Panangmatmat iti Lubong
Klero a Homoseksual
Iti adun a tawen, pinalubosan ti manarawidwid a bagi ti Evangelical Lutheran Church sadi Hannover, Alemania, dagiti homoseksual nga agtrabaho kas miembro ti klero no la ket ta awan ti kaasmangda a homoseksual. Ngem sigun iti publikasion a The Week in Germany, ti pannakaikkat ti maysa a napeklan a homoseksual manipud iti rebbengenna kas klero nasurok a tallo a tawenen ti napalabas ket nangpataud iti adu a panagsusupiat. Nabiit pay nga inanamongan dagiti autoridad sadi Hannover, sigun iti The Week, ti singasing nga agkunkuna a “dagiti pastor ken dagiti ‘kabbalayda a kaasmangda-iti-sekso’ mabalinen nga agtrabahoda iti simbaan, agraman iti kinapastor.”
Aksidente Kadagiti Namulitan-AIDS a Dara
Nabiit pay a kiniddaw ti Health and Welfare Ministry ti Japan kadagiti ospital a mangisumiteda kadagiti report maipapan iti kasansan dagiti aksidente a mainaig iti namulitan-HIV a dara kadagiti agtartrabaho iti ospital. Ti paginteresan ket nangnangruna a maipaay kadagiti aksidente bayat ti napalabas a sangapulo a tawen. Sigun iti The Daily Yomiuri, ti 276 nga ospital a nagtungpal ti nangireport iti “nagupgop a bilang nga aksidente kadagiti dagum a 12,914, agraman dagiti 2,997 a kaso iti aksidente a pannakaiggem iti dara.” Kadagitoy, nasurok a sangagasut a kaso ti mainaig iti namulitan-HIV a dara. Amin dagiti biktima kadagitoy nga aksidente ngarud ti nasukimat ket nasarakan a saan a naakaran iti HIV, ti virus a mangpataud iti AIDS.
Kanser—Agtiktiktik a Naorasan a Bomba
Impalgak ti maysa a panagadal ti Skin and Cancer Foundation sadi Australia a ti kanser ti kudil ti gagangay unayen a kita ti kanser iti dayta a pagilian. Napattapatta a tinawen, ag-1,000 nga Australiano ti matay gapu iti kanser ti kudil. Sigun iti The Daily Telegraph Mirror ti Sydney, Australia, kuna ti panagadal a “ti saan a panagan-annad dagiti adu nga Australiano iti napalalo a pannakabilagda idi napalabas ti nangpataud iti agtiktiktik a naorasan a bomba a kanser.” Kaaduan kadagiti biktima itatta isu dagiti tin-edyer idi a nagbilbilag idi dekada ’60, ’70, ken ’80.
Tulong Agpaay Kadagiti Addaan Insomnia
Addaan dagiti managsirarak idiay Harvard Medical School iti maysa a listaan dagiti singasing nga agpaay kadagiti tattao a marigatan unay a maturog. Sigun iti The Harvard Mental Health Letter, maysa a grupo dagiti pasiente a makabusbos iti ag-80 a minuto a nakaidda sakbay a makaturogda ti nakapadas iti kasta unay a rinang-ayan. Kalpasan a pinadasda ti panangagas iti sumagmamano a lawas, “mangbusbos laengen dagiti pasiente iti promedio a sangapulo ket siam a minuto sakbay a makaturog (bimmassit iti 75%),” kuna ti pagiwarnak. Ti nairekomendar a pamay-an iramanna ti: Panangliklik iti nasurok a pito nga oras a nakaidda; liklikan ti panagidda iti sobra iti maysa nga oras ngem iti promedio a pannaturogyo; bumangonkayo iti isu met la nga oras iti inaldaw, agraman ngudot’ lawas; mapankay laeng maturog no makaturturogkayon; ket no dikay makaturog iti las-ud ti 20 minuto kalpasan ti panagiddayo, bumangonkayo ket mangaramid iti makainana a banag agingga a makaturturogkay manen.
