Nasarakak ti Gameng a Napateg Unay

KAS INSALAYSAY NI FLORENCE WIDDOWSON

Idi sumipngeten, inkeddengmi ti agkampo iti asideg ti luek (lagoon). Saan a nasayaat a pagkampuan ti dua a babbai, ngem ti kunami mabalinen para iti maysa a rabii. Bayat nga isimsimpak ti toldami, insagana ni Marjorie ti pangmalemmi.

KAIPALPALOKKO ti maudi a pasok ti toldami idi adda nasaripatpatak a naggunay iti asideg ti nangisit a pungdol ti kayo. “Nakitam kadi ti naggunay iti daydiay a pungdol?” impukkawko ken ni Marjorie.

“Saan,” kinunana nga insungbat, a medio mabutbuteng.

“Ay ket, talaga a naggunay,” indil-agko. “Itedmo kaniak ta kaldero!”

Innalak, agraman ti wasay a baklayko, ket nagturongak iti luek. Idi asidegakon iti pungdol, maysa a lalaki ti rimmuar iti likudna!

“Mabalin kadi nga inumen ti danum nga adda iti luek?” Naigulpek a kinuna.

“Saan,” kunana a kasla makaunget, “ngem no kayatmo ti danum a mainum, iyalaanka.”

Diak inawat ti tukonna, ket nabang-aranak unay ta dagus a pimmanaw. Kasta unay tigergerko, ket nagsubliak a dagus sa imbagak ken ni Marjorie ti napasamak. Inakasmi a dagus ti tolda, nagbalkotkami, sakam pimmanaw. Iti saan a mabayag imbagada kadakami a karuruar daydiay a tao iti pagbaludan.

Nupay masansan nga agkampo dagiti agbirbiruk ti balitok kadagiti pagminasan idiay Australia idi 1937, adda met sabali a birbirukenmi. Agsapsapulkami kadagiti tattao a napateg iti Dios.

Ti Nalikudan ti Pamiliak

Adda sangagasut a tawenen ti napalabas, ni tatangko ti mammanday iti bassit a purok ti Porepunkah iti estado ti Victoria. Sadiay ti nakayanakak idi 1895, ken dimmakkelak a kadua ti uppat a manongko iti asideg ti Ovens River, iti sakaanan ti Mount Buffalo. Dagiti dadakkelko kanayon a mapmapanda iti simbaan ti Union Church, ket inatenderak ti Sunday school, a ni tatangko ti superintendente.

Idi 1909, naatake iti puso ni Nanangko iti kangitingitan ti nadawel a bagio ket natay iti sakroy ni tatangko. Kalpasanna, idi karrugi ti 1914, pimmanaw ti maysa kadagiti manongko, ket sumagmamano nga oras laeng ti napalabas naisubli kadakami​—a maysan a bangkay. Nagpakamatay. Nadegdegan ti ladingitmi gapu iti sursuro ti relihionmi nga agur-uray kenkuana ti impierno, agsipud ta ti kano panagpakamatay ket maysa a basol a di mapakawan.

Di nagbayag iti dayta a tawen bimtak ti Gubat Sangalubongan I, ket simrek a soldado ti dua kadagiti manongko. Ti nakabutbuteng a damag ti panagibuyat ti dara ken panagsagaba ti nangdagdag kadakami nga innem a babbai, agraman ni tatangko, a nangrugi a mangadal iti libro ti Biblia a Juan.

Panangbiruk ti Pudno a Gameng

Adda libro idi ni Ellen Hudson a The Time Is at Hand, nga insurat ni Charles Taze Russell. Ti panaggustona iti dayta ti nangimpluensia kadakami amin nga adda iti grupo. Idi naammuanna a ti libro ket maysa laeng iti serye dagiti innem a tomo a napauluan Studies in the Scriptures, nagsurat iti International Bible Students Association idiay Melbourne ket dinawatna ti kanayonan dayta a serye. Nagnunumuanmi nga usaren iti grupomi ti umuna a tomo a, The Divine Plan of the Ages, kadagiti linawas a panagadalmi.

