Manipud Managbasatayo

Hormones Inapresiarko ti artikulo a “Hormones—Dagiti Nakaskasdaaw a Mensaheros ti Bagi.” (Abril 22, 1992) Nagballigikayo a nangdeskribir iti kapapatgan ken karirikutan kadagiti amin a banag a mangtaginayon-biag kadagiti simple a sasao. Ad-adda pay a maapresiarko ti Namarsua iti nakaskasdaaw a bagitayo gapu iti pannakaammo kadagitoy a banag!

L. F., Italia

Nasarakak a makatulong unay ti artikulo, ta karugrugik pay laeng nga adalen daytoy a tema idiay eskuelaan. Nagsayaatan ti pannakaaramid ti artikulo ken naiparang iti pamay-an a nalaka a maawatan ti panagandar dagiti hormone. Pudno a maysa a makaisuro a magasin ti Agriingkayo!

D. A. J., Côte d’Ivoire

Ti gayyemko, a maysa a Saksi ni Jehova, kankanayon nga ikkannak iti literaturayo. Naisangsangayan ti panaginteresko iti artikuloyo maipapan iti hormones. Maikadua a tawenkon iti panagsanay nga agbalin a nars, ket ad-adalenmin ti hormones, naay-ayoak a nangnangruna ta nagun-odak ti artikuloyo. Agyamanak unay ta nasarakak dagiti Saksi ni Jehova.

Y. L., Alemania

Curfews Adda nagimbagan ti artikuloyo nga “Agimtuod dagiti Agtutubo . . . Apay a Nasken nga Agawidak a Masapa?” (Mayo 8, 1992) Ugalikon ti adda pay laeng iti ruar iti rabrabiin ket agin-inayadakto a sumrek iti balay—a masarakakto pay laeng ni nanangko nga agur-uray kaniak idiay beranda. No dadduma aglulua nga agunget kaniak. No lagipek ti napalabas, pagbabawiak iti kinasukirko. Ammokon a siasinoman a di mangipangag iti balakad ni Jehova ket pudno nga agsagaba iti didigra.

T. A., Japan

Kinabirhen Pagyamananmi ti artikulo nga “Agimtuod dagiti Agtutubo . . . Kadawyan Aya ti Panagbalin a Birhen?” (Marso 22, 1992) Malagipko a sursuronendak a kanayon dagiti kaklasek, nga im-imtuodenda no nakidennaakon. Uray ita, ang-angawendak dagiti katrabahuak idi naammuanda a kondenaren ti Biblia ti pannakidenna sakbay ti panagasawa. Nupay kasta, ti nalulok a kababalin agbanag iti di tartarigagayan a panagsikog ken dagiti saksakit nga iyakar ti sekso. Maysa a salaknib ti panangsurot kadagiti prinsipio iti Biblia a mangliklik iti pannakidenna sakbay iti panagasawa.

G. I. I. L., Brazil

Agtawenak iti 17 ket agbalinakton nga ina. Diak impangag ti balakad ti Biblia. Pudno a nagpanunotak idi nabasak ti artikulo. Pulos a diak minatmatan ti kinabirhen a kas ‘pakaidayawan.’ Ita tarigagayak nga impangagko koma ti balakad ti Biblia.

M. R., Estados Unidos

Agyamanak unay iti artikulo nga “Agimtuod dagiti Agtutubo . . . Apay Agtalinaedak a Birhen?” (Abril 22, 1992) Iti naganus pay nga edad, nagsusublat dagiti awan mamaayna a pannakirelasionko, a sapsapulek ni ayat. Kasta unay ti pannakapaayko iti adu a tawen. Di mapanunot ti kasta unay a basol, pannakaibabain, ken leddaang a sinagabak kadagidiay amin a tawen. Bayat a basbasaek ti footnote nga inkabilyo iti panid 27 maipapan iti pammakawan ti Dios, dandani diak magawidan ti kasta unay a ragsak ken naimpusuan a panagyamanko iti Dios.

A. M., Estados Unidos

Nakaskasdaaw nga Insekto Adtoy ti ababa laeng a surat a mangiyebkas iti panangapresiarko iti artikulo a “Dagiti Nakaskasdaaw nga Insekto Babainenda dagiti Lugan ti Tao iti Tangatang.” (Mayo 22, 1992) Agtartrabahoak iti dibision ti panagsirarak iti maysa a moderno-teknolohiana a kompania, ket nakalawlawag ti kinatangsit ti tao kadagiti naaramidanna. Nupay kasta, dagiti kinarikut ti nakaparsuaan, mammano a mabigbigda a kas ar-aramid ti Namarsua. Naminsan a nangngegko ti dua a sientista nga agsarsarita maipapan iti geometriko a kinapintas ti bukel ti kayo nga eucalyptus. Ti konklusionda? “Saan kadi a nakaskasdaaw ti Nakaparsuaan?” Pudno a nabulsek ti isipda.

P. G., Estados Unidos