Addaan Kadi ti Sungbat Dagitoy a Relihion?
ITI sidong ti moral a pannakariribuk maipapan iti parikut iti aborsion, adut’ mangsapul iti pannakaiwanwan kadagiti naespirituan a panguloda. Kasano ti isusungbat dagitoy?
Napinget ti takder ti Iglesia Katolika maibusor iti aborsion, nga isursurona a mangrugi ti biag iti panawen ti pannakainaw. Dadduma a papadi kasta unay ti pannakaigamerda iti politika ket awaganda ti papa a mangilaksid kadagiti politiko a Katoliko a manganamong iti aborsion. Nupay kasta, adu a Katoliko ti manganamong iti aborsion ket kalikagumanda ti pannakawayawaya.
Ipadamag ti Presbyterian Church (E.U.A.) nga 46 porsiento kadagiti pastor ti “di mamati iti isursuro ti Biblia a ti aborsion ket dakes.” Ti opisial a takder ti simbaan ket anamonganna ti aborsion.
Ti maika-16 a General Synod iti United Church of Christ inkeddengna nga ‘itandudona ti kalintegan ti lallaki ken babbai a maaddaan iti nasayaat a serbisio ti panagplano ti pamilia ken ti natalged a legal nga aborsion kas maysa a pagpilian.’
Kuna ti pagalagadan ti Evangelical Lutheran Church a ti aborsion “rumbeng a maibilang a maudi nga addang nga alaen no amin a pamusposan saan a nagballigi”; ket agkedked a mangibilang iti aborsion a “basol” wenno mangikuna a ti “biag mangrugi iti pannakainaw.”
Napinget a busoren ti Southern Baptist Convention ti aborsion. Ngem kunaen ti American Baptist Church: “Nabingaykami maipapan iti pagalagadan ti simbaan maipapan iti kasasaad ti aborsion. Kas banagna, bigbigenmi ti wayawaya ti tunggal indibidual a mangitandudo iti pagalagadan ti publiko maipapan iti aborsion isu a mangiparangarang ti pammatina.”
Nabingay ti Judaismo, ti sangana nga Orthodox kaaduanna busorenda ti aborsion, ket ti Reform ken Conservative Jews kaaduanna anamonganda ti aborsion.
Palubosan ti Islam ti aborsion iti umuna nga 40 nga aldaw ti biag ngem maigapu laeng iti panagpeggad iti biag ti ina. Kuna ti Hadith a ti sikog ket “adda iti porma a bin-i iti 40 nga aldaw, kalpasanna isut’ nagbalay a dara iti kasta met laeng a kawatiwat ti tiempo, kalpasanna agbalin a sangkatipkel a lasag iti kasta met laeng a kawatiwat ti tiempo, kalpasanna . . . maibaon kenkuana ti anghel a mangipuyot ti anges ti biag kenkuana.”
Awan ti opisial a takder ti Shintoismo ket ipalubosna ti personal a pangngeddeng maipapan iti aborsion.
Dagiti Hindu, Budista, ken Sikh isuroda ti kaaduan a panagraem iti biag. Ngem saanda a naigamer kadagiti debate maipapan iti isyu nga aborsion, ta mamatida iti reinkarnasion; ti aborsion ibaonna laeng ti di pay naipasngay nga ubing iti sabali a biag.