Manipud Managbasatayo

Diborsio Bayat a binasak “Ti Panangmatmat ti Biblia . . . Aniat’ Diborsio a Guraen ti Dios?” (Pebrero 8, 1994), nagutugotak unay. Gapu ta nabiit pay a nakidiborsioak kalpasan ti 20 a tawen a pannakiasawak iti di matalek nga asawa, nabigbigko a di guraen ni Jehova ti desisionko ket di rumbeng a mariknak a nakabasolak. Pudno a “kellaat a tumaud” dagiti rikrikna ti pannakariribuk, panagliday, ken riknat’ pannakabasol. Ngem ti panawen ken panagpannuray ken Jehova ti bambanag a mangiliwliwag.

B. M., Estados Unidos

Kabayatan ti pannakiasawak, busoren unay ni lakayko ti panagbalinko a maysa kadagiti Saksi ni Jehova. Idi agangay, nakikabbalayen iti babaina sada nagkiddaw iti diborsio. Talaga a nariknak a ‘ti Dios inayabannak iti talna.’ (1 Corinto 7:15) Kadagiti annakko, nasaem ti panagsinami, ket iti unos dagiti tawen, namin-adun a binasak ti Malakias 2:16 ken pampanunotek no umiso met laeng ti inaramidko. Tinulongannak ti artikuloyo a nanggun-od iti natimbeng a panangmatmat iti daytoy a teksto.

J. C., Estados Unidos

Yaakar Kayatko a yebkas kadakayo ti napalaus a panagyamanko a nakaawat kadagiti artikuloyo nga “Agimtuod Dagiti Agtutubo . . . ” maipapan iti yaakar. (Pebrero 22, 1994, ken Marso 8, 1994) Agtawenak iti 16 ken asidegen a panawak dagiti amin a nadekket a gagayyemko. Rinabii nga agsangitak, a kalkalikagumak nga adda koma rason nga agbatiak. Idi kuan, nabasak dagiti artikuloyo. Inkeddengko nga ad-adda a matmatan ti positibo nga ibunga ti yaakar. Nupay nalidayak pay laeng iti yaakarko, dakkel ti simmayaatanen ti kababalinko.

A. D., Estados Unidos

Dagiti artikulo ti talaga a kasapulak. Ti kasayaatan a balakad ket magna a siuurnos iti daytoy met laeng a rutina no maipapan kadagiti naespirituan a banag. Masapul a bigbigek a sadinoman a pagakarakto, kankanayon nga addanto sadiay ni Jehova. Isu nga apay a diyo am-ammuen a sisisinged babaen iti naganetget a personal a panagadal? Ti panangaramidko iti dayta dakkel ti naitulongna iti diakon pannakaikawa iti kabbaro a pagtaengak.

T. T., Estados Unidos

Kinaawan Adal Masansan a kayatko ti agsurat ken agyaman kadakayo kalpasan ti panagbasak iti dadduma a makapainteres nga artikulo. Ngem kamaudiananna, dagiti serye ti “Panangpekka iti Kawar ti Kinaawan Adal” (Pebrero 22, 1994) ti nanggutugot kaniak a mangaramid iti dayta. Inton sumaganad a lawas rugiakton ti panangyadal iti Biblia iti maysa a babai a dina ammo ti agbasa wenno agsurat. Diak ammo idi no kasanok nga aramiden dayta, ngem ammok itan, gapu kadagitoy nga artikulo. Dimtengda iti umiso unay a tiempo!

M. A. C., Italia

Dagiti Siudad Agtawenak iti 17 ket binusbosko ti damo a 14 a tawen ti panagbiagko idiay Siudad ti Nueva York. Isu a talaga a tinagiragsakko dagiti artikuloyo maipapan kadagiti dadakkel a siudad. (Enero 8, 1994) Nagustuak dagiti makakarit a pannubok a linaonna.

S. H., Estados Unidos

Kamote Moro Makapainteres unay ti artikulo a “Mangantayo iti Kamote Moro!” (Nobiembre 8, 1993) Kas maysa a taga Nigeria, maysaak kadagiti riniwriw nga Africano a mangtagtagiragsak unay iti kamote moro, nangnangruna iti foofoo ken gari. Kinapudnona, mayebkasko ti panagyamanko iti Namarsuatayo iti panangipalubosna a magun-odanmi ti kamote moro. No awan dayta, pimmusay koman ti riniwriw nga Africano.

O. N. Y. I., Nigeria

Natured a Misionera Natukay unay ti riknak iti kapadasan ni Annama Abraham iti pakasaritaanna a “Panangparmek Kadagiti Karit ti Biag Idiay Abagatan nga Asia.” (Enero 22, 1994) Napukawna ti ing-ingungotenna a lakayna ngem agserserbi pay laeng ken Jehova buyogen iti kinatarnaw. Kayatko nga ibaga kenkuana a naparegtaak iti pakasaritaanna.

I. I. C. S., Brazil