Polis a Nagbalin a Kristiano a Ministro

IDI Pebrero 1942, naibaludak idiay Adelaide, Sud Australia gapu ti panagkedkedko nga agawit iti armas kabayatan ti Gubat Sangalubongan II. Nabigbignak ti barbero, a mangpukisen koma kaniak, kas daydi nagparang kadagiti korte a kameng ti polisia ti Sud Australia. “Aniat’ ar-aramidem ditoy?” sisisiddaaw a dinamagna. Ammona a masansan a nagtestigoak iti korte maibusor kadagiti kriminal. Isu nga inlawlawagko kenkuana dagiti Nakristianuan a patpatiek.

Am-ammonak met a naimbag ti mahistrado a nangbista iti kasok sumagmamano nga aldaw kasakbayanna. Dimngeg met a naimbag bayat nga inlawlawagko no apay a di ipalubos ti Nakristianuan a konsiensiak ti panagawitko iti armas. Kalpasan a nagyaman iti imbilangna a nabatad a panangilawlawag, sinentensiaannak iti makabulan a pannakaibalud.

Ita, dagiti padak a balud isu dagiti tattao a dati a rinetratok ken kinalikagumak a maala ti fingerprint-da. Nupay kasta, naikasabak dagiti patpatiek iti adu a guardia ken balud a nagimtuod maipapan iti Nakristianuan a kinaneutralko.

Iti simmuno a tawen, naikorteak manen, ket nasentensiaanak itan iti innem a bulan a panagtrabaho iti nadagsen. Naipanak idiay Yatala, a yan dagiti balud nga inggat’ tungpal biag ti sentensiada gapu iti pammapatay. Ngem naaddaanak manen iti adu a gundaway nga iranud iti sabsabali maipapan ti namnama ti Pagarian ti Dios ken ti manayon a talna nga ipaaynanto iti daytoy dinadael-gubat a lubong.

Sakbay a nagparangak iti korte iti kada sesion, naipanak kadagiti barracks dagiti soldado. Idi damok sadiay, rinabrabak ken inabusonak ni Lieutenant Laphorn gapu iti panagkedkedko nga agsapata iti kari ti militaria. Ngem idi maikatlon a panagparangko kenkuana, kinunana: “Ammom, impagarupko a takrutka. Ngem sinipsiputak ti panagan-anusmo iti nakas-ang a pannakadusam. Immikkatka iti maysa a nagsayaat a karera ket pinaneknekam ti pammatim babaen ti maulit-ulit a pannakadusam.”

Idi masentensiaanak manen a maibalud iti maikatlo a gundaway, naisumite dagiti petision a mabistaak kas maysa a managkedked gapu iti diktar ti konsiensia. Napilitan ti mahistrado a patgan ti petisionko, yantangay immikkatakon iti kinapolis idi 1940 gapu ti diktar ti konsiensiak. Nupay kasta, kinunana kas panangipakitana iti panangidumdumana: “Kayatko a mairekord ti panamatik a napeggad no ti kas kenka a panatiko ket mapalubosan nga agwaywayas iti komunidad.”

Ti Nalikudak

Naipasngayak idi 1908 idiay Gawler, a di pangadayuen manipud Adelaide, Sud Australia. Idi aginnemen ti tawenko, insuro kaniak ni Sarah Marchant, maysa a nadekket a gayyem ni nanangko, a ti impierno ket gagangay a tanem ti tao ken saan nga umap-apuy a pagtutuokan. Isut’ maysa nga International Bible Student, kas pannakaawag idi dagiti Saksi ni Jehova.

Kabayatan ti idadakkelko, dinamagko iti Baptist a ministromi no aniat’ nagdumaan ni Jesu-Kristo ken ti Dios, ngem di makapnek ti sungbatna. Isu a napukawanak iti interes kadagiti iglesia, nupay magusgustuak ti umimdeng ken Sarah Marchant no adda tiempo nga agkitakami.

Idi 1924, nangrugiak nga agtrabaho idiay Adelaide kas maysa a clerk ti komisioner ti polis ti Sud Australia a ni Brigadier General Sir Raymond Leane. Di nagbayag, idi 1927, nangaramid ni Mr. Leane iti maysa a rekomendasion idiay parlamento a matudinganak kas maysa a junior fingerprint expert ken crime photographer dagiti polis ti estado.