Bandus a Perlas
Ipadamag ti The Washington Post a maysa a grupo dagiti nasurok a 20 a pirpirsay ti bandus, a nagparang iti maysa a ladawan ti teleskopio a kasla maysa a kuentas a perlas, ti mabalin a makidungpar iti planeta a Jupiter. Dagiti pirpirsay ti bandus, a nalabit 3 kilometro ti kaakabana, ti maawagan nga interamente a Shoemaker-Levy 9, a naipanagan kadagiti nakadiskubre. Patien dagiti sientista a timmaud ti kuentas a bandus idi a binurak ti puersa ti grabidad ti maymaysa a bandus iti nabiit pay nga ilalabasna iti Jupiter. Ti epekto dagiti pirpirsay ti bandus, maysa a manmano a pasamak kadagiti tattao a managpaliiw, ket mapasamakto iti sumagmamano nga aldaw iti naladawen a paset ti Hulio 1994. Nupay ti epektona ket mapasamakto iti likudan ti Jupiter, dagiti panagkilap mabalin a silnaganna dagiti bulan ti Jupiter ket nalabit makitanto ditoy Daga babaen iti teleskopio.
Kinaranggas Kadagiti Babbai
Ipalgak ti maysa a nabiit pay a surbey a 51 porsiento kadagiti babbai sadi Canada nga agtawen iti 16 wenno natataengan pay ti biktima iti kinaranggas dagiti lallaki iti naminsan iti biagda kas nataengan, sigun iti The Globe and Mail. Agdagup dayta iti nasurok a lima a milion a babbai. Impadamag daytoy a pagiwarnak ti Canada a dandani kagudua kadagiti napagsaludsodan a babbai ti nagkuna a naggapu ti panangraut kadagiti “nobio, asawa, gagayyem, miembro ti pamiliada wenno dadduma a lallaki nga am-ammoda.” Sangapulo porsiento kadagiti babbai a nasurbey ti nabiktima idi laeng napan a tawen, ken agarup 1 iti 5 a panangraut ti nangpatauden iti grabe a pannakadangran ti bagi. Adu a babbai ti nangipadamag a naiduronda, naguyod, natungpa, nakugtaran, nakagat, wenno tinungpa dagiti assawa wenno kabbalayda a lallaki.
Rinibo a Mula ti Di Maikankano
“Sumagmamano a ribo a kita dagiti mula ti nausar a taraon ti tao iti historia, ngem ita agarup 150 laengen ti maimulmula ket tallo laeng ti mangipapaay iti dandani 60 porsiento kadagiti calorie ken protina nga agtaud kadagiti mula,” kuna ti Food and Agriculture Organization ti NU. Pasingkedan daytoy dagiti internasional a panagadal iti agrikultura. Dagiti tattao kankanayon nga usarenda ti nakairuamanda a taraon—bagas, mais, ken trigo—a dida ikankano dagiti rinibo a dadduma pay a nasustansia a mula a masarakan iti nakaparsuaan.
Bassit Laeng ti Pannakabalinda iti Biagda
Agpapan iti nabiit pay a panagbalbaliw a mangpabor iti demokrasia, 90 porsiento iti populasion ti lubong itatta ti masapul nga agkedked kadagiti bambanag a mangsukog iti biagda. Dayta ti konklusion ti Human Development Report 1993, nga impaulog ti Development Program ti NU (UNDP). Kinuna ti dati nga administrador ti UNDP a ni William Draper, iti pakauna a sao ti report, a ti biag ti kaaduan ti suksukogen pay laeng ti agtultuloy a “pannakidangadang kadagiti gagangay a gundaway nga agbiag—daga, danum, trabaho, lugar a pagnaedan ken dagiti kangrunaan a serbisio ti kagimongan.” Kuna ti report a “masansan a bassit laeng ti pannakabalin dagiti minoridad, dagiti napanglaw, dagiti agnanaed iti aw-away, babbai, ken baldado a mangbalbaliw iti panagbiagda.”
Maibulbulsa a Video a Rosario
Maysa a taga Italia a padi a Katoliko ti nangilatak iti publiko iti maysa nga elektroniko a video a Rosario a kompleto iti musika ken dagiti mabuya a relihiuso a ladawan. Sigun iti inaldaw a periodiko ti Bologna nga Il Resto del Carlino, ti alikamen, a paandaren ti bateria, ket “simple ken nalag-an (a nalaka nga ibulsa wenno ikabil iti bag).” Kadagidiay a mangayat nga agkararag bayat ti panagmanehoda, adda met “naisangsangayan nga adapter a maiplag iti lighter ti sigarilio iti kotse.” Mabalin a pilien ti manamati ti paset ti Rosario a kayatna nga ikararag. Ti “Ave Maria” kas pagarigan, palubosanna ti mangus-usar a mangitultuloy iti nadumaduma a paset ti kararag, a dagiti sasao dayta ti makita iti iskrin. “No mabannogen ti maysa sakbay a maturpos dagiti amin a kararag,” kuna ti Il Resto del Carlino, mabalinna nga iddepen ti alikamen ket, babaen iti tulong ti elektroniko a memoria, “maituloynanto manipud nagsardenganna inton paandarenna manen dayta.”
