Ti Saba—Naisangsangayan a Prutas
BABAEN TI KORESPONSAL TI AGRIINGKAYO! IDIAY HONDURAS
AWAGAN dagiti Griego ken Arabo dayta a “naisangsangayan a kayo nga agbunga.” Idi 327 K.K.P., nasarakan dagiti buyot ni Alejandro a Dakkel dayta idiay India. Sigun iti daan nga estoria, dagiti masisirib iti India naginanada iti linongna ken nanganda iti prutasna. Gapuna naawagan dayta “ti prutas dagiti masirib a lallaki.” Ania dayta? Ania pay no di ti saba!
Ngem kasano a nakagteng idiay Caribe ti saba manipud iti Asia? Bueno, dagiti immuna a managlako nga Arabo inawitda dagiti ungel ti mula a saba manipud Asia nga impan iti makindaya a kosta ti Africa. Idi 1482, dagiti managsirarak a Portugues nasarakanda ti mula a saba nga agtubtubon sadiay ket intugotda dagiti ungelna ken ti Africano a naganna a saba, nga impan kadagiti kolonia a Portugues idiay Canary Islands. Ti sumaganad nga addang isut’ biahe a bumallasiw iti Atlantico a mapan idiay Baro a Lubong. Dimteng dayta idi 1516, sumagmamano a tawen kalpasan ti panagbiahe ni Columbus. Intugot dagiti Español a misionero ti mula a saba kadagiti isla ken tropikal a kalawaan a paset ti Caribe. Gapuna, daytoy a naisangsangayaan nga agbunga a mula masapul nga agbiahe iti kagudua ti lubong tapno makagteng idiay Central ken Sud America.
Naipadamag nga, idi 1690 damo a naipan ti saba idiay New England manipud Caribbean Islands. Inlingta dagiti Puritan ti karkarna a prutas ket dida nagustuan. Kadagiti pagilian iti Sud ken Central America, agraman kadagiti tropikal a dagdaga, nupay kasta, minilion a tattao ti nangilingta kadagiti naata pay a saba ket paggugustoda a kanen.
Dagiti Plantasion ti Saba
Idi baet ti 1870 ken 1880, nangrugi a naginteresan dagiti nadumaduma nga Europeo ken taga Norte America a negosiante ti panangilako iti saba iti sabali a pagilian. Nangpormada kadagiti kompania ken nagipasdekda kadagiti plantasion ti saba, a maawagan fincas. Gapu itoy a panggep, masapul a dalusan dagiti trabahador ken dagiti inhiniero dagiti kabakiran, mangibangon kadagiti kalsada, ken mangipasdek kadagiti riles ken sistema ti komunikasion. Naibangon dagiti purok nga addaan kadagiti balbalay, eskuelaan, ken uray pay ospital para kadagiti trabahador ken dagiti pamiliada. Naibangon dagiti linea ti barko a paandaren ti sengngaw a mangibiahe iti saba iti aglawlaw ti lubong. Bayat a rimmang-ay ti industria, immadu ti ginatang dagiti kompania a daga a pagmulaan iti saba.
Itatta, ipapaayen dagiti dagdaga ti Latin-America ti 90 porsiento kadagiti saba a kankanen ti Norte America. Ti Brazil ti kangrunaan nga aglaklako. Ti Honduras ket maikanem iti listaan, a mangilako iti agarup a maysa a bilion a kilo a saba iti tinawen.
Kasano a Dumakkel ti Saba
Ti mula a saba ket saan a kayo. Awan ti kayona wenno binggasna. Imbes ketdi, dayta ket dakkel a ruot nga aglanglanga a kayo ti palma. Ti klima ken daga ikeddengna ti idadakkel ken kadakkel ti mula. Nasaysayaat ti panagdakkel ti saba kadagiti napudot, naagneb a klima ket agtubo iti nadam-eg, panaraten a daga a nalaka a maatianan. Agpaay iti kasayaatan a panagdakkelna, ti temperatura masapul a saan a nababbaba ngem 20 degrees Celsius iti aniaman a kawatiwat ti tiempo.
Tapno marugian ti agmula, masapul a mangimulaka kadagiti ungel ti mula, a naisina kadagiti puon dagiti dadakkelen a mula. Makali ti abut a 0.3 metro ti kaunegna ken maimula dagiti ungel a 5 metro ti kaaddayoda. Iti tallo agingga iti uppat a lawas, agparangen dagiti berde a saringit, ken dagiti nalukot a berde a bulong nga agukrad bayat a dumakkelda. Napartak a dumakkel ti mula a saba, agarup 3 centimetro iti inaldaw. Kalpasan ti sangapulo a bulan, nataenganen ti maysa a mula ket aglanglangan a kas iti kayo a palma, nga agtayag iti 3 agingga iti 6 a metro.
Iti dakkelen a mula, maysa a dakkel a sabonganay nga addaan iti lila a bulong ti agtubo a kasla maysa a binungon. Kalpasanna agparangen dagiti nagraraay a sabong. Maysa laeng a bulig ti patauden ti maysa a mula, nga agdagsen iti 30 agingga iti 50 kilo ket addaan iti 9 agingga iti 16 a sapad dagiti saba. Tunggal sapad, a kasla ima, addaan iti 10 agingga iti 20 a saba. Gapuna, ti saba ket naawagan a ramramay.