Mailadawanyo ti ragsakmi ken ni tatangko a makatakkuat nga awan ti umap-apuy nga impierno. Naiwaksin daydi buteng a ti manongko ket adda iti impierno. Naammuanmi ti kinapudno a dagiti natay ket awan puotda, a kasla matmaturogda, ken saanda nga agbibiag iti sadinoman a matutuok. (Eclesiastes 9:5, 10; Juan 11:11-14) Dadduma kadagiti kagrupomi nga agad-adal ti Biblia ti nakapanunot a makikaarruba tapno inda ikasaba ti kinapudno a maad-adalmi. Nagnakami a napan kadagiti balbalay iti asideg, ngem nagbisikleta ken naglugankami iti kalesa a nangdanon kadagidiay adda iti away.

Napadasak ti damo a mangasaba iti binalay-balay iti Armistice Day, idi Nobiembre 11, 1918. Tallokami iti grupomi a nagbiahe iti 80 a kilometro a napan iti ili ti Wangaratta tapno agiwaras iti tract a Peoples Pulpit. Sumagmamano a tawen kalpasanna, idi mangaskasabakami iti maysa kadagiti nasulinek a lugar, napasamak ti kapadasan nga inestoriak iti pangrugian.

Idi 1919, dimmar-ayak iti kumbension dagiti Estudiante ti Biblia idiay Melbourne. Sadiay ti nangpasingkedak ti dedikasionko ken Jehova babaen ti pannakaitaneb iti danum idi Abril 22, 1919. Pinauneg ti naespirituan a bangkete ti apresasionko iti naespirituan a gameng ti Pagarian ti langlangit ken iti naindagaan nga organisasion ni Jehova.​—Mateo 13:44.

Saanak a nagawid kalpasan ti kumbension, no di ket inawatko ti awis a makikadua ken Jane Nicholson, maysa nga amin-tiempo a manangaskasaba, para iti makabulan a panangasaba. Ti teritoriami isut’ paglugaran dagiti mannalon ken agtartaraken ti baka iti igid ti King River. Sumagmamano laeng a tawen ti napalabas, isu daytoy a bantay ti nakaalaan ti pelikula a The Man From Snowy River.

Idi 1921 naawatmi ti nasayaat a katulongan ti panagadal iti Biblia a The Harp of God. Idi inrugi nga usaren ni Tatang daytoy a kas textbook iti klasena iti Sunday school, sinuppiat dagiti adu a nagannak ket pinaglusulosda. Dagus nga inaramidna dayta. Idi agangay naawatmi ti bokleta a Hell, nga addaan iti makapainteres a salsaludsod iti parupana nga,“ Ania aya Dayta? Siasino ti Adda Sadiay? Makaruarda Kadi Dita?” Maragsakan unay ni Tatang iti nalawag a pammaneknek ti Biblia a naiparang maipapan iti dayta a tema, isu a dinagdagusna ti napan nagiwaras kadagiti kopia iti binalaybalay. Ginasut ti naipaimana iti purokmi ken kadagiti kabangibang a lugar.

Ti Panagdaliasatmi ken ni Tatang a Mapan Mangasaba

Idi agangay, gimmatang ni Tatang iti kotse tapno maidanon kadagiti tattao iti sabsabali a lugar ti mensahe ti Pagarian. Kas mammanday, ad-adda a nairuam kadagiti kabayo, isu a siak ti drayber. Idi damo, maturogkami no kua kadagiti otel. Di nagbayag nanginan ti pagbayad, isu a nagkampokami iti ruar.

Inurnos ni Tatang ti akinsango a tugaw ti kotse tapno mabalinko ti agidda dita. Adda met inaramidmi a bassit a tolda a pagturogan ni Tatang. Kalpasan ti panagkampomi iti sumagmamano a lawas, agsublikami idiay Porepunkah, ket lukatan manen ni Daddy ti pagpandayanna. Saan a pulos a naibus ti panagsiddaawmi ta adu a kanayon ti agbayad a dagus a suki ket adda manen gastuenmi iti sumaruno a panagbiahemi a mapan mangasaba.

Adu a tattao a nalinteg ti panangmatmatda ti sidadaan a nangpasangbay kadakami ken idi agangay nagpaiyadal ti Biblia iti pagtaenganda. Ita, addan pito a kongregasion nga adda bukodda a Kingdom Hall iti lugar a dati a pagserserbian ti bassit a grupomi a taga Porepunkah. Pudno la unay, siasino ti manglais iti “aldaw dagiti babassit a bambanag”?​—Zacarias 4:10.

