Manipud Managbasatayo

Dagiti Matalek nga Agtutubo Ti serye a “Dagiti Agtutubo a Nangipangpangruna iti Dios” (Mayo 22, 1994) tinukayda ti riknak. Idi tin-edyerak pay laeng, adda tumor ti utekko. Kas maysa a Saksi ni Jehova, kinunak kadagiti doktor: “Diak kayat ti mayalisonan iti dara.” Nupay nangalada iti bilin ti korte tapno maipilit ti dara kaniak, naballigi ti operasion nupay awan dayta. Aglulua dagiti matak bayat a binasak ti maipapan kadagitoy a matalek nga agtutubo nga adipen ti Dios. Napadasanda ti kas iti napadasak! Dagiti pakasaritaanda ti nangtukay iti pusok ken nangpabileg iti ayatko iti Dios.

M. P., Estados Unidos

Agtawenak iti 17 ket madanaganak a dumtengto ti aldaw a masarakak ti bagik iti kasta a kasasaad. Diak kabuteng ni patay, ngem kabutengko ti panangilaksid iti linlinteg ni Jehova. Nakaam-amak ti sumuko iti sidong ti pannakapilit. Ti artikulo pinabilegnak unay.

C. K., Alemania

Idi binasak dagiti artikulo, diak malapdan ti di agsangit. Kalpasanna, siaannad a binasak ti bokleta a Kasano a Maispal ti Dara ti Biagyo? (impablaak ti Watchtower Society). Ammokon no kasanonto ti panagtignayko no bilang addaakto iti umasping a kasasaad.

Y. G., Alemania

Tangay agsagsagabaak iti maysa a din maagasan a kita ti leukemia, talaga a makaparegta kaniak kas maysan a nataengan ti kapadasan dagiti agtutubo a nangpaneknek iti debosionda ken Jehova. Pagyamanan unay.

H. K., Austria

Agtawenak iti 18. Nagagaran ken agpigpigergerak a nangbasa kadagiti artikulo idi kalman. Diak maisardeng ti agsangit idi naammuak a natay dagitoy a matalek nga ubbing. Ti pammatida ti nanggutugot kaniak a mangutob iti bagik no kabaelakto met ngata a salimetmetan ti kinatarnawko iti sidong dagita a kasasaad.

E. A. O., Nigeria

Talaga a napabilegak iti di maparmek a kinatibker dagiti amin a nadakamat nga agtutubo. Kalpasan ti panangbasak kadagiti artikulo, napalalot’ panagsangitko ken nagyamanak ken Jehova ta inikkanna ida iti bileg a mangsaranget iti kasta a pakarigatan agingga iti ipupusayda. Sipapasnek a maikunak a dagiti parikutko kas agtutubo ket nalag-an laeng no idildilig.

R. C., Italia

Talaga a pabilgento dagitoy makatukay-rikna nga artikulo amin nga agtutubo a mangbasa kadakuada. Amin dagitoy nga agtutubo ket sibibileg a nagkedkedanda ti dara; kasta pay met a nabaelandan ti mangaramid iti bukodda a pangngeddeng ken silalawag nga ikalintegan ti bagbagida. Napabilegak a makaammo nga aniaman dagiti pakarigatan ken pannubok, kanayonto nga ikkannatay ni Jehova iti bileg ken umno a tulong.

R. T., Japan

Kinaawan Adal Apresiarek dagiti serye a “Panangpekka iti Kawar ti Kinaawan-Adal.” (Pebrero 22, 1994) Idi nagpaingak manipud China a nagpa-Sud Africa idi dekada ’50, diak makapagsao iti aniaman a pagsasao ditoy. Nupay kasta, inan-anusandak a tinulongan dagiti Saksi ni Jehova a mangtarus iti Biblia iti Ingles. Tinabunuak met dagiti gimongda agraman ti Teokratiko nga Eskuelaan ti Panagministro. In-inut a rimmang-ay ti panag-Inglesko, ket ita, addan panagtalekko iti panagbalaybalay a ministerio.

W. W., Sud Africa

Reinkarnasion Nupay maysaak a Muslim, kanayonak nga agbasa iti Agriingkayo! Kayatko a yebkas ti naimpusuan a panagyamanko iti kallabes nga artikuloyo a “Nagbiagkay Kadi Idin? Agbiagkayto Kadi Manen?” (Hunio 8, 1994) Nasarakak a makaisuro unay dayta. Nabayagen a mangsapsapulak iti impormasion a mabalin a mausar a mangkorehir iti dadduma kadagiti gagayyemko a mangipapilit iti kaadda ti reinkarnasion. Babaen iti naited nga impormasion, patiek a sigurado nga umanamongdanto a tangay adda panagungar, awan ngarud ti reinkarnasion.

K. S., Nigeria