Panangsursuro Kadagiti Kinapudno ti Biblia

Tallo a tawen kalpasan ti panagkallaysak idi 1928, bayat nga agbakbakasionak kadagiti katugangak idiay Gawler, binasak ti maysa a libro a napauluan Creation, nga impablaak idi 1927 ti Watch Tower Bible and Tract Society. Impaima dayta ni Sarah Marchant kadagiti katugangak. Inlawlawag ti libro a ti tao ket maysa a kararua ken awan ti sumina, a di makita a kararua. Nakabatbatad daytoy. Ngem kayatko a makitak a mismo dayta idiay Biblia. Isu a binirukko ti King James Version ti pamilia ken binasak ti Genesis 2:7: “Ket ti APO a Dios binukelna ti tao manipud ti tapuk iti daga, ket impuyotna iti agongna ti anges ti biag; ket di tao nagbalin a sibibiag a kararua.”

Naallukoynak a talaga, isu nga intultuloyko a binasa. Diak maisardeng ti panangbasak iti libro a Creation. ‘Daytoy la ketdin ti kinapudno,’ kinunak iti unegko. Ita kayatkon a basaen ti dadduma pay a libro ti Watch Tower Society. Ti sabali pay nga adda iti pamilia isu ti napauluan Life. Isu nga inungpotko met a binasa dayta a libro.

Sumagmamano nga aldaw kalpasanna, nagsublikami idiay Adelaide ket immakar iti sabali a balay. Iti dayta met laeng nga aldaw naklaatkam a nangpasangbay ken Sarah Marchant. Imbaga ti katugangak a babai nga interesadoak, ket simmarungkar tapno komustaen ti iyaakarmi iti kabarbaro a pagtaenganmi ken tukoden ti kasapulak a naespirituan a tulong. Kabigatanna, ti kabarbaro a kaarrubami inawagannak iti inaladan: “Ammok nga interesadoka kadagiti insurat ni Judge Rutherford [ti presidente idi ti Watch Tower Society].”

“Kasano a naammuam?” dinamagko.

“Ket no naglapayag ti daga,” insungbatna.

Nabatad, nga impadamag la ketdi ni Sarah kenkuana. Dayta a lalaki, ni James Irvine, ti kakaisuna a Saksi nga agnanaed iti makin-amianan a deppaar ti Adelaide. Isut’ maysa a payunir, wenno amin-tiempo a ministro dagiti Saksi ni Jehova, ket inrugina kaniak ti regular a panagadal iti Biblia.

Irarang-ay iti Kinapudno ti Biblia

Idi nagsubliak iti trabahok idiay departamento ti polis, magagaranak unay a mangiranud kadagiti naimbag a banag a nasursurok. Isu nga iti tunggal gundaway, inranudko kadagiti katrabahuak ti kabbaro a pammatik. Ngem, naupayak idi rinabrabakda ti kinagagarko.

Diak ninamnama a busoren a mismo ni baketko ti panaginteresko iti Biblia. Ngem babaen ti tulong ni Jehova, bimmaaw ti ibubusorna. Idi 1935, indedikarko ti biagko ken Jehova ken nabautisaranak. Kadagidi nga aldaw, maymaysa ti kongregasion idiay Adelaide, ket agarup 60 laeng ti tumabtabuno iti linawas a panagadal iti Biblia babaen ti panangusar Ti Pagwanawanan.

Maysa nga aldaw, imbaga kaniak ni Harold Jones, ti mangidaulo a manangaywan ti kongregasion: “Adda itedmi nga annongen kenka. Masapulmi ti maysa a mangtaming iti rekord ti teritoriatayo.” Magustuak unay ti trabaho, yantangay iti trabahok kas maysa a polis, masukisokko ti intero nga Adelaide. Kabisadok unay ti siudad isu a kabaelak unay nga isagana dagiti mapa ti teritoria a mausarmi iti panangasaba.

Idi Abril 1938, simmarungkar ni Joseph Rutherford, ti presidente idi ti Watch Tower Society, idiay Australia ken nagpalawag idiay Sydney a tinabunuan ti nasurok a 12,000, nupay 1,300 laeng idi dagiti Saksi iti intero nga Australia. Idiay Adelaide di nabaelan ti agarup 20 kadakami ti 1,800 a kilometro a biahe nga agturong idiay Sydney. Isu nga inabanganmi ti daan a Tivoli Theater ket adda linea ti komunikasion a naikoneksion tapno mangngeganmi ti palawag ni Rutherford idiay Sydney. Inyurnosmi ti panangawis babaen ti radio, ket, kas resultana, agarup 600 ti immay dimngeg iti palawag idiay Adelaide!

