Manipud Managbasatayo

Dagiti Kumbension Internasional Kayatko ti agyaman kadakayo iti serye nga “Anianto ti Mamagkaykaysa iti Lubong?” (Disiembre 22, 1993) Talaga a tinagiragsakko ti paset maipapan kadagiti kumbension internasional dagiti Saksi ni Jehova idiay Makindaya nga Europa. Makaparegta a madamag a natabunuan ida dagiti dadduma a Kristiano nga agnanaed kadagiti dinadael-gubat a luglugar.

E. R., Estados Unidos

Agpadakam ken lakayko a ministro iti amin-tiempo; ngem ladingitenmi unay ta di impalubos ti badyetmi nga agbalinkami a delegado iti maysa a kumbension internasional. Kaskasdi, idi binasak dagiti artikuloyo, kaslaak la adda iti lugar ti kumbension. Mailadladawanko payen ti bagik a naimpusuan a makipagkankanta kadagiti Kristiano a kakabsat a babbai a naipakita idiay panid 9. Ti artikulo pinaregtanak nga agtalinaed [a matalek].

I. F., Francia

Komunikasion Kalpasan ti panangbasak iti serye a “Komunikasion ti Agassawa” (Enero 22, 1994), naamirisko nga iti unos ti 28 a tawenko kas maysa a kasado, diak naipaay ken baketko ti kasapulanna nga ayat. Iti tunggal tiempo a sapulenna dayta, ibilangko dayta nga inuubingan a rikrikna. Dagitoy nga artikulo tinulongandak a mangtarus no kasano ti panangparsua ti Dios kadagiti babbai. Iti masanguanan, ikagumaakton nga ipaay ken baketko ti kasapulanna nga ayat. Pagyamanan iti daytoy nga umiso a pannakaammo.

Y. K., Japan

Diak mayebkas kadakayo no kasano ti panangtagiragsakko kadagitoy a serye. Nagustuak unay ti umiso a pannakausig iti nagdumaan ti rikrikna ken kababalin ti lallaki ken babbai. Nabaelak nga usigen ti bagik ken ad-adda a matarusan ti bagik. Awan pay asawak, ngem patiek a dagitoy nga artikulo ti tumulongto kaniak tapno ad-adda a maawatak ti panangmatmat dagiti dadduma a tattao.

D. R., Italia

Kunayo a ti panagwaywayas ket banag a napateg kadagiti lallaki. Ngem adda am-ammok a sumagmamano a babbai a mangipatpateg met iti panagwaywayas. Mariribukanak iti panamaggidiatyo iti kapanunotan, rikrikna, ken tarigagay dagiti lallaki kadagiti babbai.

U. B., Alemania

Bigbigen ti artikulo nga “imposible nga ilasin ti maysa a kababalin laeng ti lalaki wenno kababalin laeng ti babai” sa “ti narigat a masarakan a ‘kababalin ti lalaki’ wenno ‘kababalin ti babai’ ket nalabit masarakan laeng kadagiti panid dagiti libro ti sikolohia.” Dagiti napagminar a kababalin ti agassawa a da “Jerry” ken “Pam” ket nagserbi laeng a mangyilustrar no kasano a mabalin a nagduma ti estilo ti komunikasion ti tunggal assawa a lallaki ken babbai.​—ED.

Abalbalay iti Africa Ti artikulo a “Libre nga Abalbalay iti Africa” (Marso 22, 1993) ket nayarig iti naisangsangayan a pakalaglagipan ti kinaubingko. Kadagiti ili ken away idiay Africa, dagiti abalbalay ket saan a magun-odan dagiti amin nga ubbing. Isu a busbosenmi ti panawenmi a mangaramid iti bukodmi nga abalbalay tapno agbalinkami a kas kadagiti nabakbaknang a puraw nga ubbing. Ngem dida inapresiar dagiti inaramid-ima nga abalbalaymi. Kaskasdi a ti artikulo pinaragsaknak.

A. A., Cameroon

Panangrisut Kadagiti Problema Nagsuratak tapno yebkasko ti panagyamanko iti nagadu [ken] nagsayaat nga artikulo ti “Agimtuod Dagiti Agtutubo . . . ” nga ipapaayyo kadakami. Dagiti serye ti umuna a basaek apaman a maawatko ti kabaruan a ruar ti Agriingkayo! Nangnangruna a nagustuak ti artikulo nga “Asinot’ Makatulong Kaniak a Mangrisut Kadagiti Parikutko?” (Disiembre 8, 1993) Addaak iti maudi a tawen ti kina-high school, ket talaga a marigatanak a mangaramid kadagiti pangngeddeng a mangapektar iti masakbayak. Kanayon a silulukat ti ruangan ti komunikasionmi kadagiti nagannakko, kaskasdi nga adda tiempo a mariknak a didak maawatan. Tinulongannak daytoy nga artikulo a manganag no kasano kapateg ti panangkiddaw iti balakadda ken panangyebkas kadagiti rikrikna ken pakaseknak kadakuada.

H. L., Estados Unidos