Manipud Managbasatayo

Dagiti Pit Bull Adda tarakenko a pit bull ket isu ti kapintasan ken kaammuan pay laeng nga aso a tinarakenko. Ngarud nasaktan ti nakemko iti paulo ti artikulo a “‘Diablo nga As-aso’?” (Mayo 22, 1992) Daytoy a paulo ipamatmatna nga amin a pit bull ket mainaigda ken Satanas ken dagiti bambanag a dakes. Itan ti basta panangtaraken iti maysa a pit bull mabalin nga agbanag iti pakaupayan dagiti dadduma. Umanamongak, nupay kasta, a rebbeng nga agannad dagiti tao no pampanunotenda ti mangtaraken iti maysa. Irekomendarko a masapul nga ammuenda ti nagtaudan ti aso ken dagiti nagannakna. Ammuenda met, no nasayaat ti pannakataraken ti aso. No kasta, ad-adda nga agbalin a naanus.

L. H., Estados Unidos

Ti paulomi basta inadawna ti pagiwarnak a Briton, isu a masansan a nangusar itoy a termino a mangdeskribir iti di mapakpakadaan a kababalin ti pit bull. Dikam ibagbaba a dagitoy nga aso ket sinasatanas ti kasasaadda; wenno imbaga a di nasayaat ti panangtaraken kadakuada. Ngem gapu iti kaadda ti pudno a peggad, paregtaenmi dagiti agtartaraken iti pit bull a masapul nga agannadda a naimbag a tenglenda dagita nga an-animal.—ED.

Pannakidangadang nga Agbiag Kalpasan ti panangbasak ti artikulo a “Ti Pannakidangadangko nga Agbiag,” kayatko ti agyaman ken ni Hans Augustin ken ti asawana. (Abril 22, 1992) Kayatko ti agyaman kadakuada gapu iti turedda ken ti ulidanda iti kinamatalek ken ni Jehova nupay nagsagabada. Pagaammok a personal ti kita ti laslasatenda a kapadasan, ket kankanayon a pampanunotek ken ikarkararagan ida.

A. Y., Francia

Kalkalpasko pay laeng a binasa ti artikulo, ket agar-arubos dagiti lua iti rupak. Dagita nga artikulo ipakitana nga addaantayo kadagiti nagsayaatan a Kristiano a kakabsat a lallaki ken babbai iti intero a lubong nga agib-ibtur iti kasta unay ken kaskasdi nga agtalinaed a natibker iti pammatida. Matulongantayo met a manglagip a dakkel man wenno bassit dagiti parikuttayo, ti kangrunaan a banag isut’ kanayon a panangpampanunot iti tiempo inton amin dagitoy dakes a kapadasan saandanto payen a mapanunot.

R. T., Estados Unidos

Panagbalin a Naiduma Agyamanak kadakayo agpaay iti artikulo nga “Agimtuod dagiti Agtutubo . . . Apay a Nasken a Naidumaak?” (Hunio 8, 1992) Maysaak a Kristiano a 18-años, ket masapul nga aminek a talaga a narigat ti agbalin a naiduma kadagiti dadduma nga agtutubo. No damagenda, “Apay a dika agkawes a kas kadakami?” wenno “Apay a dika umay makisala?” ken dadduma pay, kasapulan ti tured a sumungbat ken mangipaay iti panangilawlawag. Ngem babaen iti tulong ni Jehova ken ti magasin nga Agriingkayo!, nabaelak nga inaramid dayta. Agyamanak iti pannakaseknanyo kadakami!

H. O. N., Brazil

Dagiti Ipes Ti artikulo a “Ti Naandur nga Ipes” ket makapainteres. (Enero 22, 1992) Inyaplikar ti pamiliak ti impormasion, ket nanipud idin, ti la cucaracha saanen a makita iti pagtaenganmi.

B. H., Estados Unidos

Inadalko dagiti ipes idiay eskuelaan agarup tallo a tawen ti napalabasen. Ngem diak pulos imbilang a makatulongda. Nasdaawak a makaammo a dagiti ipes, a gagangay a mamatmatan a kabusor, mabalin a makatulongda iti dadduma a pamay-an. Ita maawatak metten no apay a narigat a pukawen ida, uray babaen kadagiti pestisidio.

E. A., Nigeria

Nasdaawak a dikay dinakamat ti boric acid a “pangpukaw” iti nakaad-adu nga ipes. Inusarmi daytoy idiay pagtaengan, ket nagkurri!

S. D., Estados Unidos

Mamakdaar dagiti managsirarak a ti boric acid mabalin a makaipaay iti nakaro a peggad iti salun-at kadagiti maladaga ken ubbing. Kitaenyo ti “Manipud Managbasatayo” iti Oktubre 22, 1984, a ruar iti “Agriingkayo!”—ED.