Idi 1931, dinaliasatmi ken ni Daddy ti gistay 300 a kilometro kadagiti likkalikkaong a kalsada a mapan tumabuno iti naisangsangayan a gimong, a sadiay ti nangawatantayo iti baro a nagan a “Saksi ni Jehova.” Agpadakami a naragsakan iti daytoy naidumduma, Nainkasuratan a nagan. (Isaias 43:10-12) Nasaysayaat nga amang ti panangipabigbigna kadatayo ngem ti nagan nga “International Bible Students,” nga isut’ pannakaawagtayo agingga iti daydi.

Iti maysa nga aldaw a panangasabak iti ili ti Bethanga, nakasangok ti lokal a ministro ti Church of England. Nakaunget ken rinugianna a napan tinunton dagiti naipaima a librotayo, a minandaranna dagiti tattao nga itedda kenkuana amin dagiti libro a naalada. Kalpasanna nangangay iti panagpuor ti libro iti publiko iti sentro ti ili. Ngem nagbalandra ti dakes nga aramidna.

Kalpasan a naipakaammok iti sanga nga opisina ti Sosiedad ti napasamak, naimaldit ti maysa a silulukat a surat a nangkondenar iti inaramid ti padi. Kasta met, nayurnos dagiti kotse a napno kadagiti Saksi a mapan agiwaras ti surat iti intero a distrito. Idi sinarungkaranmi manen ken ni Tatang ti ili, ad-adu nga amang ngem idi ti naipaimami a libro. Magagaran ti umili a mangammo no ania ti linaon dagita “maiparit” a pagbasaan!

Ni Milton Gibb ti kaunaan a nangabrasa ti kinapudno ti Biblia idiay amianan a daya ti Victoria kas bunga ti panangaskasabami. Inadalna a nalaing amin dagiti naibatimi kenkuana a publikasion ti Sosiedad iti nagbaetan ti isasarungkarmi. Iti naminsan nga isasarungkarmi, kinellaatnakami a kunkunana: “Maysaakon kadagiti adalanyo.”

Nupay maragsakanak iti desisionna, inlawlawagko: “Milton, saan. Saanmo a mabalin ti agbalin a maysa kadagiti adalak.”

“No kasta, maysaak kadagiti adalan ni Rutherford [ti presidente idi ti Watch Tower Society].”

Kinunak manen: “Saan, saan met a maysa kadagiti adalan ni Rutherford, ngem namnamaek a maysaka kadagiti adalan ni Kristo.”

Pinaneknekan ni Milton Gibb nga isu ket maysa kadagiti adu a napapateg a gameng a sinapsapulko iti adu a tawen. Isu ken ti dua nga annakna a lallaki ket nagbalinda a Kristiano a panglakayen, ken naregta iti kongregasion dagiti dadduma pay a miembro ti pamiliana.

Panangsaranget Kadagiti Nadumaduma a Subok

Nupay naparitan ti trabaho dagiti Saksi ni Jehova idiay Australia idi Enero 1941, intultuloymi ti nangasaba, a Biblia laeng ti usarenmi. Idi kuan, nasinga ti panagpayunirko, wenno amin-tiempo a panagserbik, idi pinagawiddak tapno taraknek ti masakit nga amak. Di nagbayag, nagsakitak met ket kinasapulan ti narikut nga operasion. Medio nabayag ti yuungarko ngem napasarak ti kinapudno ti kari ti Dios: “Saankanto a pulos panawan ket saankanto a pulos baybay-an.” (Hebreo 13:5) Impatalged ti maysa a Kristiano a sister kaniak: “Laglagipem, Flo, dika pulos agmaymaysa. Ket sika ken ni Jehova ti kanayon nga agkadua.”

Idi kuan dimteng ti maudi a panagsakit ti ingungotek nga ama iti 13 a lawas. Idi Hulio 26, 1946, inkidemna dagiti matana ken patay. Tinagiragsakna ti makapnek a biagna, ken nailangitan ti namnamana. (Filipos 3:14) Gapuna nga idi agtawenak iti 51, agmaymaysaakon, ta ni Daddy ti kaduak iti gistay amin a tawtawen ti kinaubingko. Idi agangay naam-ammok ti nagbalin a lakayko. Nagkallaysakami idi 1947 ket nangrugikami a nagpayunir. Ngem saan a nagbayag daytoy naragsak a kanito agsipud ta naistrok idi 1953 ket saanen a makabalin.