Umuna dagiti saba dumakkelda a nakapakleb, kalpasanna nakadatan, a mangporma iti nalatak a panagbakkug ti saba. Ti ngay pannakataripatona bayat ti idadakkelna? Di agbayag dumtengen ti trabahador tapno ikkatenna ti sabonganayna tapno maawat amin ti saba dagiti taraonna manipud iti mula. Kalpasanna abbonganna ti bunga iti supot a polyethylene tapno saan a siluden dagiti insekto. Yantangay nakadata ti saba ket nakadagdagsen, maigalot ti mula iti puon dagiti kaabayna a mula tapno saan a tumbaen ti angin gapu iti dagsen ti bungana. Kamaudiananna, magalotanen iti de kolor a laso a mangipamatmat no nakasaganan a matebba ti bunga.
Inaldaw, agtayab dagiti eroplano iti plantasion a mangpugsit kadagiti bulong ti mula. Daytoy salaknibanna ida manipud kadagiti tallo a kangrunaan a saksakit. Ti maysa isut’ sakit a Panama, [maysa a makadangran unay a sakit ti saba,] a maysa a buot ti mangdadael iti mula. Ngem masukatan dagitoy a mula iti naandur iti dayta a sakit. Ti sabali isu ti sakit a Mako, a patauden ti bakteria. Mapasardeng dayta no maikkat dagiti naapektaran a mulmula ken aniaman a sabonganay a mangawis kadagiti mangisaknap iti sakit nga insekto. Kalpasanna adda ti sakit a Sigatoka, isu a mangdadael kadagiti bulong ti mula ngem dina dangran ti saba no masapa a mapugsitan ti kemikal. Adut’ danum a kasapulan ti saba, isu nga ipaay ti irigasion ken dagiti nabibileg a pagbisibis. Mainayon pay met ti panangtaginayon a nadalusan kadagiti ruot ti plantasion.
Manipud iti Plantasion Agturong iti Pangananyo
Iti tiempo a ti kolor ti laso ipamatmatnan a sisasaganan a matebba, dagitoy masukatda nga umuna tapno masigurado no dagitoy ti umiso a kadakkel a matebba. Ti sabali pay a napateg a banag ket saan a mabaybay-an ti saba a maluom iti puonna, uray pay dagiti mailako iti pagilian. Apay a kastoy? Agsipud ta mapukawda ti imasda. Sakbay nga ikeddeng no matebban, masapul a maikeddeng ti kaadayu ken ti kita ti mausar a lugan a pangibiahe. Kalpasanna tebbaenen ti trabahador dagiti binulig babaen iti bunengna, ket maipandan iti planta nga agimpake. Ania ti maaramid iti mula a saba kalpasan a natebban? Maputedputed tapno abuno dagiti subbual a tumubo a sukatna.
Idiay pagimpakean a planta, maugasan dagiti saba, ket maikkat ti aniaman a nadungiran a prutas, a kanen dagiti trabahador ken dagiti pamiliada. Mausar dagiti babassit a saba a pangpananam iti taraon dagiti maladaga. Dagiti kasayaatan a saba maimpake a sag-18-kilo iti maysa a kahon ket maituloden iti sabali a pagilian babaen kadagiti mapalamiisan a tren ken barko.
Iti pantalan, masukimat ti kualidad ti prutas, ken maala ti temperaturana. Apaman a matebba, masapul nga agtalinaed a berde ti prutas agingga a makagteng iti tiendaan. Yantangay nalaka a malungtot, masapul a matebba, maipatulod, ken mailako kadagiti tiendaan iti las-ud ti 10 agingga iti 20 nga aldaw. Kanayon a naipalamiis ti prutas iti 12 degrees agingga iti 13 degrees Celsius tapno saan a maluom a dagus. Babaen iti moderno a transportasion, maipatuloden dagiti saba manipud Central ken Sud America agingga iti Canada ken Europa nga awan ti parikut.
Ti Praktikal a Pateg ken Nutrisionna
Addada sangagasut wenno ad-adu pay a kita dagiti saba. Ti bassit a saba ket gagangay a kita, a mailako nangnangruna idiay Europa, Canada, ken ti Estados Unidos. Idiay Honduras, adut’ masarakan a babbabassit a kita, a nakaing-ingpis ti ukisna ta di mabalin nga ilako iti sabali a pagilian. Dagitoy ti pagaammo a kas manzana (Mansanas) ken ti Red Jamaica.
Dagiti bulong ti saba adda sag-utda ket mausar iti nadumaduma a panggep kadagiti tropikal a pagilian. No bumisitakayo iti tiendaan, masansan a makita ti maysa dagiti nabunton a bulong iti kalsada a mailako a pagbalkot iti nasagangasang a tamales, a nalatak a taraon iti nadumaduma a daga.
Adu a tao idiay Honduras ti mangayat a mangipangan iti plantain iti taraonda. Ti maysa a naimas a putahe iti makin-amianan a kosta ti Honduras ket maawagan machuca. No isagana, ti naata a plantain ket mabayo iti alsong, malaokan ti rekado, ket maprito a kadua ti alimango iti lana ti niog.
Idiay Estados Unidos, agarup 11 bilion a saba ti makan iti tinawen. Adu ti mapan idiay Canada ken idiay Britania ken kadagiti dadduma a pagilian iti Europa. Ania dagiti sustansia a magun-odan iti pannangan iti daytoy a prutas? Dagiti saba nabaknangda iti bitamina A ken C, karbohidrato, phosphorus, ken potassium.
Adda nakaad-adu nga usar ti saba! Maitutop la unay a merienda, liningta a saba, banana cue, toron, salad, cake, shake, inkalti, ken, kasta met ti nalatak a banana split. Ngem iti sumaganad a pannanganyo iti naluom a saba, panunotenyo dagiti naisangsangayan a kualidadna. Daytoy a prutas adda bukodna a balkot. Nabaknang dayta kadagiti bitamina ken mineral. Wen, ti saba mabalin a naggapu pay iti kagudua ti aglawlaw ti lubong tapno makagteng laeng iti pangananyo.