Manipud Managbasatayo
Diborsio Kalpasan unay ti maikadua nga anibersariomi, nakikamalala ni lakayko iti nasinged a gayyemko. Dua tawen kalpasanna, pinanawannakon. Isu nga idi nakitak ti akkub ti Hulio 8, 1993 nga Agriingkayo! a napauluan “Diborsio—Pamay-an nga Agturong iti Naragragsak a Biag?,” diak unay naginteresan. No dadduma, marigatanak a mangadal iti maysa a material maipapan ti biag ti pamilia. Nupay kasta, naparegtaak a nakabasa nga inton agangay, “mabang-aranton ti di nagbasol nga asawa a maysa a nabilbileg, naragragsak, ken naidumduma a tao.” Diak kunaen a kastan ti kasasaadko, ngem ikagkagumaak. Nakaro unay idi ti panagleddaangko. Ngem ti nawadwad nga impormasion nga impaayyo iti dadduma nga isyu maipapan iti panagleddaang ti nakatulong kadagiti panglakayen iti kongregasionko a mangbayabay kaniak kadagidi a naliday a tiempo. Pagyamanan unay iti amin a tulong nga ipapaayyo babaen kadagiti magasin.
D. P., Estados Unidos
Agsiuman Idi nabasak ti artikuloyo a “Singasing Agpaay Kadagiti Agsiuman” (Hulio 8, 1993), naguyugoyak nga agsurat kadakayo. Sangapulo ti tawenko, ket makipagnanaedak ken nanangko. Nangasawa manen ni tatangko, isu nga adda agsiuman kaniak ita. Idi nabasak ti rikrikna ti dadduma nga ubbing maipapan kadagiti agsiuman, kinunak iti un-unegko, ‘Kastoy a talaga dagiti rikriknak!’ Maragsakanak ta maysa kadagiti singasingyo isut’ panagannad maibusor iti panagimon. Masansan a matmatak ti agsiuman kaniak kas kasalisalko. No dadduma mariknak a kasla ad-adda a dungdungnguen ni tatangko ti agsiuman kaniak ngem siak. Sapay koma ta mabasanto ni tatang ken ti agsiuman kaniak daytoy a nagsayaat nga artikulo tapno ad-adda a maawatandak.
V. N., Estados Unidos
Panagminas iti Gambang Masansan a magustuak a basaen dagiti magasinyo. Ngem, masdaawak iti artikulo a “Kadakkelan nga Inaramid-Tao nga Abut iti Lubong.” (Marso 8, 1993) Apay a positibo ti panangiparangyo iti panagminas iti gambang? Saan kadi a kunaen ti Biblia a dadaelento ti Dios dagiti mangdaddadael iti daga?
H. Y., Inglaterra
Pagaammomi ti epekto iti aglawlaw ti panagminas. Kaskasdi, impadamag laeng ti artikulomi daytoy a pagminasan kas maysa a banag a paginteresan, saan a tapno itandudo ti industria ti panagminas. Ngem masapul a bigbigentay amin a ti industria ti elektrisidad—kinapudnona, nangnangruna ti publiko kas pangkaaduan—ket agpampannuray iti gambang. Ket kaaduan iti gambang a maus-usar idiay Estados Unidos ket naggapu kadagiti pagminasan. Saan ngarud a nainkalintegan a ti laeng industria ti gambang ti mapabasol iti pannakadangran ti aglawlaw kas resultana. Daytoy a narikut a kasasaad ket agserbi laeng kas pangarigan a masapul a ti Pagarian ti Dios ti mangiturongen kadagiti ganuat ditoy daga.—ED.
Panagarapaap Agtawenak iti 11, ket kayatko ti agyaman kadagiti artikulo ti “Agimtuod Dagiti Agtutubo . . . ” maipapan ti panagarapaap. (Hulio 8 ken Hulio 22, 1993) Kanayon nga ar-arapaapek nga agbalinak a naisalsalumina, ket tinulongandak a mangapresiar nga imbes nga arapaapen nga ayatendak, masapul nga ikagumaak ti agbalin a maay-ayat.
J. K., Estados Unidos
Apaman a nabasak dagiti artikulo, uray la a timrem dagiti luak. Kaaduan a tiempo ket busbusbosek iti panagarapaap—masansan maipapan iti panagbalin a nalatak wenno maipapan kadagiti lallaki wenno sekso. Ar-aramidek daytoy uray kadagiti Nakristianuan a panaggigimong. Talaga a naigamer ti biagko iti panagarapaap. Kaykayatko ti suminsina iti pamiliak ken kadagiti gagayyemko tapno makapagmaymaysaak iti siledko. Marurod ken mabainak iti bagik. Ngem impapusokon dagiti balakadyo ken iyap-aplikarko idan. No dadduma, pasaray agarapaapak manen, ngem ita pumpunnuekon ti panunotko iti sabali pay a kapanunotan wenno in-insiarek ti pagay-ayatko nga aramiden, [isu a] maiwakwaksikon dagita a kapanunotan. Pagyamanan unay.
T. P., Estados Unidos