Manipud Managbasatayo

Isyu ti Babbai Pagyamanan unay kadagiti artikulo maipapan iti pannakamalo ti babbai (Nobiembre 22, 1988), tulong kadagiti pamilia dagiti alkoholiko (Mayo 22, 1992), ken panagraem iti babbai (Hulio 8, 1992). Ipakita dagitoy nga artikulo ti nakaskasdaaw a pannakaawat iti rikrikna ti tao. Idi rabii ti kasarko, naisagmakak kadagiti nakalkaldaang a kasasaad. Naaddaanak kadagiti parikut iti salun-at ket nagpakonsultaak kadagiti doktor ken propesional iti salun-at ti panunot. Saan unay a maawatan ti adu ti parikut a kas iti daytoy, ket no agpatulongka iti maysa a dina ammo ti ibalakadna, narigrigat pay. Kaskasdi, naamirisko a marisutkon ti parikutko, pagyamanan kadagiti artikuloyo.

N. H., Argentina

Niagara Maragsakanak unay a nangbasa iti artikulo a “Niagara Falls​—Agnanayon a Gameng Dagiti Americas.” (Oktubre 8, 1992) Addaankami iti babassit a dissoor ditoy kabakiran, ngem ti panangiladawan iti kasta a nakaam-amak a buya pinagmennamennanak iti ayat ni Jehova kadatayo ken ti tarigagayna nga apresiarentayo a naimbag dagiti parsuana.

P. J. O., Nigeria

Panagraem iti Babbai Kabayatan ti kinaubingko, nasursurok ti agbalin a manangidumduma iti kultura a namagbalin kaniak a napalaus-gurana iti babbai. Pulos a diak panggep ti mangasawa! Ngem gapu iti serie dagiti artikulo iti suheto a “Babbai​—Maikari iti Panagraem” (Hulio 8, 1992), nagbaliw ti panangmatmatko iti babbai. Naminduak a binasa dagiti artikulo, ket itan pagarupek nga agbalinakto a naimbag nga asawa iti masanguanan.

N. B. M., Côte d’ Ivoire

Pannakisarsarita iti Telepono Naginteresak iti artikuloyo nga “Agimtuod Dagiti Agtutubo . . . Aniat’ Pagdaksan ti Pannakisarsarita?” (Agosto 22, 1992) Maysaak met a makisarsarita iti kasungani a sekso babaen ti telepono. Naragsakak unay! Ngem idi kinasaritak daytoy a tao ket impakaammok ti rikriknak, naammuak a saan met gayam a serioso kaniak. Maysaak a biktima ti maysa nga alembong. Nabasak la koma ti artikuloyo iti makatawen a nasaksakbay. Nalabit, saan koma a nadudog ti pusok.

L. R., Estados Unidos

Panagsirarak iti Law-ang Agtartrabahoak iti sanga ti European Space Agency idiay Italia. Namin-adu nga insingasingko a mairaman koma dagiti artikulo manipud ti Agriingkayo! iti press-review a broshur a naisagana agpaay kadagiti empleadomi​—ngem napaayak. Nupay kasta, nausar dagiti artikulo ti “Panagsirarak iti Law-ang” (Setiembre 8, 1992) ket gistay amin dayta ti nadiskutir iti press review-mi! Pagyamanan iti Agriingkayo! Naaddaanak iti adu a gundaway a mangilawlawag ti Biblia kadagiti katrabahuak.

P. B., Italia

Panaglinglingay Agtawenak iti 20 ket kalkalpasko a binasa dagiti serie a “Kasano nga Apektaran ti Panaglinglingay ti Biagyo?” (Nobiembre 8, 1992) Naintiempuan ken natimbeng ti impormasion. Pagarup dagiti agtutubo a maing-ingetanda kadagiti maiparit ken pagalagadan a masapul a tungpalentayo kas Kristiano. Kas pangarigan, nagsardeng ni manongko kas Kristiano gapu ta kastat’ mariknana. Ngem ibilangko a salaknib dagitoy a pagalagadan, ket mariknak a natalgedak unay ken madungdungngo iti pannakaammo a maseknan ni Jehova kadatayo tapno agtalinaedtayo a naisina iti lubong ni Satanas.

D. C., Estados Unidos

Apresiarek unay ti isyu maipapan ti panaglinglingay, ngem kayatko a maammuan no nangalaanyo ti impormasion a nakatulong kadakayo a nangiladawan kadagiti detalye dagiti sine kas ti Basic Instinct?

A. A., Italia

Naibasar dagiti komento kadagiti report dagiti damdamag manipud kadagiti mapagtalkan a diario ken magasin. Din kasapulan a buyaen dagiti miembro ti gunglo dagiti managsirarakmi daytoy naalas a sine.​—ED.