Manipud Managbasatayo
Pannakasabidong iti Buli Pagyamanan unay kadagiti artikulo maipapan iti pannakasabidong iti buli. (Nobiembre 22, 1992) Ti panangdakamatyo iti nangato a presion ti dara, sakit ti bato, panagsakit ti tian, ken panagsarua—saksakit nga adu a tawenen a sagsagabaek—ti nangtignay kaniak nga agpadoktor di la ket ta nasabidonganak iti buli. Pinasingkedan dagiti resulta nga adu unay a buli ti naurnong iti bagik. Mangnamnamaak a naballiginto ti madama a pannakaagasko.
T. W., Alemania
Nabatad nga agsirsirarakkay unay para kadagiti artikuloyo. Agtartrabahoak iti maysa nga opisina a pagsirarakan idiay Department of Organic Coatings. Iti pagilianmi, adun a tawen a maus-usar ti pintura nga addaan buli gapu iti kinaandurda iti panniempo. Ita, limitado unayen ti pannakausarda, ngem kas iti kinunayo, agtalinaed latta ti peggad ti pannakasabidong iti buli. Tinulongannak daytoy nga artikulo nga ipakita kadagiti katrabahuak a saan laeng a narelihiusuan a salsaludsod ti sungbatan ti Agriingkayo! no di ket tumulong met iti tattao a mangrisut kadagiti parikutda nupay dida manamati. Pagyamanan.
A. A., Czech Republic
Iron Lung Kayatko nga iyebkas ti kasta unay a panangapresiarko iti kapadasan ni Laurel Nisbet a napauluan “Uray Pay ti “Iron Lung” Di Mangpasardeng iti Panangasabana.” (Enero 22, 1993) Anian a nagsayaat a paguadan iti kinatured, pammati, panagandur, ken kinaregta! Adda sakitko a lupus, ngem saan unay a nakaro dagiti sagsagabaek no panunotek ti inanduran ni Sister Nisbet a panagsagaba ken ti kapautna.
R. L. H., Estados Unidos
Yantangay paralisadoak ken di makapagna, inreklamok a diak unay makapangasaba. Ita naamirisko a no daytoy a babai a nagbiag iti iron lung iti 37 a tawen ket kabaelanna ti mangasaba ken mangaramid adalan, uray siak mabalinko met ti mapnek iti kabaelak nga aramiden.
M. L., Italia
Apresiarenmi dagita a komento. Siempre, ti matalek nga ulidan ni Sister Nisbet ti saan a pulos a mangep-ep iti panagsagaba a mapaspasaran ti adu a nakarot’ sakitda nupay saan unay a mangpakapsut ngem kaskasdi a pakaigapuan ti nakaro a panagsagaba.—ED.
Tinapay Pagyamanan iti artikuloyo a “Ti Inaldaw a Taraonmi.” (Disiembre 8, 1992) Pinadasko ti tinapay a recipeyo, ket naragsakanak ta nalaka gayam ti mangaramid ti tinapay ken anian a nagimas dayta.
M. M., Estados Unidos
Adu ti librok idiay pagsalansanan maipapan iti panagluto, ngem awan recipe kadagiday a libro a nasaysayaat ngem iti recipeyo. Pagyamanan unay!
S. H., Alemania
Panangidadanes Dagiti Nazi Naparegtaak unay iti artikulo a “Didakam Mapasardeng Dagiti Nazi!” nga insurat ni Erwin Klose. (Nobiembre 22, 1992) Saan a kas kadagiti dadduma a kapadasan a naipablaaken, ti pakasaritaan ni Erwin Klose ket naisalaysay iti makapakatawa a pamay-an. Masansan a diak malapdan ti agkatawa. Naparegtaak iti naragsak ken positibo a panangmatmatna kadagiti bambanag.
T. K., Japan
Dagiti Kumbension Idiay Russia Kayatko ti agyaman kadakayo iti artikulo nga “Umuna nga Internasional a Kumbension Dagiti Saksi ni Jehova iti Russia.” (Disiembre 22, 1992) Nupay nabayagakon nga adipen ni Jehova a Dios, annugotek a ti panangapresiarko kadagiti probision ti Dios ti saan a maipadis kadagiti Kristiano idiay Russia! Ti ebkas ti rupa ti kabsat a babai idi inawatna ti damo a bukodna a kopia ti Biblia ti nangipabigbig kaniak no kasano kaadu—dagiti tinagtagilag-anko laeng. Tinulongannak ti artikulo a mangamiris kadagiti masapul a parang-ayek pay.
B. T. A., Estados Unidos