Naalangon Dagiti Saksi ni Jehova iti Dangadang Maipapan ti Panangaywan iti Ubing
MAKIDANGDANGADANG ni Ingrid Hoffmann tapno maaywananna ti dua nga annakna nanipud pay idi ngalay ti napalabas a dekada. Kas maysa a babai a taga Austria, isut’ naipasngay ken napadakkel a Romano Katoliko. Nakiasawa iti padana a Katoliko, ken nangipasngay iti maysa a lalaki idi 1980 ken maysa a babai idi 1982. Ngem nagdiborsio ti agassawa idi 1983; agpada dagiti nagannak nga agkalikagum iti panangaywan kadagiti ubbing. Inakusar ti ama a ti relihion ti ina—isut’ nagbalin a maysa kadagiti Saksi ni Jehova—ket makadangran kadagiti ubbing, ikedkedna kadakuada ti maysa a normal, makapasalun-at a panangpadakkel. Dinakamatna dagiti isyu kas ti panagmadi dagiti Saksi a mangselebrar iti sumagmamano a piesta opisial a gagangay iti pagilianna ken ti panagkedkedda nga agpayalison iti dara.—Aramid 15:28, 29.
Di nakakumbinsir dagitoy nga ulbod nga argumento. Inlaksid ti korte ti ili ken korte de apelasion dagiti pammabasol ti ama ket inyawatda ti panangaywan iti ina. Nupay kasta, idi Setiembre 1986, binaliktad ti Korte Suprema ti Austria ti desision ti nababbaba a korte. Kinunana a dagitoy a desision ti nanglabsing iti Religious Education Act ti Austria, maysa a linteg a mangikalikagum kadagiti naipasngay a Katoliko a masapul a masursuruan kas Katoliko. Imbilin pay ti korte a saan a pagimbagan unay dagiti ubbing no mapadakkelda kas Saksi ni Jehova!
Aniat’ inaramid ni Ingrid Hoffmann maibusor iti kasta a nabatad a panangidumduma iti relihion? Idi Pebrero 1987, naidatag ti kasona iti European Commission of Human Rights. Idi Abril 13, 1992, daytoy a komision, a buklen dagiti hurado a mangibagi iti sumagmamano a kameng ti Council of Europe, ti naan-anay a nangbista iti kaso iti saklang ti European Court of Human Rights.
Nagdesision ti korte idi Hunio 23, 1993. Kinunana: “Nausig ngarud ti European Court nga adda naiduma a pannakatrato, ket ti panangidumduma ket maigapu ti relihion; daytoy a konklusion ket suportaran ti tonada ken wagas ti panagrason ken naisurat nga opinion ti Korte Suprema [ti Austria] maipapan kadagiti praktikal nga ibunga ti relihion ti aplikante. Dayta a naiduma a panangtrato ket mangidumduma.” [Kuami ti italiko.] Kinunana pay a ti Korte Suprema “tiningitingna dagiti kinapudno a naiduma ngem kadagiti nababbaba a korte, a ti panagrasrasonda ket ad-adda a sinuportaran ti opinion ti maysa nga eksperto iti sikolohia. Malaksid pay iti aniaman a mabalin a maikontra nga argumento, ti pannakaiduma a nangnangruna a naibasar iti panagduma laeng ti relihion ket saan a maawat.”
Babaen ti butos a lima kontra uppat, ti desision dagiti hues ket pabor ken Ingrid Hoffmann ken maibusor iti Austria, a kinunada, a maigapu iti panangidumduma ti Austria kenkuana gapu iti relihionna ken ti pananglabsingda iti kalinteganna nga agpamilia. Kanayonanna pay, babaen ti butos a walo kontra maysa, isut’ inikkan dagiti hues iti kuarta kas daños.
Dimteng daytoy a naisangsangayan a balligi para iti wayawaya ti relihion makabulan laeng kalpasan ti maysa pay a balligi iti isu met laeng a korte—ti kaso a Kokkinakis v. Greece, a nangpasingked a linabsing ti Grecia ti kalintegan ti tao a mangisuro iti Sao ti Dios iti binalaybalay. Agrag-o dagiti managayat iti wayawaya iti intero a lubong no dagiti gandat a manglapped iti wayawaya ti relihion ket mapaay ken masalakniban dagiti personal a kalintegan nga agdayaw iti Dios ken agpamilia a maitunos kadagiti prinsipio ti Biblia.