Manipud Managbasatayo

Negatibo a Rikrikna Sangapulo ket dua ti tawenko a balasitang, ket naragsakanak a talaga kadagiti serie dagiti artikulo a “Maparukmayo Dagiti Negatibo a Rikrikna.” (Oktubre 8, 1992) Addada parikutko kadagiti gagayyem ken kaeskuelaak. Ti makagapu kadagita isut’ negatibo a panangmatmatko iti bambanag. Tinulongannak dagiti artikulo nga ad-adda a maaddaan iti positibo a panangmatmat.

A. C., Italia

Iti panaglasatko iti therapy iti napalabas a dua a tawen gapu iti agsasaganad a parikut iti rikrikna ken hormone, ammok manipud kapadasan nga agkurri dagiti singasingyo. Iti napalabas a dua nga aldaw, nabignatak ket kayatko ti sumuko. Kinuna ti nakaan-anus a lakayko a basaek manen dagiti artikulo. Naglaon dagita iti amin a pammaregta a tartarigagayak ken inikkannak iti tured nga agpaimbag manen.

J. L., Inglatera

Mangibabain a Nagannak Pagyamanan iti artikulo nga “Agimtuod Dagiti Agtutubo . . . Ania Ngay No Imbabainnakami ti Naganakko?” (Oktubre 22, 1992) Pinaregtanak unay. Nabiit pay a pinaritannak ni tatangko a tumabuno kadagiti Nakristianuan a gimong. Ngem ti panangbasa iti artikuloyo tinulongannak a makaawat a diak agmaymaysa iti kastoy a kasasaad ken makapagtalekak iti pannaranay ni Jehova.

K. L. R., Francia

Inaktibo a Kristiano ni tatangko. Nailaksid iti kongregasion ni nanangko ken bumusoren iti kinapudno. Naminsan, saannak a pinalubosan a nangan iti nasurok a 36 nga oras gapu ta napanak nangasaba. Kinabilnak pay. Makasangitak no maminsan gapu iti naespirituan a kasasaad dagiti nagannakko. Diyo ngarud mailadawan no kasanot’ panangparegta ken panangpabileg ti artikuloyo iti pammatik. Determinadoak a mangitandudo kadagiti prinsipio ti Biblia.

E. J., Nigeria

Addaanak met iti nailaksid nga ama ken sumagmamano a kakabsat a nababalaw wenno nailaksid. Daddumat’ nangiladawan kaniak a kas kadakuada, ngem naasawaanak itan ken makatawenakon nga amin-tiempo a managebanghelio. Wen, talaga a mapaneknekam a naidumaka.

D. R., Estados Unidos

Panangmatmat iti Lubong Pagyamanan iti panangimprentayo kadagiti sumagmamano a damdamag iti “Panangmatmat iti Lubong.” Yantangay addaanak iti natalged ken nanam-ay a biag, nasken a palagipak a kanayon ti bagik a dagitoy a talagan dagiti maudi nga aldaw. Dakkel a tulong ti “Panangmatmat iti Lubong” iti pannakakumbinsirko iti kasta unay a kinadakes ken kinalulok daytoy daan a lubong. Pangngaasiyo ta itultuloyyo ti kanayon a panangipablaak iti dayta.

M. G., Estados Unidos

Surat Kadagiti Nagannak Ti artikulo a “Surat Kada Tatang ken Nanang” (Oktubre 8, 1992) pinagsangitnak. Impabigbigna kaniak no kasanot’ rigat dagiti nagannakko a nangpadakkel [kadakami] a walo nga annakda. Gapuna, nupay 42 ti tawenkon, nagsuratak iti panagyaman kada Nanang ken Tatangko.

J. D., Estados Unidos

Makapaladingit ti panangbasak iti dayta gapu ta saan nga impaay dagiti nagannakko ti aniaman kadagiti banag nga inlista ti lalaki [a nagsurat]. Ngem iti panangbasak manen, nabigbigko a ti nailangitan nga amatayo a ni Jehova aglaplapusanan ti impaayna kaniak ken iti sabsabali. Insurona kaniak ti ayat ken impaayannak iti disiplina iti tiempo a kasapulak dayta. Gapuna, binang-arannak manipud iti naladingit a kapadasak idi ubingak pay laeng.

C. A., Estados Unidos