No Kasano a Napukawko ti Trabahok Kas Polis

Idi 1939, nangrugi ti Gubat Sangalubongan II, ket inusig iti kasta unay dagiti nadumaduma nga autoridad ti kinaneutral dagiti Saksi ni Jehova. Naminsan, dua a managipadamag ti maysa a periodiko a Truth ti immay idiay Kingdom Hall ket sidadamsak a simrekda. Basta linapdak ida, yantangay kasla kayatda laeng ti mangriribuk. Kabigatanna, mabasan ti paulo ti damag iti periodiko nga: “Agbambantay iti Ruangan ti Kingdom Hall Dagiti S.J. ti Maysa a Polis ti Sud Australia.”

Gapu iti dayta a pasamak, inumsidak dagiti katrabahuak. Pinadakesnak ti superiorko, maysa a napeklan nga aktibista a Katoliko, iti komisioner ti polis a ni Raymond Leane. Ket kellaat nga idi Agosto 1940, naisaklangak ken Mr. Leane, ti tao a nagtrabahuak iti napalabas a 16 a tawen. Ti pammabasol? Diak kano pagtultulnogan dagiti amin a bilinna.

“Paltogam kadi ti maysa no ibilinko kenka dayta?” dinamagna.

“Pangarigan laeng dayta,” kinunak. “Ngem, saan, talaga a diak paltogan ti asinoman.”

Iti las-ud ti dua nga oras, inkagumaanna nga ilawlawag no kasanot’ kinamaag ti panagbalinko a paset ti maysa nga organisasion nga adda iti opisial a listaan dagiti nakabasol ken asidegen a maiparit idiay Australia. Ingngudona: “Ken kalpasan amin a naaramidak kenka, inikkanka iti nasayaat a trabaho.”

“Apresiarek dayta,” kinunak. “Ket inkagumaak nga impakita ti panangapresiarko babaen ti kinagagetko. Ngem dikay mabalin nga isukat iti panagdayawko ken Jehova a Dios.”

“Masapul nga agpilika ngarud no umikkatka kas Saksi ni Jehova wenno aglusuloskan,” insungbat ti komisioner.

Isu a naglusulosak a dagus. Idi 1940, mabasa ti paulo ti damag iti periodiko a Truth: “Naglusulosen ti Polis ni Rutherford.” Masapul nga ipakaammok ken baketko saak mangsapul iti sabali a pagtrabahuan. Naimbag ta naawatak nga agtrabaho iti maysa a lokal a pagimprentaan nga isu ti pakaimalditan ti edision ti Australia a Consolation (Agriingkayo! itan).

Panagserbi iti Sidong ti Pannakaiparit

Maragsakanak nga agtartrabaho idi iti kabbaro a panggedak agingga a dimteng ti Enero 1941, idi a naipakat kadagiti Saksi ni Jehova ti pannakaiparitda iti intero a pagilian. Pagarup idi dagiti pannakabagi ti linteg no napasardengdan amin a pannakaimaldit dagiti literaturami iti intero a pagilian. Ngem kinapudnona, naiyusuat idi ti nalimed a panagimaldit​—iti intero a Sydney​—ket kanayonkam a nakaawat iti ruar Ti Pagwanawanan kabayatan ti pannakaiparit!

Di nagbayag kalpasan ti pannakaiparit ti trabahomi, inkarok ti dua a sentensiak a dinakamatko itay. Kamaudiananna, idi Hunio 1943, imbilin ti Korte Suprema ti Australia a ti pannakaiparit ket maikontra iti Konstitusion, isu nga insubli ti gobierno amin a sanikua ti Watch Tower Society nga innalada.

No ar-arigen, narigat a patien a kadagidi a tawen, dagiti balay (agraman ti balayko) ket sukisoken dagiti polis. Ngem, agpapan pay iti ibubusor, intultuloymi ti panangasabami iti binalaybalay a Biblia laeng ti usarenmi. Namin-adu a siniimdakam dagiti polis. Dagiti nakasibilian a polis ket timmabuno pay ketdi kadagiti gimongmi a naangay kadagiti pribado a pagtaengan. Naminsan, idi iyam-ammok ti pannakabagi ti sanga nga opisina ti Sydney, kinunak: “Kaduatay ita ti dua a polis ti Sud Australia. Pangngaasiyo ta abrasaenyo ida!” Naklaat ken nabainanda ngem nagtalinaed ken tinagiragsakda ti gimong, tapno makaisubmitirda kano iti makaay-ayo a report nga isut’ impambarda kalpasanna.

