Panangmatmat iti Lubong

Panagannad iti Pacemaker

Dagiti detektor iti panagtakaw a naikabit ita iti adu a tiendaan ken shopping center ket mabalin a maysa a peggad iti salun-at dagiti tao nga adda elektroniko a pacemaker a mangkontrol iti panagbitik ti pusoda. Ipadamag ti magasin ti Francia a Le Concours Médical a napakaammuan dagiti doktor idiay Francia gapu iti parikut ti maysa a pasiente nga agtartrabaho iti maysa a supermarket a nangireklamo a kasta unay ti panagbitik ti pusona iti tunggal iyaasidegna kadagiti check-out counter ti tiendaan. Iti panangsubokda iti nasurok a 30 a nagduduma a kita ti pacemaker, natakuatan ti timpuyog dagiti doktor a ti elektromagnetiko a puersa a parnuayen dagiti detektor iti panagtakaw ti nakaigapuan ti saan a nasayaat a panagandar ti kaaduan a pacemaker, no dadduma nakarkaro pay. Mamakdaar dagiti doktor a masapul nga ammo dagiti adda pacemakerda daytoy a peggad.

Makapapatay a Seremonia

Immawat itay nabiit ti maysa a klinika idiay San Antonio, Texas, iti karkarnat’ kaaduna a kiddaw dagiti babbalasitang nga agpaeksamin no addaanda iti AIDS. Impalgak ti maysa nga imbestigasion a makidendenna dagiti babbalasitang nga awan us-usarenda a pangsaluad iti mabalin a pannakaakarda iti sakit kadagiti “kameng ti maysa a barkada nga addaan iti HIV” kas paset ti maysa a seremonia. Sigun iti Daily News ti Nueva York, kinuna dagiti opisial a dagiti babbalasitang nga agtawen iti 14 ken 15 “ket makidendenna tapno agbalinda a kameng ti barkada” ken tapno “paneknekan a saanda a maakaran iti virus ti AIDS.” Kaaduan kadagiti babbalasitang ti makibarkada tapno mariknada ti ayat ken nam-ay nga awan idiay pagtaenganda. Ngem ti biag ti maysa a barkada ti ad-adda a mangisarang kadakuada iti kinaranggas, kinalulok, ken iyakar ti sekso a saksakit. Iti panangdakamatna iti kinuna ti maysa nga opisial, kinuna ti Daily News a “kaaduan kadagiti babbalasitang ket naggapu kadagiti nasinasina a pamilia. Kaaduan kadakuada ti inabuso dagiti kameng ti pamiliada.”

Saan Kadi a Matengngel ti AIDS?

Saan kadin a matengngel ti sangalubongan a panagsaknap ti AIDS? Mabalin a kasta, kuna ti maysa a 1,000-panid a report nga inurnong ti Global Aids Policy Coalition idiay Harvard University sadi Estados Unidos. Sigun iti The Guardian Weekly, ipakita ti report nga awan pagilian a makabael a mangpasardeng iti panagsaknap ti AIDS ket dagidiay agkuna a bumasbassiten ti sakit idiay Europa ket mabalin a nagbiddutda. Kuna ti report: “Kumarkaro ti epidemia ti HIV/Aids. Bayat a kumarkaro ti panagpeggad ti lubong, umad-adu ti di mangikankano, kanayon a mangilibak, ken ad-adda a mangidumduma.”

Pannakariribuk Dagiti Trabahador a Babbai

Impalgak ti nabiit pay a surbey idiay Toronto Hospital, Toronto, Canada, a 70 porsiento kadagiti trabahadorna a babbai ti nagreklamo a mariribukda iti sekso kabayatan ti panagtrabahoda. Sigun iti The Toronto Star, 2 porsiento kadagiti babbai ti mangipadamag a narautda iti sekso, ket 1 porsiento ti nangipadamag a naallilawda panggep iti sekso. Kunaen ti kaaduan kadagiti babbai nga “awaganda [ida] iti awanan panagraem wenno di maiparbeng” ket dakkel a porsiento “ti nangireklamo iti pannakaangawda maipapan iti sekso.” Ipadamag ti Star a ngangngani 60 porsiento kadagiti trabahador a babbai “ti makarikna a masansan nga agpegpeggadda iti dadduma a paset” ti ospital.

