Manipud Managbasatayo
Panagdangadang iti Korte Kas maysa nga abogado a mangtamtaming kadagiti panagdangadang iti Korte maipapan iti panangaywan iti ubing ken iti dara, diak maiyebkas ti kasta unay a pammaregta a nagun-odak manipud ti artikulo a “Dagiti Saksi ni Jehova ‘Naisaklangda kadagiti Lokal a Korte.’” (Setiembre 22, 1992) Itay napan a lawas dadduma a doktor, a di nangikankano kadagiti espisipiko a bilin a di mangiyalison, inyalisonanda ti dara iti maysa a Saksi. Makarimon ti kasta nga awanan asi a di panangikankano kadagiti kangrunaan a relihiuso ken personal a kalintegan. Pinaregtanak ti artikuloyo nga ad-adda pay a mangitultuloy ti pannakidangadang!
P. P., Estados Unidos
Babbai—Maikarida iti Panagraem Agyamanak iti serie a “Babbai—Maikarida iti Panagraem.” (Hulio 8, 1992) Tinulongannak a mangawat a ti panangtagibassit kadagiti babbai ket saan laeng a parikut ti maysa a komunidad, no di ket mapaspasamak iti adu a pagilian. Agyamanak met kadagiti singasing a panangliklik iti pannakarames.
S. A., Nigeria
Apresiarek ti kinaprangka dagitoy nga artikulo. Dagiti singasingyo ti mamagpanunot iti adu a tattao, lallaki ken babbai, a mangusig manen kadagiti kababalinda. Pagyamanan ti panangipakitayo no kasano ti panangmatmat ni Jehova kadagiti babbai.
J. P. L., Canada
Pudno a mariknak a dagiti babbai naisublida iti umiso a sasaadenda ket namatmatanda iti rumbeng a kasasaadda. Sapay koma ta dagiti Kristiano a lallaki apresiarenda met dagitoy nga artikulo tapno, no kasapulan, mabalin a balbaliwanda met ti panangmatmatda kadagiti babbai. Sipapasnek a raemenminto ida iti panangaramidda iti kasta.
E. S., Francia
Dagiti artikulo mangipaayda iti nasaysayaat a panagriknami iti bagbagimi ken ipakita a rebbengen dagiti lallaki ti makikappia ken mangraem kadakami. Pagarupek a dagitoy ket nabibileg nga artikulo, ket maapresiarda unay.
A. H., Estados Unidos
Kasla naltutanak ken nakaluaak a makaammo a kamengnak ti maysa nga organisasion a nakatibtibker ti takderna maipapan iti panangtrato kadagiti babbai. Dagitoy dagiti immuna nga artikulo a nakitak nga awan a pulos ti pagpambar dagiti manangabuso a lallaki.
E. M., Estados Unidos
Ammok a daytoy nga impormasion maipapan iti panangmatmat dagiti lallaki kadagiti babbai dina balbaliwan ti lubong, ngem makaliwliwa unay a basaen dagiti sasao ti kinapudno, liwliwa, panangaasi, ken pannakaawat, iti pannakabigbig a pudno unay a maseknan ni Jehova kadakami.
H. Q., Estados Unidos
Kasta unay ti panangapektar dagiti artikulo kaniak—saan a gapu ta nabaybay-ak ti asawak, ngem pudno nga ad-adu pay ti maaramidko a tumulong kenkuana. Isut’ raemek iti kasta unay ket mariknak a dagiti artikulo tulongannanto dagiti amin a Kristiano nga assawa nga ad-adda pay a mangbigbig iti pateg dagiti assawami. Maikarida iti panagraem, dayaw, ayat, ken pannakaawat dagiti assawada.
S. S., Brazil
Ipapatay Natignay ti pusok iti ruaryo maipapan iti “No Matay ti Inay-ayat” (Hulio 22, 1992). Idi aldaw a naawatmi dayta, natay iti kanser ti 16-años a bayawko. Dagiti artikulo ket pudno a pammaregta iti tiempo ti ladingit. Immay dagiti gagayyem ken pamilia a timmulong kadakami babaen ti panangipaayda iti taraon, liwliwa, ken tulong a mangaramid iti urnos ti pompon. Pudno a mangipaay ni Jehova ti panangliwliwa babaen kadagiti naintiempuan nga artikulo a kas kadagitoy.
C. C., Estados Unidos