Moderno a Musika​—Panangliklik Kadagiti Pakadangran

IKALINTEGAN ti dadduma dagiti pagimbagan ken pagdaksan ti panangsukimat tapno ikkaten dagiti dakes a paset ti musika a rock. Supiaten ti dadduma dagiti makadangran nga epektona kadagiti tin-edyer. Ngem no Kristianokayo, maikadua laeng dagitoy iti kangrunaan nga isyu: Kasano nga apektaran ti musika ti relasionyo iti Dios?

Ti Sao ti Dios, ti Biblia, ti mangiwanwan iti biag ti Kristiano. Naglaon dayta kadagiti prinsipio maipapan iti tunggal benneg ti panagbiag, agraman ti panaglinglingay. Dagiti bilin ti Biblia salaknibanna dagidiay natulnog manipud kadagiti dakes ken makadangran. Kasta met, agpannuray ti anamong ti Dios iti panagtulnog iti Saona. Ngarud, dagiti prinsipio iti Sao ti Dios iwanwanda ti panagpili ti Kristiano iti musika. (Salmo 43:3; 119:105; 2 Timoteo 3:16, 17) Ania, ngarud, dagiti Nainkasuratan a pagalagadan a tumulong kadatayo iti panagpilitayo iti musika?

Ti Pannakasapul iti Kinatimbeng

Mamakdaar ti Eclesiastes 7:16: “Dika aglabes nga aglinteg, dika met agsirib nga aglablabes. Apay a dadaelem koma ta bagim?” Sakbay ti panangikeddengyo a dakes ti maysa a musika, imtuodenyo ti bagiyo no ti isyu ket nalabit personal a pagayatan. Laglagipenyo, mabalin a dikay kayat ti maysa a piesa ti musika, ngem daytat’ di mamagbalin iti dayta a dakes a musika.

Ti sabali a bangir daytoy a kinatimbeng ket naiparang iti Eclesiastes 7:17, 18: “Dika agdangkok a napalalo, dika met agmaag. Apay a matayka koma iti sakbay ti tiempom? Naimbag a petpetam koma daytoy, ngem iti daytoy dika ilisi ta imam; ta ti agbuteng iti Dios makalisi kadakuada amin.”

No ngay umimdeng ti maysa a Kristiano iti musika a mangiparegta iti kinaranggas, rasismo, imoralidad, panagdayaw iti Diablo, ken panagbekkel? Ipatuldo ti Efeso 5:3, 4: “Ngem ti pannakikamalala ken ti amin a kita ti kinarugit wenno ti agum, saan man la koma a madukit kadakayo, kas mayannugot kadagiti sasanto; ket uray dagiti naalas a sasao wenno dagiti awan kapapay-anna wenno dagiti panagsursuron, bambanag a di maipaay, no di ket dagiti koma panagyaman.” Wen, dagidiay agtarigagay iti pannakipagayam ken Jehova di mabalin a paglinglingayanda dagiti makadangran a bambanag. Saanda koma nga ikalintegan a no la ket ta dida aramiden dagitoy dakes a bambanag, saan a dakes ti malinglingay kadakuada.

Saan laeng a ti liriko ti maysa a kanta ti mamagbalin iti dayta a naimbag wenno dakes manipud iti panangmatmat ti Kasuratan. Ania ti espiritu nga iparparegtana? Pangngaasiyo ta basaenyo ti Galacia 5:19 agingga iti 23 iti Bibliayo. Ania ti nailista a mangdeskribir a naimbag iti musika a dengdenggenyo? No ti musika umasping “kadagiti aramid ti lasag,” ngarud nalawagen ti panangmatmat ni Jehova iti dayta.

