No Kasano a Nasursuro ti Dadduma a Parukmaen Dagiti Negatibo a Rikna
NO DADDUMA tunggal maysa addaan kadagiti negatibo a rikna. Gaput’ nadagsen a parparikut, kas iti nadagsen a sakit, kinalakay, wenno ipapatay dagiti inay-ayat, dadduma mabalin a naigaeddan kadagiti negatibo a rikna a mabalin a mangdangran iti panagbiagda.
Nupay kasta, uray pay kadagidiay naigaeden kadagiti negatibo a rikna, addada dagidiay a nakasursuro a mangtengngel kadagitoy a negatibo a rikna tapno makapagballigida kadagiti inaldaw nga aramidda. Dagiti sumaganad ti pangarigan dagita, a pinagsaludsodan ti magasin nga Agriingkayo!
Naagasan ni Janis iti sakit a mangapektar iti rikriknana. Nupay kasta, kunana: “Makitak a ti kaepektibuan a pamay-an ti panangtaming a sibaballigi iti parikut isut’ panangtengngel kadagiti panunotko. Aramidek daytoy babaen ti panangaramid kadagiti banag nga agpaay kadagiti dadduma, kas iti panagluto ti tinapay ken panagdait. Ikagumaak met a panunoten dagiti makaay-ayo a pakalaglagipan ken inanamaek dagiti masanguanan a pasamak. Gapu iti an-anayek, saan a nalaka daytoy. No dadduma nalaklaka ti sumuko iti dakes a rikrikna. Ngem dagiti naimbag a resulta maitutop iti panangikagumaan.”
Kalpasan ti 45 a tawen iti panagasawa, natay ti asawa ni Ethel. Nupay dina liniklikan ti panagladingit, nabaelan ni Ethel a tinengngel dagiti riknana. Ilawlawagna: “Kankanayon nga okupadoak a mangar-aramid kadagiti banag nga agpaay kadagiti dadduma. Kas pangarigan, tagtagiragsakek ti mangisursuro kadagiti dadduma maipapan kadagiti panggep ti Dios a masarakan iti Biblia. Maysa nga agtutubo a balasang ti naragsakan kadagiti naimbag a banag a nasursurona ta ti panangapresiarna tinulongannak nga ad-adda pay nga agrag-o. Bayat ti panangipamaysak kadagiti positibo a banag iti Biblia tapno maisurok dagiti dadduma, daytat’ makatulong a mangikkat kadagiti negatibo a panagpampanunotko. Kasta met, umay agpatulong dagiti agtutubo a babbai kaniak kadagiti nadumaduma a parikutda, ket ti panangisarsarita maipapan kadagiti positibo a banag a mabalinda nga aramiden iti biagda tulongannak a mangparukma kadagiti negatibo a rikna.”
Iti adu a tawtawen okupado, aktibo ti panagbiag ni Arthur. Kalpasanna, gapu iti nadagsen nga an-anayen, masapul a sumardeng nga agtrabaho ket limitaranna dagiti amin a trabahona iti ruar ti pagtaengan. Iti adu a bulbulan narikna ni Arthur nga isut’ awan mamaayna ken malmaldaang. Kasanot’ panangtamingna kadagitoy a rikna? “Sinardengak a pinampanunot dagiti saankon a maaramid. Impamaysak ketdi ti panunotko kadagiti kabaelak nga aramiden tapno matulongak dagiti dadduma a tao a mangparang-ay ken mangparegta iti bagbagida no malmaldaangda. Gapu ta addaak laeng iti pagtaengan, kankanayon nga usarek ti telepono. Bayat nga okupadoak a tumultulong ken mangparparegta kadagiti dadduma, bassiten ti tiempok a mangay-ay iti bagik.”
Nakaro ti panagliday ken panagleddaang ni Nita, kalpasan dagiti agsasaruno a pakarigatanna, agraman ti ipapatay ti asawana. Idi agangay nasursurona a tinengngel dagidiay a rikna: “No umapayen kaniak ti panagliday, mangsapulak iti makagunggona a pangiyebkasak. Ikagumaak ti magna, awagak ti maysa a gayyem, dumngegak iti musika, wenno mangaramidak iti aniaman nga ammok a mangbang-ar iti panagleddaangko. Kakaasiak ti bagik a kas ti panangaasi ti maysa a naimbag a gayyem.”
Ni Mary addaanen nadagsen nga an-anayen iti 32 a tawtawen. Rummuar laeng iti balay no mapan iti doktor, ta kankanayon nga adda iti tugaw nga addaan dalig. Kasano a nagtalinaed ni Mary a di riningbawan ti pannakaupay? Ilawlawagna: “Manangsaranay unay ni lakayko. Kasta met, kanayon nga agbasaak kadagiti makapabileg a material. Kanayon nga awagak dagiti gayyemko, ken masansan nga awisek ida iti pagtaengak. Tagtagiragsakek dagiti isasarungkarda ket diak usaren dagidiay nga okasion nga agreklamo wenno mangay-ay iti bagik. Diak busbosen ti tiempo a mangpampanunot kadagiti negatibo a banag iti biagko agsipud ta nakaad-adu dagiti positibo a banag a laklak-amek.”
Nainkasigudan a managpanunot ni Margaret. “No rumsua dagiti negatibo a rikna,” kunana, “makikuyogak iti positibo ti panagpampanunotna—saan a maysa a pagarupem a naan-anay a paguadan—no di ket maysa a makaam-ammo kaniak a naimbag ken makaipalagip kadagiti balligik ken maparegtanak.”
Naminlima a naopera ni Rose Marie iti kangrunaan nga operasion bayat ti adu a tawtawen, ket piton dagiti natay kadagiti pamiliada nga agassawa iti kallabes a maysa a tawen ket kagudua. Pudno a ti rigat daytoy pinataudna dagiti negatibo a rikna. Nupay kasta, dida pampanunoten dagidiay a banag. Kas Saksi ni Jehova, napabilegda babaen ti positibo ken makaliwliwa a namnama nga ipaay ti Biblia a maysa a nalinteg a baro a lubong nga asidegen a sadiay ti Dios “punasennanto ti tunggal lua kadagiti matada, ket awanton ni patay, ket awanto metten ti panagdung-aw, wenno ut-ot.” Uray dagiti natay mapagungardanto, ta kinuna ni Jesus, “umay ti oras a dagiti amin nga adda kadagiti tanem a pakalaglagipan mangngegdanto [ti timek ti Anak ti Dios] ket rummuardanto.”—Apocalipsis 21:4; Juan 5:28, 29.
[Ladawan iti panid 9]
Tengtenglen ni Janis dagiti riknana babaen ti panangaramid kadagiti banag nga agpaay kadagiti dadduma, panangpampanunot kadagiti makaay-ayo a pakalaglagipan, ken pananginanama kadagiti masanguanan a pasamak