda a pakikaduaan. Gapuna, ibaga ti kuarta nga inabakna iti sugador nga isut’ natan-ok, isut’ nalaing. Ti kuarta ti mamagbalin kenkuana a makalipat kadagiti parikutna, mangpagin-awa kenkuana, ken ad-adda a mangparagsak kenkuana. Kadagiti sasao ti managsirarak a ni Jay Livingston, dagiti napeklan a sugador “agpannurayda iti panagsugal a mangibanag kadagiti amin nga emosional a kasapulanda.” Daytat’ nakalkaldaang a biddut.

Inton agpatinggan ti kanayon a panangabakna ket maulit-uliten a maabak, napatpateg manen ti kuarta. Itan kasta unayen ti panagreggetna a mangbawi iti abakna. Kasanot’ pananggun-odna iti umdas a kuarta a pagbayad kadagiti nakautanganna, tapno mangabak manen? Inton agangay agtungpalen ti biagna iti kankanayon a panangsapul iti kuarta.

Pudno dayta a nakalkaldaang a kasasaad kadagiti minilion a sugador. Dagitoy ket babbai ken lallaki, manipud iti amin nga edad, ken manipud iti amin a kasasaad ti panagbiag. Ket ti asinoman mabalin a nalaka a maallukoy, kas makita iti nabiit pay a yaadu ti pannakaadikto iti panagsugal kadagiti tin-edyer ken agtagibalay.

Dagiti Adikto a Tin-edyer ken Agtagibalay

Dagiti agtutubo ti nalaka a biktima dagiti makaawis nga slot machine wenno dadduma pay nga ay-ayam a ginnasatan a mangipanamnama iti dagus a pakagun-odan iti kuarta. Maysa a surbey iti maysa a siudad idiay Inglatera ipalgakna nga uppat iti lima a 14-años ti kankanayon nga agay-ayam kadagiti slot machine ket kaaduanna ti nangrugi iti edad a 9. Daddumat’ aglangan idiay eskuelaan tapno agsugal. Maysa a surbey kadagiti estudiante ti high school iti E.U. impalgakna nga 6 porsiento “ti addaan iti pakakitaan iti di magawidan a panagsugal.”

Ni Manuel Melgarejo, presidente ti maysa a grupo dagiti tao a nakasursuro a mangtulong iti bagbagida a buklen dagiti dati a sugador iti Madrid, España, inlawlawagna iti Agriingkayo! a ti maysa a nalaka a maallukoy nga agtutubo ket mabalin a masiluan babaen iti panangabak iti maminsan laeng a nawadwad a jackpot iti slot machine. Iti apagkanito, agbalinen a pagliwliwaan ken paggarteman ti panagsugal. Inton agangay, ti agtutubo nga adikto mabalin nga agilaklakon kadagiti napateg a tawid ti pamilia wenno takawanna ti pamilia, ken agtakaw pay saggabassit wenno agbalangkantis tapno adda magastona iti pannakaadiktona.

Madmadlaw met dagiti eksperto ti dakkel a yaadu dagiti agtagibalay a napeklan a sugador. Idiay Estados Unidos, kas pangarigan, itan dagiti babbai ket agarup 30 porsiento iti nakagupgopan a bilang dagiti napeklan a sugador, ngem napattapatta nga inton tawen 2000, daytoy immadunton iti 50 porsiento.

Ni María, maysa nga agtartrabaho nga ina ti dua a babbai, ti pangarigan dagiti adu nga agtagibalay a nagbalin a napeklan a sugador. Iti napalabas a pito a tawen, binusbosna ti $35,000—a kuarta ti sangakabbalayan—iti bingo ken kadagiti slot machine. “Napukawen iti agnanayon ti kuarta,” insennaayna. “Tarigagayak nga agsubli dagidi aldaw a makapanak iti maysa a pagkapean nga addaan iti $50 iti pitakak ken gastoek dayta a maipaay kadagiti annakko [imbes nga itinnagko iti slot machine].”