No padasen ti maysa a Kristiano a pagtiponen iti panagbiagna ti sagrado a panagserbi iti Dios ken ti makadangran a paglinglingayan a musika, maammuannanto a pudno a dida agkabagay. Arig dayta ti pananginum iti tubbog ti prutas ken ti sabidong. Saan a malapdan ti tubbog ti prutas ti sabidong iti panangpatayna kadakayo. Nalawag dayta kadagiti sasao ti 2 Corinto 6:14-17: “Saankay a makikadua iti sangol kadagiti saan a manamati. Ta ania ti pakikaduaan ti kinalinteg iti kinakillo? Wenno ania ti pakikaduaan ti silaw ken ti sipnget? Kasta met, ania ti pagtunosan ni Kristo ken ni Belial? Wenno ania ti pakaibiangan ti matalek a tao iti saan a manamati? . . . ‘Gapuna pumanawkayo iti nagtetengngaanda ket suminakayo,’ kuna ni Jehova, ‘ket dikay sagiden ti di nadalus a banag.’”

Dagitoy ngarud, dagiti Nainkasuratan nga isyu a sangsanguen dagidiay agtarigagay iti nasinged a relasion iti Dios. No ipatpategyo dagiti prinsipio ti Biblia, siinget nga usigenyo ti musika a dengdenggenyo. Sukimatenyo a naimbag dagiti koleksionyo a plaka/tape ken video. Ibellengyo dagidiay manglabsing kadagiti prinsipio ti Biblia. No agduaduakayo, ibellengyo met ida. Kasta met laeng kadagiti mabuya a konsierto ken dagiti pagbasaan​—ikkatenyo ti aniaman nga awan pakikaduaanna iti kinalinteg.

Ti Panagpambar

No maawiskayo iti musika a di maitunos kadagiti Nainkasuratan a pagalagadan, nalabit marigatankayo a mangsaranget iti isyu nga awan dasdasiganna. Agpambar ti dadduma iti panangikagumaanda a mangidepensa wenno mangikalintegan ti pannakikompromisoda. No pudno daytoy kadakayo, agtuken ken agpanunotkayo. Nasayaat kadi ti panagrasrasonyo, wenno iparangarangna laeng ti kinasinged ti riknayo iti musika? Usigenyo dagiti sumaganad a panagrason ti dadduma ket paliiwenyo a, no sukimaten a naimbag, dagita a panagrason ket pambar laeng.

Saan a dakes nga imdengak daytoy a grupo agsipud ta dagiti miembrona busorenda ti panangabuso ti droga. Ngem ti kadi grupo natibker a busorenda ti dadduma a dakes nga ar-aramid, kas ti pannakiabig, kinaranggas, ken ti di panagraem iti autoridad? “Ti bassit a lebadura pabussogenna ti amin a masa,” kuna ti Galacia 5:9.​—Idiligyo iti Santiago 2:10.

Nagdakes ti biag ditoy lubong. Mapabasoltay aya dagitoy a banda a mangiyebkas iti pungtotda kadagiti kasasaad ti lubong? Iparegta ti Biblia ti nalinteg a panagpungtot a maibusor kadagiti kinadakes daytoy a sistema ngem itudona ti Mesianiko a Pagarian kas ti solusion.​—Daniel 2:44; Mateo 6:9, 10.

Ti naraniag a namnama ti Kristiano ket naiduma iti nasipnget a kinamanagduadua dagiti adu a musiko a mangitandudo iti nihilismo kas ti solusion ti pakarigatan ti sangatauan. Kinapudnona, ti pungtot ti lubong ket makadadael ken inaanimal, a mangiparangarang ti kinasirib iti sistema dagiti bambanag.​—Roma 12:9; Santiago 3:15-18.

