Manipud Managbasatayo

Negatibo a Rikrikna Pagyamanan iti nagsayaat a serie dagiti artikulo a napauluan “Maparukmayo Dagiti Negatibo a Rikrikna.” (Oktubre 8, 1992) Nabayagen nga agsagsagabaak iti daytoy a parikut. Ngem ita ta impaayannak ni Jehova ti sagut kadagitoy nga artikulo, naaddaanak met laengen ti bileg a mangparukma kadagitoy a rikrikna. Dakkel a tulong ti panangsirmata iti masanguanan nga ipaayna kadatayo ken dagiti bendision a tagiragsakentayto.

C. I., Italia

Nagleddaangak kalpasan ti romantiko a pannakinaigko iti maysa a manangallilaw. Pinabasolko ti bagik iti adu a bulan babaen kadagiti negatibo a rikrikna kas ti, ‘Nagmaagak ta namatiak kadagiti kinaulbodna.’ Wenno, ‘Saanak a nalaing a manganag iti kinatao ti maysa.’ Nangiturong daytoy iti maysa a di nainkalintegan a konklusion: ‘Diakto pulos agtaleken iti maysa a lalaki.’ Ti praktikal a singasing ti artikulo maipaay iti positibo a panagpampanunot tultulongannak a mangisubli iti panangipategko iti bagik ken palagipak ti bagik a daydi a pasamak ket maysa laeng a makaisuro a kapadasan.

R. M., Estados Unidos

Anamongak ti panangasikasoyo iti tema maipapan ti negatibo a rikrikna. Nupay kasta, saan nga amin a negatibo a rikrikna ket pinataud ti maysa a maseknan a panunot. Dagiti di-maseknan a panunot​—kas dagiti minedmedan a kapadasan ti pannakaabuso idi ubing pay​—ti mangparnuay met iti [negatibo] a rikrikna. Padpadasen ti dadduma nga iyaplikar daytoy nga impormasion ngem matakuatandanto a dida mabang-aran. Nalabit nakaro unay ti parikutda. Dagiti tao a makasapul iti nainget a panangtaming iti mental wenno emotional a salun-atda​—nupay iraman daytoy ti pananggun-od iti tulong dagiti doktor wenno saan​—nasken a di mamatmatan kas nalabes unay.

M. W., Estados Unidos

Pagyamanan kadagitoy a komento. Nasken a laglagipen dagiti managbasa a dagiti artikulo ket di naiturong kadagiti agsagsagaba kadagiti serioso a parikut kas dagiti nakaro a panagleddaang wenno dagiti nakas-ang nga epekto ti pannakaabuso bayat ti kinaubing. Mabalin a magunggonaan dagita no iyaplikarda dagiti nadakamat a singasing; nupay kasta, kas naibaga iti rugrugina, naisentro dagiti artikulo kadagiti “gagangay a negatibo a rikrikna a mapadasan ti amin.” No maipapan kadagiti nakaro a kita ti panagleddaang, binigbig ti artikulo a dagita a sagubanit “mabalin a kasapulanda ti propesional a pannakaagas.”​—ED.

Lulua Nabiit pay a tinabunuak ti pannakaipumpon ti maysa a matalek a Kristiano a nagserbi kas panglakayen iti kongregasionmi iti adu a tawen. Idi inruardan ti lungon manipud iti hall, napalaus unay ti panagsangitko. Nupay kasta, kaaduan a timmabuno ti nangmedmed kadagiti riknada. Maysa laeng nga aldaw kalpasanna, naawatko ti Setiembre 22, 1992 a ruar ti Agriingkayo! nga addaan iti artikulo nga “Apay Agluatayo?” Tinulongannak a mangtarus a dagiti lua ket saan a pagilasinan ti kinakapuy no di ket ebkas ti ladingit. Pagyamanan unay iti makaisuro nga artikulo.

S. Z., Alemania

Im-ima Makapainteres unay ti artikulo a “Dagiti Makaawis nga Im-imatayo.” (Agosto 8, 1992) Sigud a nabigbigkon a nakaskasdaaw ti pannakaaramid dagiti imatayo. Ngem daytoy nga artikulo tinulongannak a makarikna iti kinadaeg ti Namarsuatayo.

K. Y., Japan

Kararag Pagyamanan iti artikulo nga “Agimtuod Dagiti Agtutubo . . . Sungbatan Kadi ti Dios Dagiti Kararagko?” (Setiembre 22, 1992) Makatulong unay ti artikulo. Insuronak a dagiti kararagko rumbeng a di buklen dagiti nalabor a kalikagum maipaay iti material a bambanag. Nasursurok met a rumbeng nga agkararagak a di agsarday gapu ta ni Jehova saan a dagus a sumungbat. Ket mabalin a dina ipaay ti sungbat a kalkalikagumantayo.

B. G., Estados Unidos