Dagiti Tagainep a Nagbalin a Batibat

Naibangon ti sugal kadagiti tagainep. Kadagiti dadduma a sugador, dagiti tagainep a kinabaknang ket apagkanito laeng, ngem iti napeklan a sugador, dagitoy ti pagreggetanna, maysa a pagreggetan nga ikagkagumaanna a gun-oden, agingga a malugi, maibalud, ken uray pay matay. Ti sugal ikarina a penneken dagiti nainkalintegan a kasapulan—maysa a maanamongan a pagliwliwaan, pakaragsakan, kanayonan a kuarta, wenno pangiliwliwagan iti inaldaw a pakadanagan—ngem ti nalimed a supapakna mabalin a nakangatngato, a naammuan dagiti napeklan a sugador isu a pagleddaanganda. Adda kadi sabali pay a pakapennekan dagitoy a kasapulan iti sadinoman?

[Kahon iti panid 7]

Ladawan ti Napeklan a Sugador

TI SUGADOR itultuloyna ti agsugal uray nakaad-adu ti abakna. No mangabak, itultuloyna nga isugal ti kuartana. Nupay kunaenna a mabalinna ti agsardeng no kayatna, ti napeklan a sugador nga addaan kuarta mapalabesna laeng ti sumagmamano nga aldaw a saan a pumusta. Isut’ nairuamen nga agsugal.

Isut’ kanayon nga umutang. No di makabayad kadagiti nakautanganna, ikagumaanna ti umutang ti ad-adu a kuarta tapno mabayadanna dagiti utangna ken tapno agtultuloy nga agsugal. Inton agangay agkusiten. Mabalin nga isugalna pay ti kuarta ti amona. Gagangay, isut’ maikkat iti trabahona kamaudiananna.

Ti isuamin, uray pay ti asawana ken annakna, tumulokda iti panagsugalna. Ti pannakagargarina kapilitan nga agturong iti panagapada nga agassawa ket kamaudiananna agbanag iti panagsinada wenno diborsio.

Ti nakaro a pannakarikna iti basol ti mamagbalin kenkuana a managbabain. Isut’ marigatan a makilangen kadagiti dadduma a tao. Kamaudiananna, isut’ agsagaba iti nakaro a panagliday ken mabalin a gandatenna pay ti agbekkel; awan sabali a makitana a solusion ti parikutna.

[Kahon/Ladawan iti panid 8]

Ti Lalaki a Dakkel Unay ti Inabakna Idiay Monte Carlo

NI Charles Wells, maysa nga Ingles, napan idiay casino ti Monte Carlo idi Hulio 1891. Iti las-ud laeng ti sumagmamano nga aldaw, napagbalinna a maysa a milion ti sangapulo ribo a francs, ket nakaskasdaaw, inulitna dayta uppat a bulan laeng kalpasanna. Adu a sugador ti nangpadas a mangammo ti “pamay-anna tapno mangabak” ngem awan ti naaramidanda. Kanayon nga ipilpilit ni Wells a di pulos nangab-abak. Kinapudnona, iti sumaganad a tawen napukawna ti amin a kuartana, ket natay nga awan a pulos ti kuartana. Maisupadi ketdi, ti pasamak ket maysa laeng a pangawis iti casino. Dayta nagun-odanna ti internasional a kinalatak a dina pulos napukawen.

Ti Kinaulbod ti Monte Carlo

Mamati dagiti adu a sugador a dagiti slot machine wenno rueda a roleta adda memoriada. Gapuna, ti managay-ayam iti roleta mabalin a pagarupenna a no agsasaruno a rummuar ti isu met laeng nga agsasaganad a numero, mabalin a kaykayat ti rueda dagiti numero a kapada dayta a panagsasaganad. Umasping iti dayta, dadduma nga agay-ayam kadagiti slot machine ti mangipagarup a no saan a maala ti jackpot iti sumagmamano a tiempo iti naituding a makina, daytat’ rummuarton di agbayag. Dagita a biddut a pagarup ti maawagan kinaulbod ti Monte Carlo.

Agpadpada nga agpannuray iti tsansa ti rueda ti roleta ken ti mekanismo a mangipaay iti jackpot iti slot machine. Gapuna mabalin nga awan ti pakainaigan ti napasamak a nasaksakbay. Kadagitoy nga ay-ayam a ginnasatan, kas ipaganetget ti The New Encyclopædia Britannica, “tunggal ay-ayam kabaelanda ti mangpataud iti isu met laeng a resulta kas kadagiti dadduma iti naituding a tiempo.” Gapuna kasla agpapada ti pannakaabak. Ti kinaulbod ti Monte Carlo, nupay kasta, pinirdina dagiti adu a sugador bayat a pinunnona ti kaha dagiti casino.