Naapektaran unay ti panagsao ni lakayko, ket gistay imposible ti makisarita kenkuana. Isu dayta ti karigatan a paset ti panangtaripato kenkuana. Talaga a marigatanak unay a mangikagumaan a mangtarus iti kayatna nga ibaga. Nupay agnanaedkami iti naiputputong a lugar nga awan ti asideg a kongregasion, dinakam binaybay-an ni Jehova kadagidiay narigat a tawtawen. Inkagumaanak nga ammuen amin a kaudian nga impormasion ti organisasion, kasta met ti agtultuloy a suplay ti naespirituan a taraon kadagiti magasin a Pagwanawanan ken Agriingkayo! Idi Disiembre 29, 1957, pimmusay ti ingungotek nga asawa.

Ti Ministeriok Idiay Adelaide

Agmaymaysaak manen. Aniat’ aramidek? Maawatak ngata pay kas maysa nga amin-tiempo a ministro kalpasan ti gistay lima a tawen a panagsardengko? Inawatdak, isu nga inlakok ti balayko ket nangrugiak iti trabaho a kinapayunir idiay Adelaide, ti kabisera a siudad ti Sud Australia. Kasapulan dagiti payunir sadiay iti daydi a tiempo, ket naikamengak iti Prospect Congregation.

Ngem gapu ta maamakak nga agmaneho iti siudad, inlakok ti kotsek ket nagusarak manen iti bisikleta. Inusarko dayta agingga idi 86 ti tawenko, ket pagaammodak iti dayta a lugar a kas “ti bassit a baket a nakabisikleta ti asul.” Idi agangay umad-adda ti nerbiosko iti kalsada; kasla kanayon nga agkuyegyeg ti makinsango a pilid ti bisikletak. Ti maudi nga aksidente nga isut’ makagapu ti panagsardengko nga agbisikleta dimteng iti maysa a malem idi nagsirkoak iti babassit a kayo iti igid ti kalsada. ‘Daytoyen ti maudi,’ kunak iti nakemko, isu a magmagnaak manen.

Sumagmamano a tawenen ti napalabas, bayat ti itatabunok iti maysa a kumbension distrito, nangrugi nga agkapuy dagiti sakak, ket nagtungpal iti dua nga operasion kadagiti nagsuopan ti padingpadingko. Mayat ti pannagnak kalpasan ti operasion agingga nga intuangnak ti dakkel nga aso. Kinasapulan daytoy ti kanayonan a pannakaagas, ket manipud idin masapulko ti katulongak a magna tapno makapanak iti kayatko a papanan. Nasiglat pay laeng ti panunotko. Kas kinuna ti maysa a gayyemko: “Kasla di madanggayan ti bumakbaket a bagiyo dayta agkabanuag a panunotyo.”

Iti panaglabas ti tawtawen, nakitak ti idadakkel, panagrang-ay, ken panaganak ti kongregasion sadi Adelaide. Ket idi 1983, a 88 ti edadkon, pinanawak ti Adelaide ket napanak nakipagnaed iti maysa a pamilia idiay ili ti Kyabram iti estado ti Victoria, a nangpalabasak iti sangapulo a naragsak a tawtawen. Makarkaruarak pay met laeng iti tay-ak ti ministerio; ikotsedak nga iyunor dagiti kakabsat a mangsarungkar kadagidiay regular a mangala kaniak kadagiti magasin. Dagitoy a tattao siaanus nga umasidegda iti kotse tapno makasaritak ida.

No panunotek ti nasurok a 98 a tawen ti panagbiagko, magustuak a lagipen dagiti adu a nasungdo ken matalek a tattao a kaduak a nangidaydayaw ken ni Jehova, nangruna ti mapagwadan nga amak. Kasla siak laengen ti nabati a sibibiag kadagiti matalek a nakaduak a nagpayunir. Ngem anian a rag-o ti agur-uray kaniak inton agkakaduakami manen kadagidiay makiraman iti namnama ti gunggona a biag iti nailangitan a Pagarian ti Dios, talaga a maysa a gameng a napateg unay!

[Ladawan iti panid 28]

Nabautisaranak idi Abril 22, 1919

[Ladawan iti panid 31]

Siraragsakak pay laeng nga agserserbi ken ni Jehova uray ag-100 ti edadkon