Ti Kalamiisan a Lugar iti Uniberso
Ti kalamiisan a temperatura iti intero nga uniberso ket nabiit pay a narukod a 0.000,000,000,28 Kelvin. Daytoy a nakaro ti kinalamiisna ket bassiusit a paset ti maysa a degree a nangatngato ngem ti absolute zero. Sadino ti pakapadasan itoy nakalamlamiis a temperatura? Idiay ili ti Nordic iti pagilian ti Finland, sigun iti magasin a New Scandinavian Technology. Kaskasdi, kaaduan a tattao a taga Finland dida ammo daytoy, ta ti nababa a temperatura artipisial a mapasamak iti Low Temperature Physics Laboratory idiay Helsinki University of Technology. Pulos a di naibanag dagiti sientista ti absolute zero, a nadeskribir iti New Scandinavian Technology kas “ti temperatura a mangtanda iti kinaawan dagiti amin a panagbaliw ti temperatura kadagiti atomo.”
Pateg ti Pannakakita iti Makinruar a Buya
Sigun iti maysa a panagadal dagiti managsirarak idiay University of Michigan, E.U.A., nasaysayaat ti panagtrabaho dagiti empleado nga agtartrabaho iti lugar nga adda tawana. Maisupadi iti kadawyan a pammati, ti panangmatmat iti ruar dina paregtaen ti panagarapaap. Ipadamag ti magasin a Business Week nga ipalgak ti pannakasurbey ti 1,200 a tattao a “dagiti trabahador a makabuya iti makinruar a lubong mangipakitada iti ad-adda a kinapasnek iti trabahoda, basbassit a pannakapaay, ad-adu nga anus, nasaysayaat a konsentrasion, ken basbassit nga an-annayen.” Maisupadi iti dayta, dagiti trabahador kadagiti awan tawana a cubicle ket mabalin a “saanda unay makapanunot ken ad-adda a naalipungetda” ken ad-adu ti parikutda a mangipamaysa.
Makapalaing nga Ay-ayam
“Immadu ti naglakuan kadagiti ay-ayam a nadisenio a mangisuro iti paglaingan bayat a dagiti nagannak sukatanda dagiti gagangay nga ay-ayam kadagiti ay-ayam a pakagunggonaan [dagiti ubbing] iti masanguanan,” kuna ti The Globe and Mail, maysa a periodiko ti Canada. Kuna pay ti report a dadduma a nagannak paritanda pay dagiti annakda nga agay-ayam kadagiti abalbalay a “basta pagragsakan laeng. Imbes ketdi, kayatda a tunggal kanito ti panagay-ayam naan-anay a napno kadagiti gundaway a makaisuro iti paglaingan.” Nupay adut’ mamati a daytoy a pagannayasan mabalin a mamataud kadagiti ubbing a nalalaing ken nasaysayaat ti kinasigoda, di umanamong ti dadduma nga eksperto. Mariknada a ti panangikkat iti napateg a di organisado a tiempo ti panagay-ayam tiltilenna ti panagparnuayda “ket basbassitto ti masursuroda kamaudiananna,” kuna ti periodiko.
Umad-adu Dagiti Pirata
Ipadamag ti adda idiay Londres nga International Maritime Organization, maysa nga ahensia ti Naciones Unidas a makidangdangadang kadagiti pirata ken ti naarmasan a panagtakaw kadagiti barko, a “kasta unay ti kasansan ti panagtakaw [dagiti pirata] kadagiti kallabes a tawen agpadpada iti bilang ken iti kinadangkokda kadagiti tripolante.” Nupay kaaduan kadagiti 400 a naipadamag a pasamak iti panagtakaw dagiti pirata ket napasamak idiay Malacca, iti Southeast Asia’s Strait, agdakdakiwas met dagiti pirata iti makinlaud a kosta ti Africa ken iti makin-amianan a daya a kosta ti Sud America. Ti panagtakaw dagiti pirata, kuna ti magasin nga UN Chronicle, “pagam-amkan nga agbalinto a sangalubongan a parikut.”