Manipud Managbasatayo
Napaay nga Ayan-ayat Agtawenak iti 17, ket nasarakak a makatulong unay ti artikulo nga “Agimtuod Dagiti Agtutubo . . . Kasano a Mapagballigiak ti Napaay nga Ayan-ayat?” (Mayo 8, 1993) Kanayon a madukotanak idi ta awan met laengen ti mangayat kaniak. Ngem ita, sabalin ti pangipampamaysaak iti panunotko ket diak pay la aggangganat a makiasawa.
S. M., Australia
Nakinobioak iti saan a Kristiano ket nariknak nga agayatak kenkuana. Naamirisko a madin ti mapaspasamak isu a nakiinnukasak kenkuana, ngem kasla kayatkon ti agbekkel. Kasla diak agbiag no awan isuna ket napalalo ti ladingitko iti adu a lawas. Ti artikulo tinulongannak a maaddaan iti nalimbong a panagpampanunot ken bigbigen a lumabasto met laeng daytoy a nasaem a rikrikna.
A. H., Estados Unidos
Dagiti Putahe Ti artikuloyo a “Bassit a Burburan a Bunga ti New Zealand” (Oktubre 22, 1992) nangipaay iti maysa a putahe nga orange liqueur ti kangrunaan a ramenna. Masapul a mapalagipan dagiti managbasayo a dida agmaneho a dagus kalpasan a nanganda iti aniaman a nalaokan iti alkohol.
J. S., Estados Unidos
Talaga a rumbeng a mapakaammuan dagiti sangaili no nalaokan iti alkohol ti maysa a putahe. Ngem sangakutsara laeng nga orange liqueur ti nailaok iti nadakamat a fruit salad a maidasar agpaay iti innem a tao—kantidad a saan a makabartek. Basbassit pay ti peggad ti pannakabartek kadagiti putahe a kasapulan a maluto dagiti ramenna. Yantangay nalaka nga agburek ti alkohol, kaaduan, no saan man nga amin, ti agbawbaw.—ED.
Ti Tarigagay ni Joshua Pagyamanan iti panangipablaakyo iti artikulo a “Ti Tarigagay ni Joshua.” (Hunio 22, 1993) Makaparegta kaniak. No nakapagmatalek uray nagsakit iti makapapatay [leukemia], anian a naglaka met kaniak ti agmatalek! Agtawenak iti siam.
M. M., Estados Unidos
Apresiarek unay “Ti Tarigagay ni Joshua.” Napabilegak unay iti tured, pammati, ken ayatna ken Jehova.
K. M., Estados Unidos
Dagiti Moderno-Aldaw a Martir Kabasbasak dagiti serye ti artikulo a napauluan “Naballigi iti Sidong ti Ipapatay.” (Mayo 8, 1993) Maladingitanak kadagiti saan nga umno a kinaulpit a linak-am dagiti Kristiano a kakabsattayo. Makasangitak no panunotek ti panagibturda. Makaparegta unay kaniak ti pammati ken kinasungdoda uray pay iti sidong ti ipapatay. Sapay koma ta ipaayannatayo ni Jehova iti bileg ken panagibtur nga agtultuloy nga agmatalek a kas kadakuada.
B. D., Italia
Iti panagadalko iti Biblia, idi damo a naadalko ti isyu a panagmatalek iti sidong ti pannakasuot, diak maaklon nga adda a talaga dagiti gundaway a mapasarantayo dagiti nakaro a pannakasuot ti pammati. Ngem idi nabasak dagiti makapikapik a kapadasan dagiti Kristiano a nagtalinaed a natarnaw iti sidong ti ipapatay, diak matngelan ti di agsangit. Agyamanak unay iti daytoy a serye dagiti artikulo.
J. P., Filipinas
Panagplano ti Pamilia Kinuna dagiti serye ti artikuloyo a “Panagplano ti Pamilia—Sangalubongan nga Isyu” (Pebrero 22, 1993) a no mausar dagiti maitudok a progestin-only [kas maysa a panglapped iti panagsikog], malapdan ti panagsikog babaen ti pannakairegreg ti pertilisadon nga itlog. Kuna ti doktorko a saan a pudno daytoy.
M. D., Estados Unidos
Saan nga eksakto nga ammo dagiti managsirarak no kasano a malapdan dagiti maitudok a progestin-only ti panagsikog. Patien ti dadduma a kastat’ maaramidanda babaen ti pananglappedda iti ipapan ti itlog iti obario. Kuna pay ti dadduma nga adda pammaneknek a no dadduma lapdanna ti idedekket ti maysa a pertilisado nga itlog iti aanakan—isu a maregreg ti sikog. Yantangay daytoy a wagas ti pananglapped ti panagsikog ket saan met a nabatad a mangiregreg, masapul nga ikeddeng dagiti Kristiano a pagassawaan a mismo no maaklon ti konsiensiada nga usaren dayta wenno saan. (Galacia 6:5)—ED.