Manipud Managbasatayo

Pannakidangadang iti Sakit Kayatko nga iyebkas ti panangapresiarko iti kapadasan ni Hans Augustin iti artikulo a “Ti Pannakidangadangko nga Agbiag” (Abril 22, 1992) Agsagsagabaak iti nakapuy a salun-at, ngem diak pay pulos nagparikut iti dakkel a kas kenkuana. Naipalagip kaniak ti estoria ti maysa a lalaki a nangipagarup a dakes ti kasasaadna agsipud ta awan ti sapatosna—agingga a nakakita ti maysa a lalaki nga awan ti sakana! Aniaman ti kasasaad, para kaniak, ti estoria ti panagsagaba ni Hans Augustin ket makapabileg unay iti pammati, ket dagiti kararagko ti mangtarabay kenkuana.

A. M. M., Estados Unidos

Nagsagabaak iti sakit ti ulo, panagpipikel ti makin-kanawan nga ima ken sakak, kumapkapuy a panagkita, ken kankanayon a pannakaulaw. Naddaanak iti CT scan, ngem awan met ti naipalgak a pagdanagan. Naglidayak gapu ta bassit laengen ti maaramidak a panagserbi iti Dios. Maladingitanak met no panunotek ti masanguanan. Nupay kasta, pinaregta ni Hans Augustin dagiti managbasa nga ipamaysada ti panunotda kadagiti naespirituan nga alagaden, ket kayatko a tuladen ti positibo a panangmatmatna. Nakaiskediol ti ad-adu pay a pannakaeksaminko, ngem aniaman ti resulta ti pannakaeksamin, natulonganak a mangmatmat iti masanguanan ken makidangadang iti an-anayen.

K. T., Japan

Lubong ti Komersio Maysa nga ababa a surat ti panangapresiar kadagiti serie “Ti Irarang-ay ken Pannakarbek ti Sangalubongan a Komersio.” (Enero 8–Marso 22, 1992) Ninamnamak a narigatda a maawatan, ngem nasarakak a nakasaysayaat ti pannakaisuratda, naglakak a maawatan ida. Naan-anay a tinagiragsakko dagiti serie.

D. H., Estados Unidos

Saksakit iti Pannangan Agyamanak ti kasta unay kadakayo iti panangiyimprentayo ti artikulo a “Panangtulong kadagidiay Addaan Saksakit iti Pannangan.” (Pebrero 22, 1992) Tinulongannak kamaudiananna a mangamin nga agsagsagabaak ti sakit iti pannangan. Iti damdamo unay, naawatak a saan a taraon ti parikutko no di ket dagiti dadduma nga isyu, kas iti biag ti pamiliak. Ti sakitko pinagbalinna a narikut dagiti adu a paset ti panagbiagko, agraman ti karerak iti ministerio. Nanipud idi nabasak ti artikulo, rinugiakon ti kasta unay a panagsirarak, ket mabigbigko a nawatiwat ken narigat ti sangsanguek a panagimbag. Ngem ti pannakaammo a naasi ken managayat ni Jehova ket dakkel a tulong kaniak.

J. S., Estados Unidos

Agtawenak ti 15 ket nagsagabaak ti sakit iti pannangan sumagmamano a tawen itan. Nanipud pay idi nabasa ni nanangko ti artikulo, isut’ ad-adda a mannakaawat ken manangtarabayen iti umiso a pamay-an. Mariknak a matengngelkon ti biagko, ket kunaek nga apresiarek unay dagiti artikuloyo. Kankanayon a dagita ti kasapulak.

M. G., Estados Unidos

Kinabirhen Agyamanak iti artikulo nga “Agimtuod dagiti Agtutubo . . . Apay Agtalinaed a Birhen?” (Abril 22, 1992) Nagsangitak idi nabasak dagiti sasao ti maysa a 14-años a balasitang a napukaw ti kinabirhenna babaen ti pannakiabig. Kinapudnona, kastaak met. Uray kasta unay ti panagsangit pulos a di umdas dayta a mangipakita ti panagbabawik kas maysa a Kristiano iti diak panangsalimetmet iti kinabirhenko. Idi naammuan ni tatangko, daytat’ damdamo unay a pannakakitak kenkuana a nagsangit. Ket uray no siaasi a mamakawan ti Dios, kankanayon a malaglagipko, ket agarubos manen dagiti luluak. Ania koma a nagsayaaten no salimetmetan ti maysa ti kinabirhenna imbes nga apitenna dagiti dakes a resulta iti panagbalin a nagay-ayaman laeng ti maysa a tao.

I. M., Japan

Maysa a balasitang idiay eskuelaan namin-anon nga insingasingna kaniak a makidennaak kenkuana, ngem kankanayon a nagkedkedak. Kas banagna, pinabasolnak a maysaak a homoseksual. Ti artikuloyo pinabilegna ti pammatik a nasayaat a banag ti kinabirhenko. Gapu iti dayta, ad-adda nga agballigiakto iti panagasawa ngem ti maysa a nalulok iti sekso.

D. L., Estados Unidos