Manipud Managbasatayo

Berbal a Panangabuso Dagiti serye “Ti Dati a Makasair a Sasao Nagbalin a Makaagas a Sasao” (Oktubre 22, 1996) ket maysa laeng a paset ti nagadu nga artikulo a nangipakita a maseknan unay ni Jehova kadatayo. Dagiti artikulo maipapan iti “Tulong Agpaay Kadagiti Alkoholiko ken Kadagiti Pamiliada” (Mayo 22, 1992), “Babbai​—Maikarida iti Panagraem” (Hulio 8, 1992), “Tulong Agpaay Kadagiti Annak ti Diborsio” (Abril 22, 1991), ken “Agpatingganto Kadi pay ti Kinaranggas iti Pagtaengan?” (Pebrero 8, 1993) ti nangpabileg kaniak kadagiti adu a tawen ti emosional a panangabuso iti im-ima ti alkoholiko nga asawa. Binasak amin dagitoy nga artikulo buyogen iti lulua ti rag-o ken ladingit. Malapunos ti pusok buyogen ti panangapresiar iti Dios a makaammo kadagiti kakaruan a pagbutngan, sanaang, ken pagam-amkantayo.

J. C., Canada

Kasta unay ti panangabbukay kaniak dagitoy nga artikulo. Eksakto ti panangdeskribirda iti kasasaadko iti denna ni lakayko. Patiek unay ti tunggal nailanad. Nakadungdungngo ti panangtratoyo kadagiti babbai, ket daytoy ti mangpatalged kaniak a daytoy nga organisasion ti us-usaren ni Jehova.

P. S., Alemania

Dagiti artikulo pinaregtadak a mangitultuloy iti pananglabanko iti pagkapuyak babaen ti panangkontrolko iti dilak. Ita, ammokon no kasano ti rumbeng a panangtratok ken ni lakayko. Binasak dagiti artikulo buyogen iti lulua.

G. I., Austria

Adun a tawen a biktimaak iti berbal a kinaranggas ni lakayko. Naliklikak ti maldaang babaen ti panangsukayko kadagiti bunga ti espiritu ti Dios ken ti kinaokupadok iti amin-tiempo a trabaho a panangasaba. Dagiti artikuloyo ti nangiparikna kaniak a saanak nga agmaymaysa​—nga adda makaawat iti parikutko.

M. N., Italia

Adu nga artikuloyo ti nabasakon, ngem dagitoy pay la nga artikulo ti nangabbukay unay kaniak. No kitaek ti retrato iti panid 9, kaslattay makitkitak ni nanang wenno ti kabsatko, nga adu a tawen a nagsagaba iti im-ima dagiti assawada. Nagpaaramidak iti kopia dagitoy nga artikulo ket impatulodko ida kadagiti am-ammok nga agsagsagaba iti kastoy a pamay-an. Segseggaanmi ti baro a lubong ti Dios, a sadiay awanton ti aniaman a kita ti abusado a panagsasao.

B. P., Kenya

Idi intedko ti magasin iti ulitegko a kanayon a pagsasawanna ni baketna, binasana iti namin-adu a daras. Kalpasanna, nadlawmi a saannan nga ab-abusuen ni baketna ket awanen ti aniaman a riribuk idiay balayda. Kanayon nga agyamyamanda nga agassawa iti panangtulongko kadakuada a mangtarus iti bagida. Kayatko nga iyebkas ti panagyamanko iti Agriingkayo!

F. F., Nigeria

Dati nga Adikto Agyamanak iti artikulo a “Ti Kinapudno ti Nangisubli iti Biagko.” (Oktubre 22, 1996) Agtawenak iti 19, ket uray no maysaak a regular pioneer, wenno amin-tiempo a managebanghelio, no dadduma mariknak a maikapkapisak iti sumagmamano a bambanag. Ti kapadasan ni Dolly Horry ti timmulong kaniak a mangawat a saan la nga ilusion ti kinapintas ti lubong.

R. M. A., Bolivia

Kayatko nga iyebkas no kasanot’ panangapektar kaniak daytoy nga artikulo. Bayat a binasak ti pakasaritaan ti biag ni Dolly Horry, nagarubos dagiti lua iti rupak. Ikarkararagko a daytoy nga artikulo ti mangtignay iti sabsabali nga agbibiag a kas idi ken ni Dolly nga agbalbaliwda itan.

O. S. O., Nigeria

Kas maysa kadagiti Saksi ni Jehova, pagpannakkelko a kabsatko a Kristiano ni Dolly Horry. Idi tin-edyerak, maikadua laeng ni Jehova iti biagko. Ngem inan-anusannak ni nanangko, ket naragsakan unay idi nagbautisarak itay napan a tawen.

B. B., Australia