Manipud Managbasatayo

Pannakasabidong iti Buli Kalkalpasko a binasa dagiti artikulo a “Pannakasabidong iti Buli​—Agpegpeggadkayo Kadi ken dagiti Annakyo?” (Nobiembre 22, 1992) ket pagyamanan iti naintiempuan, ken natimbeng nga artikuloyo. Inanamaek nga agipablaakkayto iti umasping nga artikulo maipapan ti pannakainaig ti aluminum iti sakit nga Alzheimer.

D. C., Canada

Daytoy nga isyu ket apagbiit a nadakamaten iti artikulo a “Polusion​—Sinot’ Mamataud iti Dayta?” iti Mayo 8, 1990 a ruarmi.​—ED.

Buridek Agtawenak iti 13 ken buridek iti lima nga annak. Ti artikulo nga “Agimtuod Dagiti Agtutubo . . . Apay a Nagbalinak a Buridek?” (Oktubre 8, 1992) ket maapresiar unay. Ti riknak ket maiyasping unay iti dadduma kadagiti ubbing a dinakamatyo, ken manginanamaak a daytoy nga artikulo gunggonaannanto ti intero a pamiliak. Pagyamanan iti panangtultulongyo kadakami nga agtutubo.

C. M., Estados Unidos

Maikaduaak kadagiti tallo nga annak, ngem dagiti riknak ket iladawan ti kaaduan iti kinuna ti artikulo. Mariknak met a kasla siak ti madusdusa kadagiti kamali ni manongko. Alas nuebe ti naited kaniak a curfew gapu kenkuana. Agkakuartokami ken adingko, ket diak unay makapagsolsolo. Kaskasdi, agyamanak ta maikaduaak iti tallo nga annak, nga addaan manong a mangisuro kaniak ken ading a suruan. Diak pulos nga agmaymaysa. Isu a pagyamanan iti panagsuratyo iti kasta nga artikulo; saanak man a buridek ngem nagunggonaanak iti dayta.

N. R., Estados Unidos

Im-Ima Bayat a binasak ti artikulo a “Dagiti Makaawis nga Im-imatayo” (Agosto 8, 1992), diak maliklikan a di mingmingan dagiti imak. Ita pay laeng a naapresiarko a nakaskasdaaw dagitoy a katulongan nga impaay ni Jehova kadatayo. Apay pay laeng a patien ti dadduma a dagiti tao ket gapuanan ti ebolusion? Patiek nga adunto ti mangbalbaliw iti kapanunotanda inton mabasada daytoy nga artikulo.

E. M., Brazil

Iron Lung Agar-arubos ti luak nga agsurat kalpasan a nabasak ti pakasaritaan ni Laurel Nisbet nga “Uray Pay ti ‘Iron Lung’ Di Mangpasardeng iti Panangasabana.” (Enero 22, 1993) Ti pammatina ket paguadan kadatay amin. Makaparegta a basaen no kasano a ginundawayanna ti kasasaadna a nangtulong iti adu a nakaammo ken Jehova. Determinado met idi a mangitandudo iti kinasagrado ti dara ket inkagumaanna nga inlawlawag ti takderna iti doktorna, nupay agngangabiten ken patay. Naimpusuan unay ti panagyamanko iti panangipablaakyo iti kapadasanna.

Y. C., Italia

Manangbabalaw a Nagannak Naintiempuan unay dagiti artikulo ti “Agimtuod Dagiti Agtutubo . . . Apay a Didak Ikankano Dagiti Dadakkelko?” (Nobiembre 22, 1992) ken “Kasano a Tamingek ti Panangbabalaw Dagiti Dadakkelko?” (Disiembre 8, 1992). Maup-upayak gapu ta kanayon laengen nga adda pangdillawan ni tatangko kaniak. Ita, ikagumaakon nga awaten dagiti pammabalaw ken din agpauyo.

M. Z., Italia

Talaga nga agaplikar unay kaniak dagiti artikulo. Sigud a patiek a babbabalawendak dagiti nagannakko gapu ta awan umiso a maaramidak. Ti artikulo tinulongannak a mangbigbig a disiplinaandak gaput’ dungngoda ket kayatda a nasayaatto ti pagbanagak. Nanipud idi nabasak ti artikuloyo, didak unay babbabalawenen dagiti nagannakko.

S. P., Estados Unidos

Saan a Saksi ni nanangko, ken adda latta pangbabalawanna kaniak. Ngem ad-adda nga isut’ maawatakon babaen ti tulong daytoy nga artikulo. Ti nagbanagan dagiti panagreggetko? Dumngeg ken pattiennan ti iranranudko kenkuana manipud Sao ti Dios!

M. T., Filipinas