“Usigen Manen Dagiti Doktor ti Panangyalison ti Dara’’

‘‘Programa a Tumulong Kadagiti Saksi ni Jehova Adda Pagsayaatanna iti Tunggal Maysa”

Iti sidong dagitoy a paulo iti Rocky Mountain News, agipadamag ti mannurat a ni Kris Newcomer: “Nasurok a 100 a doktor iti Denver ti naguummong a tumulong iti iglesia dagiti Saksi ni Jehova, isu a mangibilang iti dara a maysa a sagrado a banag a saan a mabalin nga idonar wenno iyalison bayat ti operasion ken kadagiti dadduma pay a pamay-an ti panangagas.” Kinuna ni Dr. Greg Van Stiegmann iti Bloodless Medicine and Surgery Program idiay University Hospital idiay Denver, Colorado, Estados Unidos: “Ti napasamak ket nangorganisarkami kadagiti miembro ti faculty a mayat a mangbalbaliw iti panangaramidda kadagiti bambanag.”

Kinuna ni Van Stiegmann a nupay no ti programa ipaayna ti pagayatan dagiti Saksi ni Jehova, saan laeng a dagitoy ti agkedked nga umawat iti dara. Umad-adu dagiti tao a nasaysayaat ti kasasaadda no saanda a mayalisonan ti dara. “Ikagkagumaanmi no mabalin ti saan a mangiyalison iti siasinoman. . . . Adda dagiti nagsayaatan nga impormasion a magunggun-odan kadagiti nagadu a panangadal a mangisingasing a ti kamaudianan a pamay-an iti panangikagumaan a mangagas iti sakit a kanser iti damo pay laeng a pannakaopera ket nasaysayaat no saanka a nayalisonan sakbay wenno kalpasan ti operasion,” kinuna ni Van Stiegmann.

Kinuna pay ti artikulo: “Ti panagbalbaliw iti panangmatmat iti moderno a medisina ket damag nga anamongan dagiti napattapatta a 10,000 a Saksi ni Jehova idiay Colorado. Ti libro ti Genesis iti Daan a Tulag naglaon iti sasao a: ‘ti lasag agraman ti biagna, nga isu ti darana, saanyonto a kanen,’ a kadagiti Saksi kaipapananna nga awan ti maipauneg a dara iti aniaman a pamay-an, agraman ti panangyalison.”