Pudno Kadi a Madangrannakayo ti Musika?
PANUNOTENYO daytoy: Awisennakayo ti maysa nga am-ammoyo iti maysa a pangmalem idiay balayna. Pinatganyo. Bayat a lumabas ti rabii, naammuanyo ti adu a nakaam-amak a bambanag maipapan iti nangsangaili kadakayo. Naranggas ti kababalinna, agannayas nga agbekkel, agus-usar kadagiti naalas a pagsasao, ket itantandudona ti panagdayaw iti Diablo. Ita, tarigagayanyo kadi ti makikadua kenkuana iti sabali pay a rabii? “Saan!” sumungbatkayo.
Kasta met, no in-rekord ngay daytoy nga am-ammo dagiti tiritir a pammati ken kababalinna iti dayta a rabii sa inikkannakayo ti tape? Dangranyonto kadi ti bagiyo babaen ti maulit-ulit a panangpatokar iti dayta? Siempre saan.
Nupay kasta, minilion ti mangdangran iti bagbagida iti kastoy a pamay-an. Kas banagna, adu a dumngeg itoy a musika matuladda ti kapanunotan ken kababalin nga iparparegtana.
Ania a musika ti tuktukoyentayo? Dagiti dakes nga impluensia a masarakan iti dandani amin a kita ti musika. Pagay-ayat man ti maysa ti klasikal, jazz, wenno dadduma pay a musika, masapul ti panagannad ken kinapili.
Nupay kasta, adda dadduma a kita ti musika a nakabatbatad a mangiparang kadagiti kadadaksan a tema. Mangiparang daytoy iti naisangsangayan a karit. Deskribiren ti U.S.News & World Report ti kangrunaan a tema ti heavy metal a musika a kas “nihilismo dagiti tin-edyer, a kompleto kadagiti kalalainganna a naranggas a sekso ken sagpaminsan a kapanunotan iti panagbekkel.” Saritaen ni Dr. David Elkind dagiti dadduma a grupo iti rock a “nakadakdakes no maipapan iti naalas a sao ken kababalin ta iparangarangda ti dakes a kasasaad ti intero nga industria ti musika a rock.” Iti dadduma a lugar, adda dagiti plaka ken tape a naikkan pay iti pakdaar gapu iti nakaal-alas a linaonda.
Nalabes laeng kadi ti panagamak dagiti tao iti musika a dida pagay-ayatan, wenno adda pudno a pakaseknan? Kitaentayo a naimbag ti dadduma a musika a rock a makagkagtengen iti kaaduan a tattao babaen kadagiti plaka ken tape, video a musika iti telebision, ken dagiti konsierto dagiti kumakanta. Usigenyo no kasano a maapektaran ti tattao iti dayta. Kalpasanna ikeddengyo no di makadangran a pagraragsakan daytoy a paglinglingayan wenno sabidong ti isip. Dayta kadi ti rumbeng a kanayon a pakikaduaan wenno dengdenggenyo wenno ti pamiliayo?