Rebbeng Kadi nga Agsugal Dagiti Kristiano?

REBBENG kadi nga agsugal ti maysa a Kristiano tapno magun-odna ti banag a dina nagbannogan? Saan, ta paregtaen ti Sao ti Dios nga agtrabaho a mangipaay iti bagina ken iti pamiliana: “‘No adda madi nga agtrabaho, di met koma mangan.’ . . . Nga agtrabaho a sitatalna ken kanenda ti tinapayda met laeng.”—2 Tesalonica 3:10, 12.

Inawagan ti maysa a sosiologo ti loteria a ‘pamay-an a panangpabaknang dagiti adu a napanglaw iti sumagmamano a tao,’ ket kaaduanna pudno daytoy iti sugal. Tarigagayan kadi ti maysa a Kristiano a pabaknangen ti bagina babaen ti nagbannogan dagidiay napanglaw? Rebbeng nga ‘ayaten [dagiti Kristiano] ti padada a tao a kas iti bagida.’ (Marcos 12:31) Ngem ti sugal tignayenna ti kinaagum imbes a ti ayat, panangidumduma imbes a panangngaasi. Ti sugal masansan a tignayen ti kinaagum—kinabuklis—maysa nga espiritu a maikontra iti Kinakristiano. Idiay Roma 7:7, kinuna ni Pablo: “Dika agagum.” Ti sao nga “agagum” kaipapananna “tarigagayan, garteman.” Saan kadi a deskribiren dayta ti kasta unay a panagtarigagay ti sugador a mangabak iti kuarta ti padana a tao? Dayta a tarigagay ket maikontra iti pagalagadan ti Kristiano a panangiraman ken panangited. Kunaen ti Biblia: “Ti ayat ti kuarta isu ti ramut dagiti amin a kita dagiti makaranggas a bambanag, ket gapu iti panagtarigagay a gumun-od itoy nga ayat dagiti dadduma . . . nasalputda kadagiti adu a ladladingit.” (1 Timoteo 6:10) Daytoy deskribirenna ti kasasaad ti napeklan a sugador, nga inadipen ti ugali a nakasasaem a nangsalput a maulit-ulit kenkuana. Kinuna ni Jesus a mailasin dagiti tao babaen “kadagiti bungada.” (Mateo 7:20) Malaksid iti rigat a sagabaen ti napeklan a sugador ken dagiti pamiliada, ti sugal nabayagen a nainaig iti kinakusit ken krimen. Kuna ti The New Encyclopædia Britannica: “Adu a pakaibabainan a nainaig iti sugal nagtaud iti kinakusit dagiti manangitandudo iti dayta.” Ti naiplano a krimen nainaigen agpadpada iti legal ken di legal a panagsugal. Tarigagayan kadi ti maysa a Kristiano a suportaran daytoy nga industria no la ket saan nga agsugal a mismo?

Kas nailawlawag iti maikadua nga artikulo daytoy a serie, ramanen ti panagsugal dagiti naanituan a panangsapsapul kadagiti suerte a numero, suerte nga al-aldaw, wenno suerte a kababalin. Inuy-uyotanen dagiti sugador ti Diosada iti Gasat iti adu a siglo a magagaranda a manggun-od iti kaasina. Isut’ inawagan dagiti Romano a Fortuna, ket ti siudad ti Roma naaddaan kamaudiananna kadagiti 26 a templo a naibangon a pakaidayawanna. Tinukoy ni mammadto Isaias ti umasping a diosa, a maawagan gadh, a daydayawen dagiti apostata nga Israelita. Insuratna: “Ngem dakayo a nangidian ken ni Jehova, . . . a nangsagana iti maysa a lamisaan a maipaay iti dios ti Naimbag a Gasat [Hebreo, gadh].” (Isaias 65:11) Iti maudi nga aldaw ti tawen, kaugalianen ti agsagana ti maysa a lamisaan a napunno iti nagduduma a taraon a maipaay iti dios ti Naimbag a Gasat. Iti kasta inanamaen dagiti tao idi ugma a patalgedan ti naimbag a gasatda bayat ti umay a tawen. Di inanamongan ti Dios dagidiay a simamaag a nagtalek iti gadh, wenno Diosa ti Gasat, a mangsolbar kadagiti parikutda. Ti panagpannuray iti gasat ket katupag ti panangbaybay-a iti pudno a Dios, ni Jehova. Imbes nga agdayaw ken agpannuray iti agbaliwbaliw a pagayatan ti Gasat, rebbeng nga agtalek dagiti Kristiano iti pudno a Dios, ni Jehova, Daydiay a mangikari kadatayo iti kinabaknang a napatpateg, Daydiay a di pulos mangpaay kadatayo.