Manipud Managbasatayo
Panangdisiplina Kadagiti Annak Talaga nga inapresiarko ti artikulo a “Ti Panangmatmat ti Biblia . . . ‘Ti Pagbaot ti Disiplina’—Nagpaso Kadin?” (Setiembre 8, 1992) Gapu ta lumanlanlan ti panangabuso iti ubing ken kinaulpit iti aglikmuttayo, kasapulanmi ti maysa nga artikulo a kas itoy a tumulong tapno agbalinkam a natimbeng. Addada am-ammok nga annak a naranggas unay ti pannakatratoda manipud kinaubingda. Agtutuboda itan nga addaan nakaro a parikut iti emosion. Kasapulanmi ti kasta nga impormasion tapno matulongankami a mangiwanwan ken mangisuro kadagiti annakmi iti naayat a pamay-an.
M. B., Estados Unidos
Mabigbigbig a Kawes Agyamanak iti artikulo nga “Agimtuod Dagiti Agtutubo . . . Mabigbigbig a Kawes—Agpaay Kadi Kaniak?” (Setiembre 8, 1992) Diak kabaelanen ti gumatang kadagiti mabigbigbig a kawes makatawen itan manipud idi immikkatak iti panggedak tapno agbalin nga amin-tiempo a managebanghelio. Daytoy ti namagdanag kaniak iti sumagmamano a tiempo. Nupay kasta, maawatak itan a nasayaat ti pinilik ket dagiti mabigbigbig a kawes saandak magunggonaan.
M. J. C., Brazil
Didigra Idiay Baybay Aral Pagyaman unay iti artikulo a “Didigra Idiay Baybay Aral.” (Agosto 22, 1992) Sipud pay idi ages-eskuelaak, daytoy a baybay, agraman ti kabangibangna a Caspian Sea ket makaallukoyen kaniak. Iti adu a tawen, adun nga impormasion ti nagun-odak maipapan iti daddadakkel ngem iti dua a baybay, ngem idi nabasak ti artikuloyo, dagiti detalye maipapan iti Baybay Aral pudno a naisalsalumina unay.
D. H., Alemania
Dagiti Apong Nupay nataengankamin, inapresiarmi unay ken baketko dagiti artikulo nga “Agimtuod Dagiti Agtutubo . . . ” maipapan iti pannakipagtaeng kadagiti apong. (Hulio 8 ken Hulio 22, 1992) Nabiit pay a nakipaggiankam iti lelang ni baketko, ket pudno a nangisarang daytoy iti adu a karit kadakami. Apag-isu unay a kasapulanmi dagiti nainsiriban a balakad a naibatay iti Biblia ken ti pannakaawatyo kadagiti nataengan. Ti namindua a panagadal ti pamilia a naibatay kadagidiay nga artikulo ken ti praktikal a panangiyaplikar iti balakad pudno a pinasayaatda ti kasasaadmi.
J. L., Estados Unidos
Death Metal Inapektarannak ti kasta unay ti artikuloyo a “Death Metal—Aniat’ Mensahena?” (Hulio 8, 1992) Marigatanak a mangliklik iti daytoy a kita ti musika. Ti artikuloyo inikkannak ti tured a mangliklik iti daytoy sataniko a musika. Medio makidangdangadangak pay laeng, ngem babaen iti tulong ni Jehova mabalinakto ti agballigi.
M. D., Estados Unidos
AIDS Pudno a mapagtalkan unay ti artikuloyo nga “AIDS Idiay Africa” (Agosto 8, 1992)! Makaispal-biag ti balakad kadagiti agtutubo nga agpangpanggep a mangasawa/makiasawa. Kabarbaroak a nabautisaran a Kristiano, ket gapu iti napalabas nga estilo ti panagbiagko, nagpaeksaminak no adda impeksionko iti HIV. Negatibo ti resulta. Masdaawak no apay agkitakit nga agpakonsulta dagiti rumbeng a mangaramid koma iti kasta. Adu a naasawaan a di matalek dagiti assawada ti manginanama a makagun-od iti naimbag a resulta, nupay addada met pagamkan. Ngem napeggad ti di panangikankano ken panamati a saanka pay laeng a naakaran iti daytoy makapapatay a sakit.
L. J., Estados Unidos
Apresiarenmi dagitoy a napudno a komento. Sigun iti U.S. Centers for Disease Control, abutenna ti tallo inggat’ innem a bulan kalpasan ti pannakaimpeksion a mangpataud ti bagi iti umdas nga “antibody” a mabalin a madlaw babaen iti HIV test. Maikalikagum ngarud ti pannakaeksamin manen no napasamak ti pannakaeksamin kalpasan la unay ti posible a pannakaakar iti mikrobio ti AIDS.—ED.
Kayatko nga iyebkas ti panangapresiarko iti artikulo nga “AIDS—Agannad Dagiti Manangaywan Salun-at!” (Hunio 22, 1992) Agtartrabahoak iti maysa nga opisina ti doktor a mangtamtaming iti emerhensia a pannakaaywan ti salun-at. Kalpasan unay ti pannakabasak iti artikulo, naaddaankam iti miting kas empleado a sadiay sinaggaysami a nagsasaritaan dagiti umarngi a panagannad. Impakaammok iti dadduma a damo a nabasak daytoy iti Agriingkayo!
T. M., Estados Unidos