No Makasao La Koma Dayta a Figurine!
“PANGAASIM ta an-annadam! Diak kayat a mabuong dayta!” kastat’ masansan a kunaen ni Jane bayat nga ipakitanak iti gagayyemna, nangruna no ti maysa kadakuada gandatennak nga iggaman. Sabagay, napategak unay. Ket ammok nga ipatpategdak da John ken Jane—nakaan-annad ti panangiggemda kaniak. Ngem kinapudnona, saanak a nalaka a mabuong.
No kitaen dagiti masmasdaaw a tao dagiti matak a siaannad a naipinta, masansan a maragsakanak man unay kadagiti napateg a pamay-an tapno mabukelak. Awan tao a makaitured a lumasat iti kasta unay karigat a kapadasan! Makapainteres nga isalaysay dayta.
Narikut a Pangrugian
Ti sekka (China clay), ti kangrunaan a pakabuklak, ket magiling agraman ti puraw a granite ken napulbos a tulang ti ayup sa malaokan iti danum. Masapul a kalalainganna ti panaglalaokda. Ikkaten dagiti electromagnet ti aniaman nga iron a mabalin nga adda iti pimmalet a likido, wenno slip (damili) nga isut’ pangawag dagiti adda iti industria ti figurine, sa kalpasanna, mapespes a naimbag tapno maikkat ti danum agingga a dayta ket kas immalsan a Plasticine.
Kalpasanna, maikabil ti slip iti dakkel a makina a pagmasa tapno gamasen. Maysa a bomba a vacuum ti mangikkat iti amin a labutab, a mamagbirri iti sekka no maiyurno dayta.
Nangaramid ti nangdisenio kaniak iti maysa a pagtuladan nga agarup 13 porsiento a dakdakkel ngem iti pagbalinakto. Ket di pakasdaawan! Bumassitak inton maiyurnoak iti mamitlo inggat’ mamimpat a daras ti kabarana—manipud 800 inggat’ 1,200 degrees Celsius. Ket, wen, adu pay a bulan a panagtrabaho sakbay a makaisemak kadakayo. Palubosandak pay a mangisalaysay.
Panamagsisilpo iti Paspaset
Pagarupyo aya no binukeldak a kas maysa a pedaso? Kastat’ pagarup ti dadduma, ngem kinapudnona, saan a kasta. Adut’ pasta a nakaimoldeak a mangikkat iti agneb tapno tumangkenak a naimbag. No lukatanen ti managdamilik dagiti moldena, addaakon sadiay, ngem nagsisina pay laeng ti paspaset ti bagik—adtoy ti ulok, adda idiay ti gurongko, sabalit’ nakaikabilan ti paldak. Anian ti panangseggak a pagsisilpuendan ti paspaset ti bagik!
Siaannad itan nga iggamannak ti managdamilik. Maragsakanak ta nakitana ti nakersang nga iking dagiti paset ti bagik gapu iti molde. Siaannad a dalusanna ida, agraman dagiti rugit a naisurot iti ulok. Ay, sumaysayaat met laengen ti riknak! Sisisigo nga isugponnan dagiti takkiagko iti bagik, a kitaenna no umiso met laeng ti pannakaipuestoda. Kas iti kinasigo ti maysa a siruhano, pagsusugpunen ken kambingenna agingga nga awanton ti mangipagarup a naminsan ket nagsisina dagiti paset ti bagik.
Ita, makatakderakon tapno maipamaga. No awanen ti agparang a birri, nakasaganaakon a maiyurno. Mapabara ti urno, ket siaannad a maipisokak iti dayta, agraman ti dadduma pay a figurine.
Dekorasion
Kuna ti maysa a mangsukimat iti pannakabukelko, “Nagsayaat unay!” Naanamongan ti pannakaaramidko, isu a nairamanak metten kadagiti maikabil idiay paglakuan kadagiti dekorasion. Makalupkopanakto iti pangpasileng a maawagan glaze, a kaipapananna a maitabnawak iti maysa nga espesial a likido (vat). Maiyurnoakto manen ngem rummuarakto a sumilsilap ken nasileng, nakasagana a mapintaan iti nadumaduma a kolor.
Mano-mano ti pannakapintak, isu nga awan ti figurine nga agkakaingas. Masapul ti adu a tawen a panagsanay, ket kunaen ti babai a mangpinta kaniak a masapul nga iggamannak a naimbag ken pintaannak ngem iti apagbiit laeng. Ta no saan, agparang dagiti linea inton namagan ti pinta.
Kursunadayo met laeng dagiti matak? Isudat’ karigatan a pintaan. Maysa nga aldaw nangngegko ti maysa a pintor a nagkuna iti gayyemna a masapul nga iggamannak a naimbag iti maysa a bangko ket uray la a di aganges agingga a naipintanan dagiti matak, taotaona, ken kiday. Ti panaganges wenno bassit laeng a panagkuti ti mangdadael a dagus iti panangipintana kadagiti matak, nangngegko a kinunana.
Ita kompleton ti langak, ket naawaganak Autumn Breeze. Iti lansadko, siaannad a naipigket ti mismo a naganko ken ti nagan ti nangaramid kaniak—selio ti pananganamong, mabalin a kunayo. Maudi daytan a panangtarimaan iti langak, ket nakasaganaakon a mapan iti sadinoman ditoy lubong.
Kinapudnona, naaramidak tapno mailako ket naipanak idiay Inglaterra a sadiay ti nakakitaan ni John kaniak. Maragsakanak ta nakitanak. Maragsakan unay ni Jane a baketna idi inregalonak idi maika-25 nga anibersario ti panagkasarda. Daydi ti damo a nangngegko ni Jane a nagkuna: “Masapul nga an-annadanta! Diak kayat a mabuong dayta!” Makaparagsak a maammuan a natalgedak kadakuada. Ket mayat man ti mangay-ayo—ken maipatpateg.
[Dagiti ladawan iti panid 26]
Pagsisilpuen ti managdamili ti nadumaduma a paset ti [bagi ti] figurine sakbay a maiyurno
Ti damili (slip) manipud iti pagmasaan maikabil iti moldena
Pananglukat kadagiti molde
Kalpasan ti pannakapasileng, mano-mano a mapintaan ti figurine iti nadumaduma a kolor
Sisisigo a maipinta dagiti paset ti rupana
[Credit Line]
Amin a ladawan: Impaay ti Royal Doulton
[Picture Credit Line iti panid 25]
“Autumn Breeze,” impaay ti Royal Doulton