Klase iti Biblia Idiay Unibersidad ti Japan

Ipalgak ti nabiit pay a surbey dagiti estudiante iti departamento ti literatura ti nalatak a Waseda University ti Japan nga “adu nga estudiante ti magagaran a makasursuro iti ad-adu maipapan kadagiti kadaanan a literatura ken nangnangruna iti Biblia, a naamirisda a kasapulan tapno maawatanda dagiti ganggannaet a kultura,” ipadamag ti The Daily Yomiuri. Ti unibersidad, a nakagun-oden iti pakabigbigan iti tay-ak ti literatura, ti nangnayon kadagiti klase ti Biblia kadagiti kursona a nangrugi idi semestre ti primavera ti 1993. Yantangay inikkan ti Ministri ti Edukasion dagiti unibersidad iti ad-adu a wayawaya a mangpasayaat kadagiti programa ti panangisuroda dua a tawenen ti napalabas, damo unay idiay Japan ti panangipalubos kadagiti estudiante a makipaset iti pannakaisagana ti kurikulum ti eskuelaan.

Ti Panangdangran ti Panag-jogging

Maminsangapulo a daras nga ad-adda a dangran ti panag-jogging dagiti susuop ti bagi ngem iti panagbisikleta, sigun iti maysa a panagadal idiay Orthopedic University Clinic sadi Berlin, Alemania. Babaen ti panangusarda iti maysa nga artipisial a patong a nairanta a maaramat iti dayta a panggep, iti damo unay a gundaway, nagballigi dagiti sientista idiay unibersidad a mangammo iti pannakadangran ti tunggal susuop kabayatan ti nadumaduma nga aktibidad. “Nupay datin a naipapan nga ad-adda nga umirteng ti susuop dagiti managjogging ngem kadagiti agbisbisikleta,” ipadamag ti Süddeutsche Zeitung, “uray mismo dagiti managsirarak ket naklaat iti kasta unay a panaggiddiat.”

Umadu Dagiti Ubbing a Balangkantis Idiay Asia

“No sangapulo ti tawenmon, balasangkan, no duapulon, baketkan, no tallopulo, nataykan.” Dayta, sigun iti magasin a National Geographic Traveler, ti pangkaaduan a pannao maipapan kadagiti ubbing a balangkantis ti Bangkok, Thailand. Agarup maysa a milion ti ubbing a balangkantis ti Asia, adu kadakuada ti awan pay sangapulo ti tawenda. Ti turismo, kuna ti magasin, ti mangbibiag iti daytoy rumangrang-ay [nupay] ilegal nga industria. Adu nga organisasion a pedophile idiay Australia, Japan, Estados Unidos, ken Makinlaud nga Europa ti mangitantandudo kadagiti ‘sex tours’ kadagiti dagdaga ti Asia. Impadamag itay nabiit ti The Times ti Londres nga iti kada tawen, agarup 5,000 a babbalasitang ti “naawis” manipud kadagiti kabambantayan ti Nepal tapno agbalin a balangkantis kadagiti night club idiay Bombay, India. Agarup 200,000 ti addan sadiay, agarup kagudua kadakuadan ti naakaran iti HIV, ti virus a pakaigapuan ti AIDS. Maysa a dakkel nga organisasion ti negosio ti mangipatulod pay ketdi iti babbalasitang idiay Makinlaud nga Europa ken idiay Estados Unidos.

Napartak a Panagdayaw

“Apay a masapul a mangrugi ti maysa a misa iti alas 11 t.b. sa agpaut iti maysa nga oras wenno nasursurok pay?” Dayta a saludsod, nga inyimtuod itay nabiit ti maysa a pastor ti Baptist idiay Florida, E.U.A., sigun iti padamag ti Associated Press a nagparang iti Times-West Virginian, ti nangituggod iti maipadles a solusion. Intukon ti pastor ti “Napagmaymaysa ken Napaababa a 22-Minuto a Misa” a kunana, a mangtedto iti gundaway kenkuana a “mangipalawag iti sermon, mangidaulo iti panagkanta, mangibasa iti Kasuratan, mangikararag, sana pagawidenen dagiti miembro ti kongregasionna.” Ti la sermonen ket limitadonto iti walo a minuto, a mangipalubos iti pastor nga “ipakat idiay simbaan ti ar-aramiden ti [pangbiitan a restaurant ti] McDonald no taraon ti pagsasaritaan,” sigun iti Associated Press. Ngem, kuna pay ti padamag, “adunto a tiempo ti mabusbos iti panagkolekta ti kuarta kadagiti timmabuno.”