Panangidumduma Gapu iti Relihion

Inyurnosmi idi Abril 1945 ti maysa a kumbension iti maysa nga auditorium iti ruar ti Adelaide. Naiyeskediol idi Domingo, Abril 29, ti nasaknap-pannakaiyawisna a palawag publiko a “Dagiti Naemma Tawidendanto ti Daga.” Ngem bigbigat pay laeng addan riribuk. Kas manangaywan ti kumbension, napanak iti estasion dagiti polis ti ili tapno ipulong ti madama a riribuk. Ngem dida inkankano ti isasangbay ken panagipulongko.

Idi mangrugi koman ti palawag publiko, nabuangay ti maysa a grupo dagiti managderraaw. Simrek ti sumagmamano a kameng ti grupo idi apagrugi ti palawag. Immabante ti sumagmamano a maton a kakadua dagiti managderraaw, nga ikagkagumaanda a perdien ti kagawaan ti sound. Pagammuan, inubordan dagiti tawa. Naipakaammo kadagiti estasion ti radio ti madama a riribuk, ket dagus nga impadamagda nga adda madama a panagderraaw. Simmangpet la ngarud idiay ruar dagiti rinibo a managusioso.

Nakalkaldaang ta masapul nga isardengmi ti palawag. Ngem idi masapul a rummuarkamin manipud iti auditorium, inwayaannakam dagiti polis iti pagnaanmi, ket nagulimek ti intero a bunggoy. Naimatangan dagiti amin ti kinamaag dagiti managderraaw gapu ta ti nakitada a rimmuar iti auditorium isu dagiti ordinario laeng a tattao, a pakairamanan dagiti lallakay ken babbaket agraman ubbing. Nakondenar ti panangidumduma gapu iti relihion iti seksion ti maysa a periodiko a “Letters to the Editor” iti simmaruno nga al-aldaw.

Kaskasdi, tawtawen kalpasanna, saanen a napalubosan dagiti Saksi ni Jehova a mangusar kadagiti pasilidad ti auditorium idiay Sud Australia. Naminsan, idi ngalay ti 1950’s, nakisaritaak iti mangay-aywan ti auditorium ti Norwood iti ruar ti Adelaide maipapan ti pannakausar ti pasilidadda para iti kumbension distritomi.

“Agnanayonen a maiparit ti panangusaryo kadagiti auditorium,” kinunana.

“Naudikan iti damag,” insungbatko.

Saak inruar manipud bagko ti broshur maipapan ti kumbension internasional idiay Yankee Stadium ti Nueva York idi 1953. “Kitaem ti madama nga ang-angayen dagiti Saksi ni Jehova iti nadumaduma a lugar​—nasurok a 165,000 iti maysa a tallaong!” kinunak.

Innalana ti broshur, binasana a naimbag dayta, sana kinuna kalpasanna: “Wen, nagbalbaliw sa metten dagiti kasasaad.” Nanipud idin naipalubos manen kadakami ti pannakausar dagidi a pasilidad iti intero a Sud Australia.

Idi 1984, kalpasan ti naunday a pannakaidalit, pimmusay ni baketko. Ngem, sakbay ti ipupusayna, impakitana ti panagayatna iti kinapudno ti Biblia ken ni Jehova a Dios. Daytoy ket nangnangruna a maigapu iti kinaasi nga impakita kenkuana dagiti naayat a Saksi iti adu a tawtawen. Ket idi Disiembre 1985, inkasarko ni Thea, nga agserserbin ken Jehova iti adu a tawen.

Ngangngani 60 a tawenen nga agserserbiak ken Jehova buyogen ti pannakapnek. Gapu iti naynay a panagtalekko ken Jehova, panagtalinaed a nadekket iti organisasionna, ken di pannakikompromiso iti aniaman a pannakapilit, dagiti tawtawen ti biagko ket aduan pribilehio ken pammendision. Ket ikagkagumaak a pagtalinaeden dagiti matak a nakasentro iti gunggona a nailangitan a pannakaayab. (Filipos 3:14)​—Kas insalaysay ni Hubert E. Clift.

[Ladawan iti panid 23]

Panagserbi kas maysa a ministro