Daydiay Mangsalaknibto iti Atap a Biag
MANIPUD ti panagbannawag ti historia ti tao, naay-ayo ti tao iti panagadal kadagiti atap nga ayup. Nakalkaldaang, nupay kasta, kalpasan ti panangipalubos ti Dios iti tao a manginayon iti karne iti taraonna, ti panangapresiar iti atap a biag nagtungpal iti awan arnasna a panangpapatay ken naranggas a panaganup gapu iti tropeo.—Genesis 2:19, 20; 9:2; 10:9; 25:27.
Ngem nagtultuloy a naay-ayo ti dadduma a tao kadagiti atap a biag ditoy daga. Agarup 3,000 a tawen a napalabasen, dagiti sasao iti Salmo 104 ket insurat ti maysa a managayat iti atap a biag. Ninagananna dagiti nadumaduma nga atap a parsua, kas dagiti zebra, leon, atap a kalding, koneho, ken ti kannaway. Manipud iti panagadalna kadagiti billit, kanta ti billit, ken dagiti atap nga animal, natignay ti salmista nga agdayaw: “Nainsiriban ti panangaramid [ni Jehova] kadakuada amin.”—Salmo 104:10-12, 17-21, 24.
Kinapudnona, ni Jehova a Dios siuumiso a maay-ayo kadagiti nagpintasan nga ar-aramidna iti panamarsua. (Genesis 1:31) Gapuna, masiguradotayo a dinanto ipalubos a mapukaw dagiti nabatbati nga atap a biag ditoy daga. Maitunos iti dayta, pinaltiingan ti Dios ti salmista a mangirekord iti impormasion a rumbeng nga agbalin a naimbag a damag kadagiti amin a managayat iti atap a biag. Naibaga a “ti daga . . . dinto maisina uray kaanoman, wenno iti agnanayon.” (Salmo 104:5) Ti kasta a pannakaseknan iti agnanayon a pagimbagan daytoy a planeta sigurado nga iramanna dagiti parsua nga agbibiag iti dayta. (Isaias 45:18) Pinaneknekan ni Jesu-Kristo ti pannakaseknan ti Dios kadagiti atap a parsua idi kinunana: “Saan a malako aya ti lima a billit tuleng iti dua a sinsilio a bassit ti pategda? Ket uray maysa kadakuada awan ti malipatan iti imatang ti Dios.” (Lucas 12:6) Ti pannakaseknan ti Dios kadagiti parsuana naitampok met idiay Salmo 104, bersikulo 14, isu a mabasa: “Pagtubuenna ti root a maipaay kadagiti ayup, ken ti natnateng nga agserbi iti sangatauan, tapno parnuayenna ti taraon iti daga.”
Maitunos kadagitoy a kinapudno, dinto palubosan ni Jehova a Dios ti tao a mangilibak kenkuana iti agnanayon ken isu a mamagpeggad iti masanguanan ti daga ken dagiti atap a biag nga adda kenkuana. Iti panangipaganetgetna itoy, nagturpos ti Salmo 104 kadagitoy a mangipanamnama a sasao: “Dagiti managbasol maibusda koma ditoy daga, ket maawan koma dagiti nadangkes.”—Salmo 104:35.
Anian a makaliwliwa a maammuan a ti Dios inyebkasna ti pangngeddengna a “mangiyeg iti panangdadael kadagidiay a mangdaddadael iti daga.” (Apocalipsis 11:18) Iti dayta a tiempo dagiti dadduma a padto a matungtungpalen iti piguratibo a pamay-an addaandanton iti literal a kaitungpalan. Kas pangarigan, babaen iti mammadtona nga Oseas, kinuna ni Jehova a Dios: “Ket iti dayta nga aldaw mangaramidakto iti maysa a tulag a maipaay kadagiti an-animal ti tay-ak, ken kadagiti tumatayab ti tangatang ken kadagiti agkarayam ti daga; dadaelekto ti bai ken ti kampilan ken ti panagbabakal iti daga, ket pagiddaekton ida a sitatalged.”—Oseas 2:18; Isaias 11:6-9.
Iladawanyo ti bagiyo nga adda iti dayta umay a naindagaan a Paraiso. Anian a nakaay-ayatto dayta a tiempo! ‘Ngem,’ mabalin a kunayo, ‘ania ti kasapulan tapno tawiden dagita a bendision?’ Umuna unay, nasken ti agadal iti Sao ti Dios. Kalpasanna, kadagidiay nga agtulnog iti panangiturong ti Biblia, ipaay ni Jehova a Dios daytoy nakaskasdaaw a kari: “Dagiti nalinteg a mismo ti mangtagikuanto iti daga, ket agtaengdanto nga agnanayon iti dayta.”—Salmo 37:29.