Manipud Managbasatayo
Panangpadakkel iti Anak Imbutaktak dagiti serie ti “Dagiti Annakyo—Panangaramid ti Kasayaatan Agpaay Kadakuada” (Setiembre 22, 1992) dagiti naliwayak kas maysa a naganak. Naisentro ti atensionko kadagiti personal a banag ken aktibidad ti kongregasion—isu a nabaybay-ak ti tallot’ tawenna a baritok. Nagbalin a naalikuteg. Nagbalinak met a di makatepteppel, nalaka a masuron, ken mabain a mangiyebkas iti panangdungngok. Imbes nga arakupek koma ti baritok, nagbalinak ketdi nga istrikto. Yantangay ay-ayatennatay amin ni Jehova, ikagumaakon a dungnguen ti pagpatawid nga inawatko manipud ken Jehova.
T. T., Japan
Nupay saanak a naganak, nadungngoak kadagiti ubbing, ket tinignaynak a naimbag daytoy nga isyu. Nakasangitak a nakaammo iti nakalkaldaang a parikut a sangsanguen dagiti ubbing ita. Makaisuro unay ti artikuloyo iti panangipakita ti panangsaranget kadagitoy a parikut iti nasapa unay a paset ti panagbiag tapno maliklikan dagiti makapadanag a parikut inton tawtawen ti kinanataengan.
L. B., Estados Unidos
Tinignaynak dagiti artikulo a mangusig iti bagik kas maysa nga ama. Ubingak a nangasawa ket ad-adda a paginteresak ti makikadua kadagiti gagayyemko ngem iti pamiliak. Ti panagbasak kadagiti artikulo ti nangipabigbig kaniak a diak naipaayan iti umdas a panawen ti balasitangko. Sapay koma ta dagitoy nga artikulo ti mangtignay kadagiti nagannak a mangaramid ti kasayaatan agpaay kadagiti annakda.
A. V., Italia
Sarsarita Maipapan iti Animal Pagyamanan iti artikuloyo a “Ti Capybara—Biddut Wenno Pagsidsiddaawan iti Panamarsua?” (Setiembre 22, 1992) Masansan nga ibasbasaak ti anakko kadagiti artikulo maipapan iti animal. Gapu ta ni Mr. Capybara a mismo ti agsasao, pinaragsak ti artikulo ti anakko!
C. T., Japan
Maysa a makagunggona a kasukat dagiti narugit a kita ti artikulo nga ipabpablaak ti adu a magasin! Siak ken dagiti annakko ti nangbasa a sangsangkamaysa iti dayta. Makaparagsak a maammuan dagiti baro ken nagduduma nga animal!
C. H., Estados Unidos
Pagyamanan iti artikulo a “Dagidiay Karkarna a Marsupial iti Pagilian iti Baba.” (Hulio 22, 1992) Naammuak a makapainteres unay ti panaganak dagitoy nga animal ken panangpataudda iti nagduduma a kita ti gatas. Pinagpanunotnak no kasano a ti pannakabalin ni Jehova ket nalawag a makita kadagiti parsuana!
N. S., Italia
Agtawenak iti 14, ket naragsakanak iti artikulo a “Ti Kamelio ti Arabia—Adut’ Usarna a Lugan ti Africa.” (Hunio 8, 1992) Inlawlawagyo dagiti bambanag a namagbalin iti impormasion a makaliwliwa unay.
G. C., Argentina
Panagsao iti Publiko Nakatulong unay kaniak ti artikulo a “Mabalinyo ti Agsao iti Sango ti Tallaong!” (Hulio 22, 1992) a makastrek iti panggedan. Binasak dayta nga umuna nga addaan panangmatmat nga iyaplikarko dayta iti Nakristianuan a panagministro. Ngem apaman a napakaammuanak iti maysa nga interbiu iti trabaho, binasak manen ti artikulo ket inyaplikarko dagiti adu a punto a dinakamatna, kas ti ehersisio a mangpakalma iti nerbios. Nagkararagak sakbay a napanak iti interbiu. Naawatak iti trabaho, ket agyamanak unay iti panangipaayyo iti daytoy nga artikulo iti maitutop a tiempo.
K. B., Estados Unidos
Panagsirarak iti Law-ang Kas maysa a napasnek a managbasa iti science fiction, talaga a pinagsiddaawnak dagiti serie maipapan iti panagsirarak iti law-ang. (Setiembre 8, 1992) Inikkannak daytoy ti natimbeng a panangmatmat iti daytoy makapagagar unay a tema. Makaparagsak met a makita a ti Dios addaan iti nakaskasdaaw a panggep saan laeng nga agpaay iti daytoy a planeta no di ket agpaay iti intero nga uniberso.
A. C., Estados Unidos