Manipud Managbasatayo

Diborsio Dagiti artikuloyo a “Diborsio—Ti Sagabaen ti Tao” (Pebrero 8, 1992) tinignaynak nga agsurat. Idi 1988, indiborsionak ti kaingungotko idi segundariaak kalpasan ti uppat a tawen a panagasawa. Nalabit nga inkagumaak koma a sinalbar ti panagasawak no naammuak idin ti ammok ita. Ti diborsio dadaelennaka iti pinansial. Ket nupay no saneben dagiti naasawaan a lalaki dagiti diborsiada, dagiti babbaro karurodda dagiti babai nga addaan annak. Mabalin nga ideytdaka, ngem saanda a napasnek. Pudno nga inanamaek nga isalakan daytoy nga artikulo ti uray maysa laeng a panagasawa; diak maisalbar ti panagasawak.

T.R., Estados Unidos

Ti puntoyo nga adda nasaem a pagbanagan ti diborsio, uray no adda nainkalintegan a pakaibatayanna, bigbigek a naimbag. Masansan a mariknak nga aglanglanguyak iti baybay ti panagladingit. Ti panaglabas ti tiempo, dagiti kankanayon a naespirituan nga ar-aramid, ken ti nadungngo nga asi ni Jehova ti nangkissay ti masansan ken kinadagsen dagitoy a naririkut a pagladingitan.

M. H., Estados Unidos

Agimtuod dagiti Agtutubo Pagyamanan ti artikuloyo nga “Agimtuod dagiti Agtutubo . . . Kadawyan Aya ti Panagbalin a Birhen?” (Marso 22, 1992) Idinto ta adu ti mangkatawa kaniak ken sutilendak gapu iti panangtaginayonko ti kinabirhenko, nangrugiak nga agduadua iti daytoy a banag. Ngem daytoy nga artikulo ti nanglukat kadagiti matak. Naikeddengko a taginayonek ti pisikal ken emosional a pagsayaatak, ken kangrunaanna, ti nasayaat a relasionko iti Dios.

A. R., Brazil

Inapresiarko ti artikulo nga “Agimtuod dagiti Agtutubo . . .” nga “Apay a Diak Makadua Ida?” (Oktubre 22, 1991) Dimteng dayta iti tiempo a mariknak ti pudno a panagliday gapu ti diak pannakikadua kadagiti kabaddungalak. Mabalinko nga ibaga iti agtutubo a nagkuna, ‘No dika agusar ti maiparbeng a tennis a sapatos, dika maikadua,’ gapu ta awan ti kuartak a panggatang kadagiti amin a kawes a kayatda. Tinulongannak ti artikuloyo a mangmatmat a saanak nga agsolsolo.

K. M. S., Estados Unidos

Pagyamanan ti artikulo nga “Agimtuod dagiti agtutubo . . . No Ngay Napanglaw ti Pamiliak?” (Enero 22, 1992) Agpapan pay saanak a maysa nga agtutubo ken saan met a talaga a napanglaw, natulongannak daytoy nga artikulo. Ti asawak ken siak ket naglasat ti adu a naririgat a panawen. Kasla awan panginanamaan kadagiti bambanag ta diak makakuti. Tinulongannak ti impormasion a mangutob a dagiti negatibo a pampanunot pakaruenna laeng dagiti bambanag. Nasaysayaat ti panagibturko itan.

K. J., Estados Unidos

Inca Kalkalpasko pay laeng a binasa ti artikulo a “Panangmatmat iti Nabalitokan a Tiempo dagiti Inca.” (Enero 22, 1992) Agtawenak iti 15, ket ti panangadal kadagiti immun-una a sibilisasion ti Columbia idiay Makin-abagatan nga America kankanayon a pagsikurennak. Makapainteres la unay ti artikuloyo, nabagas, ken naigiddiat kadagiti dadduma a nabasakon. Daytoy a kita ti material tulongannakami a mangpaadu ti pannakaammomi kadagiti nagduduma a suheto iti praktikal ken makaliwliwa a pamay-an.

D. A. S., Argentina

Saksakit iti Pannangan Pagyamanan ti artikulo a “Panangtulong kadagidiay Addaan Saksakit iti Pannangan.” (Pebrero 22, 1992) Ti kasingedan a gayyemko kanayon nga agreklamo gapu iti timbangna. Agdagsen laeng ti 45 a kilo wenno ad-adu pay, ket mamindua ti bagik iti bagina! Pudno a mababainak iti kalukmegko. Pinadasko ti amin a kita ti panagdieta ngem awan kuentana. Nakabasbassiten ti panagraemko iti bagik gapu iti kinabakarkon. Natulongannak ti artikuloyo a mangibangon ti sangkabassit a panagraem iti bagik.

P. M., Estados Unidos

Nawayawayaanak iti nairut a panangmesmes ti bulimia iti agarup dua a tawenen. Ti inaldaw a panangrekonoser ti asawak, ken ti kankanayon a panagkararag ken Jehova, ti nangtulong kaniak a limmapsut. Sabali pay a nakatulong isu ti kaadda dagiti makapasalun-at a taraon kas kadagiti prutas ken natnateng idiay kusinak imbes a dagiti sitseria. Anian a nakaskasdaaw ti sam-it ti peach a maramanan no insardengmon ti mangan kadagiti sitseria!

S. G., Estados Unidos