Manipud Managbasatayo
Dagiti Apong Inlawlawag dagiti artikulo ti “Agimtuod Dagiti Agtutubo . . . ” iti Hulio 8 ken Hulio 22, 1992 nga isyu ti maipapan kadagiti nakipagtaengen nga apong. Nakipagtaengen kadakami ti lolak nanipud natay ti asawana. Inaywanannak ken dagiti lima a kakabsatko bayat ti panagtrabaho da Tatang ken Nanang; nagbalinkam a nasinged. Ita ta saanen a maaywanan ni lola ti bagina, addaanak iti pribilehio a subadan dagiti inaramidna idi kaniak. Dayta ket saan a nalaka, yantangay addaanak iti bukod a pamilia nga aywanan, ken saanak unay a nasalun-at. Ngem naragsakak no isut’ aywanak. Wen, adu a positibo a banag ti mabalin a mapasamak no makipagtaeng ti maysa nga apong!
B. M., Estados Unidos
Panangpadakkel Kadagiti Annak Pagyamanan kadagiti artikulo a “Panangpadakkel kadagiti Annak iti Imoral a Lubong.” (Hunio 22, 1992) Namakdaarkayo maipapan kadagiti manangallilaw nga agkunkuna a Kristiano a nakastrek iti kongregasion. Itay napan a tawen ti balasangmi ket inulaw ken rinames ti kasta nga agtutubo a lalaki. Isut’ makipagad-adal ti Biblia iti maysa a kameng ti kongregasionmi. Nupay isut’ sinentensiaanen ti korte, makadadael iti pamiliami ti imbunga ti inaramidna. Inanamaenmi nga adalen dagiti amin a Kristiano a nagannak a kadua dagiti annakda dagitoy a naintiempuan nga artikulo, a pakdaaran dagiti annakda a saanda unay nga agtaltalek kadagiti agpammarang nga addaan interes iti Biblia.
K. V., Estados Unidos
Impabigbig daytoy a magasin kaniak ti kasta unay a panagregget dagiti nagannaktayo tapno mapadakkeldatayo nga addaan panagbuteng iti Dios. Personal a nagungonaanak manipud iti artikulo a “Tulongan Ida a Mangpili a Nainsiriban iti Pakiasawaanda.” Agtawenak laeng iti 16 ket saanak pay nga interesado ita iti panagasawa. Nupay kasta, siguradoak a daytoy a praktikal a balakad ket makagungonanto kaniak iti masanguanan.
N. G., Italia
Musika a “Death-Metal” Pagyamanan unay iti artikulo a “Death Metal—Aniat’ Mensahena?” (Hulio 8, 1992) Agpadpada a ti “heavy-metal” ken musika a rap ti nalatak unay idiay pageskuelaak. Mauyaw ti siasinoman a di mangayat iti daytoy a kita ti musika. Pinagbalin ti artikulo a nalaka kaniak ti agkuna iti saan agraman iti panangilawlawag no apay a diak kayat daytoy a kita ti musika. Pagyamanan unay.
M. F., Alemania
Panagsao iti Tallaong Adda bassit maikunak iti artikulo a “Mabalinyo ti Agsao iti Sango ti Tallaong!” (Hulio 22, 1992) Kanayon a managbabainak. Idiay eskuelaan, mammanoak nga agsao iti sanguanan ti klase, ket kamaudiananna nagsardengakon a nageskuela gapu iti kinamanagbabainko. Ngem idi nagbalinakon a Kristiano, nakipasetak iti Teokratiko nga Eskuelaan iti Panagministro ket masapul nga agsaoak iti sanguanan ti tallaong. Daytat’ saan a nalaka, ngem buyogen iti kararag ken tured a mapagballigian ti parikutko, nagin-inutak a rimmang-ay. Mariknak pay laeng ti agbain, ngem nakapagsaoakon kadagiti dadakkel a tallaong iti kumbension dagiti Saksi ni Jehova!
A. H., Brazil
Parang-ayen ti Memoriayo Sakbay la unay a binasak ti artikulo a “No Kasano a Parang-ayen ti Memoriayo” (Hulio 22, 1992), nalagipko a nalipatak manen a gatangen ti maysa a banag bayat iti pannakitiendak. Intudo ti artikulo ti sumagmamano a tulong iti panangsanay iti memoria ti maysa, kas iti panangiladawan. Makapakatawa ti pangarigan nga iladawan iti maysa a baka a mangsipsipilio iti ngipenna no masapul a gumatang iti gatas ken toothpaste. Iti masanguanan, usarekto dagitoy a wagas ket mangnamnamaak a malagipkonton dagiti gatangek.
E. B., Alemania
Manipud Managbasatayo Pagyamanan unay kadagiti parang iti “Manipud Managbasatayo.” Imbes nga agtultuloy a salaysay tapno suportaran ti bukodyo a kapanunotan, daytat’ maysa a koleksion dagiti makatukay-rikna a kapadasan dagiti tao. Ti kinatulokyo a mangipablaak kadagiti pammabalaw dagiti managbasa ken, no dadduma, dagiti panangilinteg ti editor kadagitoy ti nalawag a pammaneknek iti kinapakumbabayo.
C. Q., Italia