Ti Steenbok a Naglibas
Babaen ti koresponsal ti Agriingkayo! idiay Sud Africa
GAPUT’ nakaisigudan, ti steenbok, maysa a bassit nga ugsa ti Africa, ti mangipaay ti nakaskasdaaw a paguadan iti kinadalus. “Ti maysa a kababalin ti steenbok,” ilawlawag ni Propesor John Skinner iti libro a South African Animals in the Wild, ‘‘isut’ panangdalusda iti maysa a disso babaen kadagiti kukoda sakbay nga umibleng wenno umisboda, sadanto siaannad a gaburan ti daga ti disso a nagrugitanda.” Wen, artapan pay daytoy a bassit a parsua ti linteg a naited kadagiti soldado nga Israelita. (Deuteronomio 5:1; 23:13, 14) Gaburanna pay ti isbona.
Ti kinamanagdaldalus ti steenbok no maipapan iti panagibleng ket maibagay iti makaay-ayo a langana. “Para kaniak, ti steenbok ket maysa kadagiti kapintasan ken nakaay-ayat unay nga ugsa ti Africa,” kinuna ni Laurens van der Post. Iti librona a The Heart of the Hunter, iladawan ni van der Post no kasano a pinadasna a paltogan ti maysa nga steenbok agpaay iti maysa a timpuyog dagiti mabisin a Bushmen idiay Disierto ti Kalahari iti Africa. “Dagiti nasipot a lapayagna,” insurat ti managtakkuat, “nakatingrada iti ayanko, nakamulagat dagiti maris-ube a matana, awanan panagamak ken kumitkita a sisisiddaaw iti karkarna a buya daytoy nga adayo a lugar nga ayan ti biag. . . . Pinaltogak a dagus sakbay a mapabutngan wenno sakbay a maasianak a mangpaltog iti daytoy a naamo a parsua. Ninamnamak unay a mapuntaak gapu ta asideg unay ti baetmi. Ngem napaayak. Ti panangpaltogko ti namagwingiwing iti nasiput nga ulo daytoy nga ugsa gapu ti pannakapleng dagiti lapayagna iti kanalbuong ti paltogko.”
Kalpasan ti nagsasaruno a panagpaltogko, inkeddeng daytoy bassit a gayyem a napeggad ti pannakipulapol kadagiti tao isu nga isut’ sidadaras a naglibas. Nupay saanda a nakapangan, dagiti mabisin a Bushmen a kakadua ni van der Post ket naragsakan. Apay? Dayawen unay dagiti Bushmen dagiti kababalin ti steenbok, ket nagtignay daytoy kas iti ninamnamada. “Iti intero a nadagaang nga aldaw,” inayon ni van der Post, “inladawan manen ti panunotko daydiay naamo a bassit nga ugsa a sitatakder a kasla di nasingsinga iti nagsasaruno a panagpaltogko.”