Manipud Managbasatayo
Abalbalay ti Africa Anian a nakaay-ayat nga artikulo ti “Libre nga Abalbalay iti Africa”! (Marso 22, 1993) Kas maysa a maestra iti arts, ammok no kasano kapateg ti panangitandudo iti kinamanagpartuat kadagiti ubbing iti daytoy a tiempo ti telebision ken computer games. No mangbusbos dagiti nagannak iti tiempo nga agaramid iti bambanag a kadua dagiti annakda, makaparnuayda met iti manayon a pakalaglagipan!
D. B., Alemania
Agtawenak iti pito. Magustuak ti artikulo, ket pagarupek a nasayaat no agaramid [dagiti ubbing nga Africano] iti bukodda nga ay-ayam! Kasla nakaay-ayat dayta, ket kayatko a padasen.
M. S., Estados Unidos
Panangrames Nagsayaat unay dagiti serye ti artikuloyo a “Panangrames—Pagam-amkan ti Babai.” (Marso 8, 1993) Agtawenak iti 14, ket nakadamagakon kadagiti balasitang nga ub-ubing ngem siak a narames. Ngem idi laeng nabasak ti artikuloyo a nagarubos ti lua kadagiti matak, ket nabigbigko nga ad-adda gayam a serioso daytoy ngem iti impagarupko. Pagyamanan unay.
S. B., Estados Unidos
Kabayatan ti umuna a tawenko iti high school, rinamesnak ti maysa a “gayyem ti pamilia.” Iti napalabas a sumagmamano a tawen, impagarupko no nakabasolak iti pannakiabig. Ita naawatakon nga ammo ni Jehova a diak basol daydi! Ti laeng pagbabawiak isut’ saanko a dagus a panagpatulong.
A. S., Estados Unidos
Adu a panangagas ti tumulong kadagiti biktima ti panangrames, ngem dida ibaga no kasano a liklikan dayta. Talaga a napatpateg ti panangsaluad ngem ti panangagas! Iti daytoy a pamay-an a naan-anay a natulongannak ti artikulo, ket sigurado a tulonganna dagiti babbai iti sadinoman a mabalin a mabiktima iti panangrames.
J. A. M., Brazil
Rinautnak ti maysa a manangrames idiay ruar ti balayko. Kasta unay ti pannakigubalko ken namin-adu nga inriawko ti nagan ni Jehova isu a nangrugi a nagtaol dagiti aso. Nabannog met laeng ti mangrames koma kaniak sa nagtalaw. Isingasingko a suroten koma ti amin dagiti singasingyo. Agpapan pay iti aniaman a kasasaad, dakkel unay ti mabalin a maitulong ti [dagus a] panagtignaytayo.
S. P., Estados Unidos
Ngangngani 20 a tawenen ti napalabas, rinamesnak ti maysa nga am-ammomi. Diak pulos nagdarum gapu ta mabainak. Insaritak laeng dayta tallo a tawen kalpasanna, bayat ti panagpaagasko iti maysa a psychotherapist. Idi laeng nga impakaammok ken lakayko. Ita laeng a maawatanna ti pannakasuronko iti seksual a panagdenna. Kalpasan a nabasak dagiti artikuloyo, nagsangitak iti rag-o—saan a ladingit—iti damo unay kalpasan iti unos ti 20 a tawen, ken nagyaman ken Jehova.
T. P., Estados Unidos
Panagsirarak iti Law-ang Nabasakon dagiti nagsayaat nga artikulo maipapan ti panagsirarak iti law-ang iti Setiembre 8, 1992 a ruar ti Agriingkayo! Nupay bassit unay ti pannakaammok iti daytoy a tema, naawatak ti nalawag a panangibinsabinsayo. Patiek a dagitoy nga artikulo ti tumulongto kadatayo nga ad-adda a mangapresiar ti panggep ni Jehova agpaay ti natulnog a natauan a pamilia.
W. D. F., Costa Rica
Nagsuratkami ta kayatmi ti agyaman iti panagreggetyo a nagsurat kadagiti artikulo maipapan ti panagsirarak iti law-ang. Kalpasan a nabasami ti maudi nga artikulo, sirarag-okami a nagyaman ken Jehova, ti kasisiriban a Dios, a nangurnos iti uniberso iti nakaskasdaaw a pamay-an. Segseggaanmi ti baro a sistema, inton ipaaynan kadagiti natulnog a tattao nga addaan naan-anay nga utek ti gundaway nga ad-adda a maawatan ti uniberso.
I. N. O. ken J. N. O., Nigeria