Panangpasardeng iti Dengue Fever

Ipakita ti maysa a panagadal idiay Thailand ti maysa a namnama a maparmekton ti dengue fever, maysa a sakit a mangsaplit iti ag-100,000 a tao iti dayta a pagilian iti kada tawen. Mammano met ketdi a makapapatay ti dengue fever, ngem idiay Abagatan a Daya ti Asia, masansan a pakaigapuan iti makapapatay a sakit dagiti ubbing. Ti lamok nga Aëdes aegypti ti mangiwaras iti dengue fever. Ngem, dagiti programa nga agpannuray kadagiti insektisidio tapno mapaksiat ti sakit ket napaneknekan a saan a nagkurri, nangina, ken saan a nalatak, sigun iti Medical Post ti Canada. Itay nabiit, naammuan dagiti sientista ti Mahidol University idiay Bangkok a ti kadawyan ken kangrunaan a pagbalayan dagiti lamok isu dagiti dadakkel a burnay nga iduldulin dagiti tao kadagiti balayda. Isu a namartuatda kadagiti kalub dagiti burnay a maiplastar a naimbag kas dagiti plastik a kalub ti ulo bayat ti panagdigos, ngem kaskasdi a mabalin nga ikkaten ti danum sa makargaan manen. No nasayaat ti pannakausarna, dagiti kalub ket 100 porsientot’ kinaepektiboda iti panangpatay kadagiti mangaw-awit ti sakit nga itlog ti lamok, kuna dagiti sientista. Napaliiw dagiti purok a mangus-usar kadagiti kalub a nagbalin a 0.4 porsiento ti dati a 11 ken 22 porsiento a nagsakit iti dengue fever.

Panangpainana iti Nabannogan a Matmata

No nabannogan ti matayo gaput’ panagbuya iti telebision wenno computer, mabalin a makainana no ikitayo dagita iti pangato ken pababa. Daytoy a singasing, manipud ti New England Journal of Medicine, ket naibasar iti panangipapan a mammano nga agkirem dagiti tao ken ad-adda nga agmulagatda no kumitada iti diretso ngem no nakadumogda. Ti saan unay a panagkirem kaipapananna ti saan unay a pannakalana dagiti mata, ket ti ad-adda a panagmulagat ti mangpamaga iti mangsalaknib a suson ti mata.

Mailako a Simsimbaan

Saan nga ammo ti Iglesia Romana Katolika idiay Italia ti eksakto a bilang dagiti kukuana a narelihiusuan a patakder, ngem maysa a banag ti sigurado: Saanna a mamantinir amin ida. Inaldaw nga umad-adu dagiti nabaybay-an a patakderna nga agrakrakaya. Gapuna, kinuna ni Pietro Antonio Garlato, presidente ti Council for the Cultural Heritage ti Iglesia ti Italia, a madama a tingtingitingen ti iglesia no ilakona met laeng dagiti sumagmamano a patakderna a saanen a maus-usar iti relihiuso a panggep. Mano a patakder ti mailako? “Iti maysa a pattapatta,” inlawlawag ti obispo iti Il Messaggero, “ipamatmatna ti 10 porsiento” ti nasurok a 95,000 a simbaan idiay Italia.

Napigsa Unay nga Uni

Impalnaad ti maysa a nabiit pay a panagadal idiay Berlin, Alemania, nga adu a tao ti agbibiag a napeggad gapu iti napigsa unay nga uni. Kunaen ti periodiko a Süddeutsche Zeitung nga 40 porsiento kadagiti apartment ti siudad ket masarakan kadagiti kangrunaan a kalsada, a “sadiay kanayon a napigsa dagiti uni.” Kinapudnona, no aldaw, ti uni ti 95 porsiento kadagiti amin a kuarto nga adda iti igid ti kalsada lab-awanna ti maawat a kalalainganna a kapigsa ti 65 decibel. Iti kakalima kadagidiay a kuarto, ti kapigsa ti uni ket 75 decibel. Napigsa met ti uni no rabii nangruna kadagiti amin a kalsada a nasurbey. Ti napigsa unay nga uni dadaelenna ti komunikasion, konsentrasion, ken nasayaat a magapuanan a trabaho.