Nakasigsigo dagiti musiko, ket nasanay pay iti klasikal a musika. Ngem awan ti pakainaigan ti kinasigo ti musiko iti panangtingiting iti linaon ti musika sigun kadagiti prinsipio ti Biblia, saan kadi? Nasigo ni Ari Salomon iti nadumaduma a tay-ak, agraman iti tay-ak ti musika. Ngem idi timmallikud iti pudno a panagdayaw, ilanad ti Biblia, “Ni Jehova nakaunget ken Salomon, ta ti pusona naglikud ken Jehova.” Kasta met, nasigo a managbangon ken mangnganup ni Nimrod, ngem isu ken dagiti kakaduana di inanamongan ti Dios. Apay? Agsipud ta ni Nimrod ket “maysa a mannakabalin a mangnganup a maibusor ken Jehova.”​—1 Ar-ari 11:9; Genesis 10:8, 9.

Awan met dakes kadagiti sumagmamano a kanta ti banda, agraman ti dadduma a naalumamay ti ayugda nga acoustic ballad. Ti peggad ditoy ket ti saan a dakes a tono mabalin nga iturongna ti maysa a gumatang ken umimdeng iti intero nga album, a kaaduan kadagitoy ti nalawag a makadangran. Ti maysa laeng a tasa a danum dina maugasan ti sangatambak a pitak, ti sagpaminsan nga awan dakesna a kanta dina baliwan nga interamente ti espiritu ti makadangran nga album wenno banda.

Saan met a pudno a daydayawen dagiti bituen ni Satanas wenno agbiag nga imoral. Agak-aktoda laeng iti entablado. Agtalinaed ti kinapudno a ti us-usarenda a musika a manglinglingay kadagiti managbuyada ket namulitan, no saan a nalapunos, iti kinadakes. Ibilin ti Colosas 3:8 kadagiti Kristiano a saanda nga aglinglingay kadagiti bambanag a kas iti pungtot ken kinasalawasaw, no di ket “idianyo amin ida.” Imbaga ni Pablo kadagiti taga Efeso nga ‘awan koma ti pakikadkaduaan[da] [kadagiti annak ti kinasukir] kadagiti ar-aramid ti sipnget a di agbunga, no di ket babalawen[da] koma ida.’ Ti kadi maysa a tao a malinglingay kadagiti ar-aramid ti sipnget mababalawna dagidiay a mangar-aramid kadagita?​—Efeso 5:6, 11.

Diak dengdenggen ti liriko. Dengdenggek laeng ti melodia. Ngem malagip ti agar-arapaap nga isip dagiti liriko ket mangpataud kadagiti parikut kamaudiananna. Nupay pagarupentayo a ditay laglagipen ti impormasion, mabalin a ditayto malipatan a naan-anay dayta. Anian a nagpeggad, ngarud, a palubosan ti bagitayo a dumngeg kadagiti mensahe a direkta a maibusor iti balakad idiay Filipos 4:8, nga ipamaysatayo ti isiptayo kadagiti aniaman a nadalus, makaay-ayo, ken bambanag a naimbag ti damagda.

Laglagipentay met, a siasinoman nga “agtarigagay a gayyem ti lubong, agbalin a kabusor ti Dios.” Ti makagapu ket ti lubong ti sangatauan a naisina iti Dios ken ti espiritu ti lubong ket nagtaud iti kangrunaan a Kabusor ni Jehova, ni Satanas a Diablo. Ita panunotenyo dayta. Apresiaren kadi ti maysa a lalaki no ti asawana iparangna ti retrato ti dati a kaayan-ayatna uray pay no kunaenna nga awanen ti naisangsangayan a riknana kenkuana no di ket pangdekorasion laeng dayta a ladawan? Saan, dina kayat a makita dayta [idiay balayda] ken panunoten pay ni baketna. Ania ngay no iyawidtayo kadagiti pagtaengantayo ken ipasagepseptayo iti pusotayo ti musika nga agserbi iti panggep ti Kabusor ni Jehova? Adda kadi pagdumaanna no kunaentayo ken Jehova, “Interesadoak laeng iti melodia; diak ikankano ti liriko”?​—Santiago 4:4; 1 Corinto 10:21, 22.

