Manipud Managbasatayo

Komunikasion Naawatko ita ti Enero 22, 1994, a ruar a naglaon iti serye a “Komunikasion iti Agassawa.” Kasla posible a daytoy ket naglaon kadagiti kasayaatan pay laeng a serye dagiti artikulo a nabasak. Makatawen ket kaguduan nga agassawakami ken lakayko. Nagsayaat ti relasionmi ken talaga a naragsakkami, nupay rumsua no dadduma ti dimi panagkinnaawatan. Nangipaay ti Agriingkayo! iti sumagmamano a pananganag no apay a mapasamak daytoy. Bayat a binasak dagiti artikulo iti maikatlo a daras, palubosandak man nga agyaman ken Jehova ken kadakayo iti panangipablaakyo iti kasta a naintiempuan nga impormasion.

C. M., Estados Unidos

Naregta ni lakayko kas maysa a Kristiano a panglakayen ken amin-tiempo a managebanghelio. Nupay kasta, dikam unay agsinsinnarita manipud nagkallaysakami ket napadasanmin dagiti nakababain a kanito. Sipaprangka nga impaawat kadakami dagitoy nga artikulo dagiti pakaigapuan ti problema. Masiguradomi a matulongandakaminto a mangpasayaat iti relasionmi.

C. A., Japan

Iti panangbasak kadagiti reaksion ni “Pam,” naamirisko nga awan pay nasaysayaat a panangyebkasko iti rikriknak. Kasta met lat’ makunak ken lakayko ken ni “Jerry.” Tinulongannak ti artikulo a mangamiris kadagiti makagapu, imbes a dagiti laeng epektona. Naallukoyak met iti makaay-ayo a pamay-an ti pannakailawlawag dagiti artikulo iti daytoy nagpateg a tema.

E. F., Italia

Nupay agtawenak la ita iti 17 ken diak pay la kayat ti makiasawa iti nalabit sumagmamano a tawen, kaskasdi nga apresiarek unay daytoy a pannakautob no apay a nadumaduma ti panagtigtignay dagiti tattao. Planok nga idulin daytoy nga artikulo ken pasaray basaen iti intero a sumaganad a tawtawen. Nangnangruna a kasapulak dayta inton nakasaganaakon a makiasawa!

N. B., Estados Unidos

Ni tatangko ket kapadpada unay ni “Jerry.” Ngem ita maawatakon no di agtagtagari ken dinak kayat a kasarita, kalinteganna dayta. Nupay makailawlawag ti artikulo, madanaganak di la ket ta usarennanto [dayta] a mangpasingked nga OK ti ar-aramidenna.

A. B., Estados Unidos

Inkagumaan dagiti artikulo a tulongan dagiti managbasa a mangtarus no apay a nadumaduma ti pamay-an ti panagrikna wenno panagtignay dagiti lallaki ken babbai. Nupay kasta, dimi kayat a sawen nga adda kalintegan ti lalaki wenno babai a di makisarita wenno agtignay a di umiso. Idagadag dagiti Kasuratan a liklikan ti amma ti ‘panangrurod kadagiti annakda.’ (Colosas 3:21) Ilaksid daytoy ti panangipalubos iti di nainkalintegan ti kapautna a panagulimek no kayat ken kasapulan dagiti annak ti panangiwanwan dagiti dadakkelda.​—ED.

Siguradok nga aglayus la ketdi dagiti surat a naglaon kadagiti mangpadayaw a komento maipapan kadagitoy nga artikulo. Pangngaasiyo ta inayonyo dagiti komentok. Iti artikulo maipapan kada “Jerry” ken “Pam,” ti la koma naganmin ken baketko ti inusaryo. Naawatak la koma idin dagiti rikna ni baketko! Kaslaak la ken “Jerry,” a mangikagkagumaan a mangpennek kadagiti kasapulanna ngem ar-aramidek dayta tapno mapennek met dagiti kasapulak. Ita, indiborsionak la ngarud ti asawak iti 20 a tawen. Nalabit matukayto ti puso ni baketko kadagitoy nga artikulo, ket mabalin a bangonenminto manen ti panagasawami.

J. K., Estados Unidos

Quiz ti Biblia Ania la ketdin ti panangtagiragsakko iti panid a “Napanunotyo Kadin?” iti Enero 8, 1994 a ruar. Nangaramidak kadagiti kopia dayta a panid ket impatulodko dayta kadagiti gagayyem, miembro ti pamilia, ken dadduma pay nga interesado a tattao. Pinaregtak ida a kitaen ti tunggal Kasuratan sada isurat dagiti aniaman a maisaludsodda. Daytat’ nagsayaat a pangiruangan iti pannakaisalaysay ti Biblia kadakuada. Pangngaasiyo ta mangipablaakkay pay kadagiti umasping nga artikulo!

M. S., Estados Unidos