Death Metal—Aniat’ Mensahena?
MAYSA a nauyong ti panagkitkitana, atiddug-panagbubuokna nga agtutubo a lalaki agtaktakder iti sanguanan ti tallaong dagiti agik-ikkis, agkankanta nga agrayo. Nangala ti sangatako a dara ken lalaem ti animal ket insayona kadagiti umuna a sumagmamano a linia. Nagkatawa dagiti managrayo, pinunasanda dagiti naisayo kadakuada, ket nagbibinnatoda ti nagergerret a karne. Daytoy nga eksena, sigun iti St. Petersburg Times ti Florida, naaramid iti maysa a konsierto ti maysa a banda ti rock a naawagan Deicide, a kayatna a sawen ‘ti panangpapatay ti maysa a dios.’ Naawagan daytoy a kita ti musika iti “death metal,” a kaslat’ tay kakaruan a porma ti heavy-metal rock. Iti napalabas a tawtawen nagbalin a nalatak nga ad-adda idiay Florida ken internasional payen, nanipud pay nagballigi ti maysa nga album a napauluan ti Scream Bloody Gore, babaen ti maysa a banda a naawagan ti Death.
Ti banda a Deicide ti indauluan ti maysa a napeklan a Satanista nga agkunkuna a ginuranan ti Dios nanipud idi naaksidente iti lugan ket nangibati ti piglat a J ti itsurana, a patienna nga itaktakderanna ni Jesus wenno Jehova. Ibagbagana a makangkangngeg ti timtimek a manguy-uyot kenkuana a papatayenna ti bagina, ket nangpuor ti maysa a sataniko a simbolo iti mugingna.
Uray pay dagiti gagangayen a grupo ti heavy-metal mangmangtedda kadagiti nakaal-alas a mensahe. Inreport ti magasin a Time a ti dua a nairekord nga album ti grupo ti heavy-metal a Guns N’ Roses nakalako ti nasurok a 1.5 milion a kopia iti uneg ti tallo nga aldaw. Kaskasdi, itultuloy dagiti album ti awagan ti Time a “di agsarday a mangpababa kadagiti babbai ken agtultuloy a naranggas a kankanta” ti banda ken “dagiti panangrautda agturong iti pananggura kadagiti ganggannaet, rasismo ken panangpennek ti derrep buyogen ti kinaranggas.” Itampokda pay met dagiti tema kas panangusar ti ngiwat agpaay iti sekso, panangpapatay, ken ti kinalabon ti kinasalawasaw. Nakaad-adu ti pagtagilakuan nga agkitakit nga aglako kadagita a plaka.
Ti heavy-metal rock, kasta met dagiti musika a rap, ti naglasat ti umad-adu a pannakababalaw—ken saan laeng a manipud kadagiti relihiuso a pundamentalista ken nakaro a konserbatibo a grupo politiko; ti American Medical Association (AMA) ken ti American Academy of Pediatrics nagsaoda met maibusor kadagiti aglemlemmeng a peggad dagiti sasao kadagiti agpadpada nga estilo ti musika. Sigun iti magasin nga American Health, kuna ti AMA: “Dagiti mensahe nga iladladawan dagiti sumagmamano a tipo ti musika a rock mabalin a mangipaay ti pudpudno a peggad iti pisikal a salun-at ken emosional a pagsayaatan nangnangruna kadagiti naganus nga ubbing ken agtutubo.”
Talaga kadi a napeggad dagitoy a tipo ti musika? Bueno, usigenyo dagiti innem a gagangay a tema ti rap ken heavy-metal nga ibilang ti AMA a napeggad: droga ken panangabuso ti alkohol, panagbekkel, kinaranggas, sataniko a panagdayaw, seksual a pananggundaway, ken rasismo. Makapabileg kadi dagita a tema?—Idiligyo ti Proverbio 6:27, 28; Filipos 4:8.