Mangngeddeng a Siinget

No dumdumngegkayo iti musika a mangitamtampok iti kinadakes, ania ti pudno a rasonyo? Mabalin a dikay umanamong kadagiti dakes a kapanunotan, ngem ti musika a mismo mabalin a makaallukoy kadakayo​—ti kompas makaadikto unay, makaapektar unay​—ta basta dikay maliklikan ket dikay kayat nga idian dayta.

Ngem saan a nalaka ti panagaramid iti umiso. Masuboktayo a nangnangruna no ibilin dagiti pagalagadan ti Dios nga idiantayo ti banag a pagay-ayattayo unay. Ikalintegantayo kadi a mailaksid ti kasotayo, ken “agduaduatayo,” wenno ikeddengtayo a siinget nga idian ti aniaman a guraen ni Jehova?​—1 Ar-ari 18:21.

Aniaman dagiti personal a panagsakripisio a nairaman, naragragsaktayto no pilientayo ti makaay-ayo ken ni Jehova. Daytoy kaipapananna a ditay sagiden ti di nadalus. No kasta ti aramidentayo, ikari ngarud ni Jehova nga anamongannatayo. Wen, iramannatayo kadagiti naparaburan a tattaona.​—2 Corinto 6:17.

Pampanunoten ni Jehova ti kasayaatan a pagimbagantayo. Inaramidna ti bilbilinna a mangpasayaat iti kalidad ti panagbiagtayo. Ipangagyo ti napasnek a pakaasina a masarakan idiay Isaias 48:17, 18. “Siak, ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma. O no dinengngegmo koma dagiti bilbilinko. Iti kasta ti talnam kas koma iti maysa a karayan, ken ti kinalintegmo kas la koma daldalluyon ti baybay.”

[Kahon/Ladawan iti panid 10]

Maysa a Rebbengen Dagiti Nagannak

No maysakayo a nagannak, adda Nainkasuratan a rebbengenyo a mangisuro kadagiti annakyo a mangilasin iti nagdumaan ti naimbag ken dakes a musika. Daytoy kaipapananna nga ammoyo a mismo no ania ti dengdenggenda. Dayta kaipapananna a natibker ti pangngeddengyo no ania a musika ti ipalubosyo a denggenda ken dida denggen idiay pagtaengan.

Makirinnasonkayo kadagiti annakyo. Liklikanyo dagiti panagrason a mangpakapuy iti panamatida. Dagiti sasao a kas ti, “Diak maawatan no apay a dengdenggenyo dayta a basura,” mabalin a tignayenna dagiti agtutubo nga ad-adda pay a salimetmetanda a naimbag dagiti personal a pilida. Ti panangitudo iti nababa nga estilo ti panagbiag ti maysa a musiko mabalin a saan met a makakumbinsir, nangnangruna no daytat’ saan a naiparangarang iti musika. Kinuna ti maysa nga agtutubo a lalaki: “No adda agkuna nga amin a musika a rap ket dakes, talaga a pagarupek nga isut’ ignorante!”

Gapuna pakaammuanyo ti bagiyo. Ammuenyo no ania ti panangmatmat ti Dios maipapan kadagitoy a banag. Maragsakan dagiti Saksi ni Jehova a tumulong kadakayo iti daytoy babaen ti panangipaayda kadagiti naibasar-Biblia a publikasion a mangipaay iti ad-adu pay a detalye. Ammuenyo dagiti kinapudno. Pagbalinenyo a nalawag a ti isyu ket maipapan kadagiti pagalagadan ti Biblia ken saan a ti panangipapilit iti personal a pagayatanyo kadagiti annakyo.​—Efeso 6:4.

[Ladawan iti panid 9]

No dumngeg ti Kristiano iti makadangran a musika, mabalakadannanto kadi dagiti dadduma a saan a dumngeg iti dayta?

[Ladawan iti panid 11]

Naragragsakkayto no ibellengyo dagiti karimon ni Jehova